Gyihova Alasevolɛ ɛnli awolɛkenle ɔluakɛ yɛdie yɛdi kɛ ɛvoyia zɛhae ɛnzɔ Nyamenle anye. Baebolo ne ɛndua yɛ kɛ yɛmmadi awolɛkenle ɛdeɛ, noko ɔmaa yɛdwenle ninyɛne titili bie mɔ mɔɔ kɔ zo wɔ ɔ bo la anwo na yɛnwu Nyamenle adwenle wɔ nwolɛ. Suzu ninyɛne ɛhye mɔ anu nna nee nwolɛ Baebolo ngyinlazo anwo.

1.   Awolɛkenle ɛlilɛ abo vi awozonlezonlenlɛ nu. Kɛ mɔɔ Funk & Wagnalls Standard Dictionary of Folklore, Mythology, and Legend kile la, bɛnyianle ɛvoyia ɛhye bɛvile diedi mɔɔ kile kɛ wɔ awie awolɛkenle mekɛ nu “sunsum evinli nee debie gyɛne nyia nwolɛ adenle teta ahenle mɔɔ ɛlɛdi ye awolɛkenle la” na “agɔnwolɛma mɔɔ ba ɛkɛ nee edwɛkɛ kpalɛ mɔɔ bɛka la bɔ ahenle ne anwo bane.” The Lore of Birthdays buluku ne ka kɛ wɔ tete ne, ɛnee awolɛ kenle nwo kɛlɛtokɛ “hyia ɔluakɛ ɛnee bɛgyinla mɔɔ nwɔlɔra kengavoma ka la azo bɛkile mɔɔ bado awie kenle bie la.” Buluku ɛhye toa zo kɛ “bɛlɛ diedi kɛ debie titili bie wɔ awolɛkenle kyɛnɛlɛ nu mɔɔ maa ahenle nyia debie mɔɔ ɔkulo la.”

    Noko akee, Baebolo ne tendɛ tia ngonyiayelɛ, abisadeɛ, sunsum evinli nyɛleɛ anzɛɛ ninyɛne “ɛhye bie” mɔ mɔɔ bɛfa bɛdi gyima la. (Mɛla ne 18:14; Galeehyeama 5:19-21) Nɔhalɛ nu, deɛmɔti Nyamenle deanle tete suakpole Babelɔn la anu ko a le kɛ ɛnee ye ezuavolɛ ne le nwɔlɔra kengavoma, mɔɔ ɔle kɛ abisadeɛ ala la. (Ayezaya 47:11-15) Gyihova Alasevolɛ ɛmmaa ɛleka mɔɔ amaamuo biala abo vi la ɛnli bɛ adwenle; noko saa Ngɛlɛlera ne fa nwolɛ adehilelɛ fɔɔnwo maa a, bɛmbu bɛ nye bɛgua zo.

2.   Alimoa Kilisienema anli bɛ awolɛkenle. The World Book Encyclopedia ka kɛ “bɛbule awolɛkenle ɛlilɛ kɛ ɔle awozonlezonlenlɛ amaamuo.” Baebolo ne maa yɛnwu kɛ ɛzoanvolɛma ne nee menli gyɛne mɔɔ Gyisɛse mumua ne hilehilele bɛ la yɛle neazo mɔɔ ɔwɔ kɛ Kilisienema kɔsɔɔti di zo a.​—2 Tɛsalonaekama 3:6.

3.   Ɛvoyia mɔɔ ɔwɔ kɛ Kilisienema di la ɛnvale awolɛkenle nwo, emomu Gyisɛse ewule ne anwo. (Luku 22:17-20) Ɔnle kɛ ɛhye yɛ yɛ azibɛnwo, ɔluakɛ Baebolo ne ka kɛ “ewule kenle le kpalɛ tɛla awolɛ kenle.” (Nolobɔvo ne 7:1) Mɔɔ Gyisɛse ɛbɛlabɔlɛ wɔ azɛlɛ ye azo kara awieleɛ la, ɛnee ɔlɛ duma kpalɛ wɔ Nyamenle anyunlu, na ɔmaanle kenle mɔɔ ɔwule la hyianle ye kpalɛ dɛlale ye kenle mɔɔ bɛwole ye la.​—Hibuluma 1:4.

4.   Baebolo ne ɛnga kɛ Nyamenle sonvolɛ bie lile ye awolɛkenle. Ɛhye ɛngile kɛ bɛ nye kpalɛ zo, ɔluakɛ ɔka menli nwiɔ mɔɔ bɛnzonle Nyamenle na bɛlile bɛ awolɛkenle la anwo edwɛkɛ. Noko akee, ɔnga biala anwo edwɛkɛ kpalɛ.​—Mɔlebɛbo 40:20-22; Maake 6:21-29.

 Kɛ mɔɔ awovolɛ kpalɛ kɔsɔɔti yɛ la, Alasevolɛ da ɛlɔlɛ ali kile bɛ mra wɔ ɛvolɛ ne anu amuala, ɔlua ahyɛlɛdeɛ mɔɔ bɛfa bɛmaa bɛ na bɛ nee bɛ bɔ nu die bɛ nye la azo. Bɛbɔ mɔdenle bɛsukoa neazo kɛnlɛma mɔɔ Nyamenle yɛ, mɔɔ ɔfi ye ahonle nu ɔfa ninyɛne kpalɛ ɔmaa ɔ mra la. (Mateyu 7:11) Awovolɛ mɔɔ bɛle Alasevolɛ la amra ɛnde nganeɛ kɛ bɛminli debie ɔlua edwɛkɛ ɛhye mɔ ati:

•   “Saa ɛ nye ɛnla ahyɛlɛdeɛ bie ade na bɛfa bɛmaa wɔ a ɔyɛ anyelielɛ kpole.”​—Tammy, ɛvolɛ 12.

•   “Mennyia ahyɛlɛdeɛ wɔ me awolɛkenle mekɛ ɛdeɛ, noko me awovolɛ tɔ debie kyɛ me wɔ mekɛ gyɛne nu. Mekulo ye zɔhane ɔluakɛ me nye ɛnla.”​—Gregory, ɛvolɛ 11.

•   “Ɛdwenle kɛ bɛfa mitini bulu, keeki ekyi nee edwɛne a bɛto ɛkponle a? Ɔwɔ kɛ ɛba me sua nu na ɛbanea kɛzi ɛkponledolɛ kpalɛ si de la!”​—Eric, ɛvolɛ 6.