Baebolo ne a le debie titili mɔɔ yɛ diedi ne gyi zo a, yemɔti wɔ mekɛ mɔɔ yɛ ndelebɛbo mɔɔ yɛlɛ wɔ Ngɛlɛlera bie anwo anu bala ɛkɛ la, yɛyɛ nzenzaleɛ amaa ɔ nee ye ayɛ ko. a

 Zɛhae nzenzaleɛ ne nee Baebolo ngyinlazo mɔɔ wɔ Mrɛlɛbulɛ 4:​18 la le ko. Ɔka kɛ: “Tenlenema adenle nu le wienyi kɛ nwonlomɔ sɛnzɛne mɔɔ kɛkpuke la, ɔfi, ɔta toonwo ɔyɛ kɛ sɛnzɛngyinla ewia.” Kɛ mɔɔ sɛnzɛne ne finde a ɔta ngyikyingyikyi kɔkpula kɛ ɔbavinde bɔkɔɔ la, zɔhane ala a Nyamenle fa nɔhalɛ ne anwo ndelebɛbo ne maa ngyikyingyikyi wɔ ye mekɛ nloa a. (1 Pita 1:10-12) Kɛ mɔɔ bɛhanle ye wɔ Baebolo ne anu la, yemaa nɔhalɛ ne anwo ndelebɛbo ɛyɛ kpole wɔ “awieleɛ mekɛ” ne anu.​—Daneɛle 12:4.

 Ɔnle kɛ ndelebɛbo fofolɛ ɛhye mɔ yɛnyia ye la yɛ yɛ ɛzulolɛ anzɛɛ gyegye yɛ. Wɔ tete ne bɔbɔ, ɛnee ɔwɔ kɛ Nyamenle azonvolɛ bie mɔ yɛ nzenzaleɛ wɔ bɛ ndelebɛbo wɔ ninyɛne bie mɔ anwo.

•   Kolaa na Nyamenle akpa awie mɔɔ balie Yizilayɛma wɔ ɛvolɛ 40 anu la, Mosisi pelele ɔ nwo kɛ ɔdie Yizilayɛma.​—Gyima ne 7:23-25, 30, 35.

•   Ɛzoanvolɛma ne ande ngapezo mɔɔ fale Mɛzaya ne ewule nee ye ewudwazo ne anwo la abo.​—Ayezaya 53:8-12; Mateyu 16:21-23.

•   Alimoa Kilisienema bie mɔ nyianle adwenle ngakyile wɔ “Awulae Kenle” ne mɔɔ bara la anwo.​—2 Tɛsalonaekama 2:1, 2.

 Nzinlii, Nyamenle denrɛle bɛ adwenle ne na yɛ nzɛlɛlɛ a le kɛ ɔbayɛ zɔhane yeamaa yɛ.​—Gyemise 1:5.