Kyɛkyɛ, ɔnle kyengye kɛ ɛbayɛ zɔ. Menli mgbe dɔɔnwo anye die yɛ Baebolo ɛzukoalɛ ngyehyɛleɛ ne anwo noko bɛ nee yɛ ɛmbɔ nu ɛnzonle. a Yɛ ngyehyɛleɛ ne bodane a le kɛ ɔmaa wɔanwu mɔɔ Baebolo ne kilehile la. Mɔɔ ɛbava zɔhane ndelebɛbo ne wɔayɛ la gyi ɛ nwo zo. Yɛdie yɛto nu kɛ awie biala lɛ nwolɛ adenle kpa diedi mɔɔ ɔkulo la.​—Dwɔhyua 24:15.

 Ɛhɛe. Ɔwɔ nuhua kɛ yɛfa New World Translation of the Holy Scriptures mɔɔ ɔ bo ɛdelɛ ɛnyɛ se la yɛdi gyima yɛɛ saa ɛkulo a yɛbamaa wɔ bie mɔɔ ɛndua ɛhwee ɛdeɛ, noko yɛ nye balie nwo kɛ ɛbava wɔ Baebolo wɔali gyima. Ɛbahola wɔazukoa Baebolo ne anu anyelazo nee ngoane edwɛkɛ ne wɔavi Baebolo ngilebɛbo biala anu.

•   Debie titili mɔɔ maa yɛka edwɛkɛ ne la a le ɛlɔlɛ mɔɔ yɛlɛ yɛmaa Gyihova Nyamenle mɔɔ kulo kɛ Kilisienema ka mɔɔ bɛzukoa la anwo edwɛkɛ bɛkile awie mɔ la. (Mateyu 22:37, 38; 28:19, 20) Yɛze kɛ ɔle nwolɛ adenle titili kɛ yɛbayɛ “Nyamenle agɔnwo mɔ gyimayɛvoma” yɛaboa awie mɔ yɛamaa bɛazukoa mɔɔ ye Edwɛkɛ ne kilehile la.​—1 Kɔlentema 3:6-9.

•   Ɛlɔlɛ mɔɔ yɛlɛ yɛmaa yɛ gɔnwo mɔ la noko ka yɛ maa yɛka edwɛkɛ ne. (Mateyu 22:39) Saa yɛka ninyɛne mgbalɛ mɔɔ yɛzukoa la anwo edwɛkɛ yɛkile awie mɔ a, ɔmaa yɛ nye die.​—Gyima ne 20:35.