Kyɛkyɛ. Gyihova Alasevolɛ le Kilisienema, noko yɛndia yɛ nwo yɛmboka Protestantma anwo. Duzu ati ɔ?

 Bɛkile nu kɛ Protestantma le “ɛzonlenlɛ ekpunli mɔɔ dwazo tia Kateleke Asɔne ne.” Ɔwɔ nuhua kɛ Gyihova Alasevolɛ ɛnlie Kateleke Asɔne ngilehilelɛ ne ɛndo nu ɛdeɛ, noko yɛmbu yɛ nwo kɛ yɛle Protestantma ɔlua ninyɛne ɛhye mɔ ati:

1.   Protestantma ngilehilelɛ ne anu dɔɔnwo nee mɔɔ Baebolo ne kilehile la ɛnyia. Kɛ neazo la, Baebolo ne kilehile kɛ “Nyamenle kokye a wɔ ɛkɛ a,” na ɔnle Nyamenle ko mɔɔ wɔ nuhua nsa. (1 Timote 2:5; Dwɔn 14:28) Eza ɔkilehile nuhua wienyi kɛ Nyamenle bazɛkye amumuyɛma ɛzɛkyelɛ mɔɔ ɛnlɛ awieleɛ, na ɔnrɛzɛkye bɛ wɔ hellsenle nu.​—Edwɛndolɛ 37:9; 2 Tɛsalonaekama 1:9.

2.   Yɛndwazo yɛntia Kateleke Asɔne ne anzɛɛ yɛmbɔ mɔdenle kɛ yɛyɛ bɛ Asɔne ne anzɛɛ ɛzonlenlɛ gyɛne biala boɛ. Emomu, yɛbɔ Nyamenle Belemgbunlililɛ ne anwo edwɛkpa ne nolo, na yɛbɔ mɔdenle kɛ yɛmaa awie mɔ noko anyia zɔhane edwɛkpa ne anu diedi. (Mateyu 24:14; 28:19, 20) Tɛ yɛ adwenle a le kɛ yɛbɔ mɔdenle yɛayɛ asɔne gyɛne mɔɔ ɛha la boɛ, emomu, yɛkulo kɛ yɛkilehile menli mɔɔ lɛ ahonle kpalɛ la Nyamenle nee ye Edwɛkɛ, Baebolo ne anwo nɔhalɛ ne.​—Kɔlɔsaema 1:9, 10; 2 Timote 2:24, 25.