Yɛfa ndoboa mɔɔ yɛnyia la yɛboa ɛzonlenlɛ gyima nee moalɛ gyima mɔɔ yɛyɛ wɔ yɛ ahyehyɛdeɛ ne anu la. Debie titili mɔɔ ɔti yɛyɛ ɛhye mɔ la a le kɛ yɛfa yɛaboa awie mɔ yɛamaa bɛarayɛ Kelaese Gyisɛse ɛdoavolɛma.​—Mateyu 28:19, 20.

 Yɛnlie ndoboa ne mɔ yɛngua awie kodoku nu. Gyihova Alasevolɛ ɛnlɛ mgbanyima anzɛɛ ɛsɔfoma mɔɔ bɛtua bɛ kakɛ a, yɛɛ bɛndua yɛ kakɛ wɔ daselɛlilɛ gyima ne mɔɔ yɛyɛ la anwo. Bɛndua menli mɔɔ bɛyɛ gyima wɔ yɛ ɔfese ne mɔ nee yɛ ewiade amuala gyima ne ati, mɔɔ Neazo Eku ne anu amra boka nwo la kakɛ.

•   Mbulukuyɛlɛ: Ɛvolɛ biala, yɛkile Baebolo ne nee mbuluku gyɛne mgbe dɔɔnwo abo, yɛpelente na yɛkyɛ yɛmaa menli mɔɔ yɛnlie ezukoa biala a. Eza yɛyɛ ninyɛne ngakyile yɛgua jw.org wɛbsaete ne nee JW Library app ne azo yɛmaa menli mɔɔ bɛndua nwolɛ ɛhwee a.

•   Azua Ɛsisilɛ Nee Zolɛ Ɛnleanlɛ: Yɛsisi azua mɔɔ bɛnle hyeleenyi la wɔ ewiade amuala na yɛnea zo boɛ, amaa asafo ne mɔ anyia ɛleka kpalɛ mɔɔ bɛbayia nu bɛaye Nyamenle ayɛlɛ la. Eza yɛsisi ɔfese ngakyile yɛɛ azua mɔɔ bɛkile edwɛkɛ bo wɔ ɛkɛ la. Menli tu bɛ nwo maa yɛ gyima ɛhye mɔ anu dɔɔnwo, na yemɔ ɛmmaa yɛmbɔ kakɛ dɔɔnwo.

•   Menli Mɔɔ Nea Gyima Ne Azo: Ndoboa mɔɔ bɛye bɛboa ewiade amuala gyima ne la bie a bɛfa bɛnea menli mɔɔ yɛ gyima wɔ yɛ ewiade amuala gyima ne ati, ɔfese ne mɔ anu, edwɛkɛbohilelɛ ɔfese ne mɔ anu yɛɛ neavolɛ adenduvoma a.

•   Edwɛkɛhanlɛ Gyima: Bɛndua Alasevolɛ ne mɔ kakɛ wɔ edwɛkpa ne nolobɔlɛ nee awie mɔ mɔɔ bɛkilehile bɛ “Nyamenle edwɛkɛ ne” la anwo. (2 Kɔlentema 2:17) Bɛkpondɛ sua bɛmaa azonvolɛ mɔɔ bɛtete bɛ mɔɔ bɛfa bɛ mekɛ dɔɔnwo bɛyɛ edwɛkɛhanlɛ gyima ne la na eza bɛmaa bɛ sa ka ninyɛne titili mɔɔ bɛhyia la. Zɔhane a ɛnee ɔde wɔ alimoa Kilisienema mekɛ zo a.​—Felepaema 4:16, 17; 1 Timote 5:17, 18.

•   Ngilehilelɛ: Bɛfa ndoboa mɔɔ yɛnyia la bie a bɛtua yɛ nyianu ne mɔ anwo kakɛ a. Eza yɛyɛ ninyɛne mɔ bɛbɔ bɛtie nee vidio ngakyile. Yɛɛ yɛyɛ sukulu ngakyile mɔɔ bɛfa bɛtete mgbanyima nee menli mɔɔ fa mekɛ dɔɔnwo yɛ ɛzonlenlɛ gyima ne la. Ɛhye boa bɛ maa bɛyɛ bɛ gyima ne kpalɛ.

•   Esiane Mekɛ Nu Moalɛ Gyima: Yɛmaa menli mɔɔ esiane ɛdo bɛ la aleɛ, nzule nee azua. Yɛyɛ ɛhye yɛmaa “bɛdabɛ mɔɔ yɛ nee bɛ lɛ diedi ko la” nee menli mɔɔ bɛnle Gyihova Alasevolɛ la amuala.​—Galeehyeama 6:10.