Gyihova Alasevolɛ fa Baebolo ngakyile di gyima. Noko saa aneɛ bie lɛ New World Translation of the Holy Scriptures ne a, yɛ nye die nwolɛ kpalɛ ɔluakɛ ɔfa Nyamenle duma ne ɔdi gyima, bɛhile ɔ bo kpalɛ yɛɛ nuhua la ɛkɛ.

•   Ɔfa Nyamenle duma ne ɔdi gyima. Menli mɔɔ yɛ Baebolo la anu dɔɔnwo ɛnli ye kɛlɛvolɛ ne eni. Kɛ neazo la, wɔ Baebolo bie anu, bɛhɛlɛle menli mɔɔ bo 70 mɔɔ bɛboale bɛmaanle bɛyɛle nwolɛ gyima la aluma wɔ Baebolo ne anu. Noko bɛye Baebolo ne Kɛlɛvolɛ​—Gyihova Nyamenle ne duma bɛvi nuhua bɔkɔɔ!

   Noko New World Translation ne ɛnle zɔ, ɔfa Nyamenle duma ne ɔwula ɛleka biala mɔɔ ɛnee ɔfinde wɔ aneɛ mɔɔ bɛlimoale bɛvale bɛhɛlɛle Baebolo ne la anu, yɛɛ bɛangile menli mɔɔ yɛle nwolɛ gyima la.

•   Bɛhile ɔ bo kpalɛ. Tɛ Baebolo ngakyile ne mɔ amuala a kile edwɛkɛ mɔɔ wɔ aneɛ mɔɔ bɛlimoale bɛvale bɛhɛlɛle Baebolo ne la abo kpalɛ a. Kɛ neazo la, Baebolo bie mɔ hilele Mateyu 7:​13 abo kɛ: “Bɛva anuhɔlɛ ɛdenraa ne anu bɛwolo, ɔluakɛ anuhɔlɛ kpolomgbolo ne kɔ abɔnsam sua zo [anzɛɛ hɛɛle] yɛɛ ye adenle ne anu ɛvalɛ ɛnyɛ se.” Noko wɔ aneɛ mɔɔ bɛlimoale bɛvale bɛhɛlɛle Baebolo ne la anu, bɛvale edwɛkɛkpɔkɛ “ɛzɛkyelɛ” a bɛlile gyima a na tɛ “abɔnsam sua zo” anzɛɛ hɛɛle ɔ. Bie a edwɛbohilelɛma ne vale edwɛkɛ “abɔnsam sua zo” anzɛɛ hɛɛle wulale nuhua ɔluakɛ bɛdie bɛdi kɛ bɛbayɛ ɛtanema amumuyɛ dahuu wɔ ɛkɛ. Noko zɔhane adwenle ne ɛngyi Baebolo ne azo. Yemɔti New World Translation ne hanle ye kpalɛ kɛ: “Bɛva anlenkɛ ekyi ne anu, ɔluakɛ anlenkɛ kpole ne nee adenle tɛtɛlɛ ne kɔ ɛzɛkyelɛ nu.”

•   Nuhua la ɛkɛ. Ɔwɔ kɛ Baebolo mɔɔ bɛhile ɔ bo kpalɛ la anu da ɛkɛ na bɛte ɔ bo. Suzu neazo bie anwo. Ɛzoanvolɛ Pɔɔlo vale edwɛkɛ bie mɔɔ kile “bɛmaa sunsum ne mɔɔ ɛlɛwu la” lile gyima wɔ Wulomuma 12:11. Kɛmɔ ɛkile edwɛkɛ ɛhye abo ɛkɔ Nrelenza nu kɛkala a ndelebɛbo biala ɛnle nu la ati, New World Translation ne ka ngyɛnu ɛhye wɔ adenle mɔɔ nuhua la ɛkɛ la azo. Ɔse, ɔwɔ kɛ Kilisienema bɔ “mɔdenle wɔ sunsum nu.”

 Saa ɛye Nyamenle duma mɔɔ New World Translation ne fa di gyima, kɛzi bɛhile ɔ bo kpalɛ nee kɛzi nuhua la ɛkɛ la ɛsie ahane a, debie bieko wɔ nwolɛ mɔɔ maa ɔyɛ ngakyile a: Bɛndɔne ye. Ɔlua ɛhye ati, menli dɔɔnwo mɔɔ bie a anrɛɛ bɛnrɛhola Baebolo ne bie tɔ bɔbɔ la kola kenga bie wɔ bɛ sua zo aneɛ nu.