Wɔ Folɛ, October 5, 2013, tievolɛma 257,294, mɔɔ wɔ maanle 21 anu la hɔle Watch Tower Bible and Tract Society of Pennsylvania ɛvolɛ ayia mɔɔ tɔ zo 129 la bie anzɛɛ luale Intanɛte zo nleanle ye video. Nzinlii, bɛyele gyimalilɛ ne bɛmanle Alasevolɛ fofolɛ noko nleanle. Bɛnyianle tievolɛma dodo 1,413,676 wɔ maanle 31 anu. Ɛvolɛ ɛhye ayia ne a yɛle Gyihova Alasevolɛ ayia kpole kpalɛ a, ɔdɛlale menli 1,327,704 mɔɔ nleanle gyimalilɛ titile bie mɔɔ bɛyɛle ye wɔ Mexico nee America Avinli maanle ne mɔ anu wɔ April 28, 2013 la ɛdeɛ ne.

Ɔvi 1920 ne anu, Gyihova Alasevolɛ ɛlua telefuu nee riledio zo ɛbɔ bɛ nyianu ngakyile nolo ɛhile menli mɔɔ wɔ maanle ngakyile zo la. Ɛnɛ, menli mɔɔ wɔ moa bɔbɔ la kola dua Intanɛte zo tie na bɛnea gyimalilɛ bie mɔɔ bɛlɛyɛ la anzɛɛ wɔ ɔ nzi mekɛ ekyi bie anu. William, Gyihova Dasevolɛ bie mɔɔ wɔ United States la, hɔle nyianu bie wɔ Richmond, mɔɔ wɔ Virginia la wɔ 1942 na ɔdiele gyimalilɛ ne wɔ telefuu zo. Mekɛ mɔɔ ɔlɛfa ye anwubielɛ ne yeado ɛvolɛ ɛhye ɛvolɛ ayia ne anwo la ɔhanle kɛ: “Saa ɛnwu mɔɔ ɛlɛkɔ zo la a ɛte ɔ bo kpalɛ. Nɔhalɛ nu, ɔboa kpalɛ.”

Gyihova Alasevolɛ ɔfese dɔɔnwo anu menli vale ɛvolɛ ko ne ɔ nzi yɛle video ne anwo gyima wɔ dɔnehwele dɔɔnwo anu. Dapɛne awieleɛ mɔɔ nuhua a bɛbaye video ne la, menli mɔɔ nea zo wɔ ɛleka mɔɔ bɛhyehyɛ ye wɔ Brooklyn, New York la, vale mekɛ dɔɔnwo dɛnlanle nwolɛ ɔluakɛ bɛyele ye wɔ ɛleka 15 mɔɔ asolo bɛ mekɛ ne la. Ryan, mɔɔ boale manle bɛyɛle gyimalilɛ ne anwo ngyehyɛleɛ na bɛnleanle zolɛ la hanle kɛ, “Ɛnee yɛnla, noko kɛmɔ yɛze kɛ gyimalilɛ ne baboa menli dɔɔnwo la ati, yeangyegye yɛ.”