Ɛhɛe, Gyihova Alasevolɛ ta boa menli mɔɔ esiane kɛdo bɛ la. Yɛfa ninyɛne yɛmaa Alasevolɛ nee menli mɔɔ ɛnle Alasevolɛ mɔɔ esiane kɛdo bɛ la. Ɔluakɛ Baebolo ne ka ye wɔ Galeehyeama 6:10 kɛ: “Kenle biala mɔɔ mekɛ kɛra kɛ ɔwɔ kɛ yɛyɛ nyele la, bɛmaa yɛyɛ yɛmaa awie biala, bɔbɔ bɛdabɛ mɔɔ yɛ nee bɛ yɛ muala yɛlɛ diedi ko la.” Eza yɛboa bɛ wɔ sunsum nu na yɛkyekye bɛ rɛle.—2 Kɔlentema 1:3, 4.

 Saa esiane si a, mgbanyima mɔɔ wɔ asafo mɔɔ wɔ ɛleka mɔɔ esiane ne kɛzi la nee menli mɔɔ wɔ asafo ne anu la di ngitanwo amaa bɛanwu kɛzi bɛ nwo de nee moalɛ mɔɔ bɛhyia la. Yemɔ anzi, mgbanyima ne mɔ fa mɔɔ bɛkɛnwu ye nee mɔɔ bɛyɛ ye wɔ nwolɛ la anwo amaneɛbɔlɛ kɔmaa Gyihova Alasevolɛ ɔfese mɔɔ wɔ maanle ne anu la.

 Saa moalɛ mɔɔ ɔwɔ kɛ bɛfa bɛmaa la bo asafo ne mɔ mɔɔ wɔ ɛkɛ ne la anwo zo a, Gyihova Alasevolɛ Neazo Eku ne yɛ ngyehyɛleɛ na bɛkɔboa. Ɛhye nee mɔɔ alumua Keleseɛnema yɛle wɔ ɛhɔne mekɛ nu la le ko. (1 Kɔlentema 16:1-4) Gyihova Alasevolɛ ɔfese ne mɔɔ wɔ maanle ne anu la kpa Esiane Nwo Moalɛ Kɔmatii na bɛnea bɛyɛ ngyehyɛleɛ bɛfa bɛdi menli mɔɔ esiane ɛdo bɛ la ngyianlɛ nwo gyima. Alasevolɛ mɔɔ wɔ ɛleka gyɛne la fi bɛ ahonle nu fa bɛ mekɛ nee bɛ ninyɛne bɛkɔboa.—Mrɛlɛbulɛ 17:17.

 Debie ko mɔɔ bɛfa ezukoa mɔɔ Gyihova Alasevolɛ ɔfese ne asa ka ye bɛyɛ la le kɛ bɛfa bie bɛboa menli mɔɔ esiane ɛdo bɛ la. (Gyima ne 11:27-30; 2 Kɔlentema 8:13-15) Kɛmɔ menli mɔɔ bɛndua bɛ kakɛ a fi bɛ ahonle nu yɛ gyima ne la ati, ɔmaa bɛkola bɛfa ezukoa ne bɛdi menli mɔɔ esiane ɛdo bɛ la ngyianlɛ nwo gyima. Yɛnea ezukoa biala mɔɔ yɛ sa ka ye la azo boɛ.—2 Kɔlentema 8:20.