Kyɛkyɛ. Gyihova Alasevolɛ die di kɛ Nyamenle a bɔle ninyɛne kɔsɔɔti a. Noko yɛnlie yɛndo nu kɛ ɔvale kenle nsia mɔɔ ko biala le dɔnehwele 24 la a ɔbɔle azɛlɛ ne a. Duzu ati ɔ? Ɔluakɛ adwenle mɔɔ menli mɔɔ die edwɛkɛ ɛhye di lɛ la anu dɔɔnwo nee mɔɔ Baebolo ne ka la ɛnyia. Nea neazo nwiɔ ɛhye:

1.   Ninyɛnebɔlɛ kenle nsia ne tendenle. Menli bie mɔ die di kɛ kenle nsia ne ko biala le dɔnehwele 24. Noko edwɛkɛkpɔkɛ “kenle” mɔɔ bɛva bɛli gyima wɔ Baebolo ne anu la kola kile mekɛ tendenle.​—Mɔlebɛbo 2:4, New World Translation; Edwɛndolɛ 90:4.

2.   Ɛvolɛ mɔɔ azɛlɛ ne ɛli. Menli bie mɔ kilehile kɛ azɛlɛ ne ɛtɛkyɛle dɔɔnwo biala. Noko Baebolo ne kile kɛ ɛnee azɛlɛ ne nee anwuma wɔ ɛkɛ kolaa na bɛabɔ ninyɛne wɔ kenle nsia ne anu. (Mɔlebɛbo 1:1) Ɔlua ɛhye ati, Gyihova Alasevolɛ die daselɛ mɔɔ abɔdeɛ nwo nrɛlɛbɛvoma di kɛ azɛlɛ ne ɛli ɛvolɛ mgbe mgbe dɔɔnwo la to nu.

 Gyihova Alasevolɛ die di kɛ Nyamenle a bɔle debie biala a, noko ɛhye ɛngile kɛ yɛkpo edwɛkɛ biala mɔɔ abɔdeɛ nwo nrɛlɛbɛvoma ka la. Yɛdie yɛdi kɛ mɔɔ Baebolo ne ka la nee abɔdeɛ nwo nrɛlɛbɛ edwɛkɛ mɔɔ le nɔhalɛ la le ko.