Geleade Sukulu Ne Ɛnyia Ɛvolɛ Abulasuu
Wɔ February 1, 1943, bɛdele sukulu titile bie wɔ New York maanzinli ne sɔlɔ. Bɛlua sukulu ɛhye mɔɔ bɛfɛlɛ ye Ɛzinzalɛ Arane Geleade Baebolo Sukulu la azo bɛtete mediema mɔɔ bɛbo 8,000 mɔɔ bɛvi ewiade amuala la.
Anwuma: Geleade Sukulu ne anuhɔlɛ wɔ South Lansing, New York. Aze: Geleade kilehilevolɛ ɛlɛtendɛ ahile sukuluma mɔɔ bɛtɔ zo 31 la wɔ nwɔhoalilɛleka
Jonathan mɔɔ wiele Geleade sukulu ne kenlensa ye ala la ka kɛ: “Ndetelɛ mɔɔ ɔgyi Nyamenle Edwɛkɛ ne azo mɔɔ yɛnyianle la, baboa yɛ yeamaa yɛaha edwɛkɛ ne kpalɛ wɔ azɛlɛsinli nee aneɛ biala anu.” Ɔ ye Marnie vale zɔle zo kɛ: “Yemaa menyia ɛhulolɛ kpole kɛ meboa menli meamaa bɛanwu kɛ debie kpalɛ biala ɛnle ɛkɛ ɛndɛla mɔɔ yɛ Bɔvolɛ ne bayɛ amaa yɛ la. Menwu ye kɛ awie mɔ mɔɔ yɛboa bɛ yɛamaa bɛanwu Gyihova la bamaa bɛakpazi wɔ ɛbɛlabɔlɛ nu.”Bɛkɔ Geleade sukulu ne siane nnu mɔɔ bɛndua ezukoa biala a. Bɛsukoa Baebolo ne nee kɛzi bɛbaha edwɛkpa ne la titile. Sukulu ne bodane a le kɛ ɔboa sukoavoma ne sunsum nu na bɛdabɛ noko bɛaboa Nyamenle azonvolɛ mɔɔ ɛha la bamaa bɛahola bɛagyinla ngyegyelɛ nloa. Sukoavoma ne nyia mekɛ suzu Baebolo ngyinlazo mɔɔ baboa bɛ yeamaa bɛ nee Gyihova Nyamenle agɔnwolɛvalɛ ne anu amia la anwo.
Agyalɛma mɔɔ bɛkɔ Geleade sukulu ne la amuala le dahuu azonvolɛ. Saa bɛwie a, bɛmaa bie mɔ sia kɔtoa bɛ gyimalilɛ zo na bie mɔ kɔ maanle fofolɛ zo. Bɛmaa bie mɔ kɔyɛ gyima wɔ Gyihova Alasevolɛ ɔfese mɔɔ bo 90 la anu ko anu. Bɛmaa dɔɔnwo kɔyɛ gyima wɔ ɛleka mɔɔ menli dɔɔnwo wɔ mɔɔ edwɛkɛhanlɛ gyima ne bazo ma dɔɔnwo la.
Anwuma: Albert Schroeder ɛlɛfa ndanlɛsua ne neazo ahile Geleade sukuluma ne debie wɔ 1958. Aze: Ulysses Glass ɛlɛkile Geleade sukuluma mɔɔ bɛtɔ zo 46 la debie wɔ 1968
Bɛlumuale bɛyɛle Geleade Sukulu ne wɔ Kingdom Farm mɔɔ wɔ South Lansing, New York la. Wɔ 1961, bɛyele sukulu ne bɛhɔle ewiade amuala gyima ne ati wɔ Brooklyn, New York. Ɔvi 1988 kɔdwu 1995, bɛyɛle sukulu ne wɔ Watchtower Farms wɔ Wallkill, New York. Akee wɔ 1995, bɛyele sukulu ne bɛrale ɛleka mɔɔ ɔwɔ ye kɛkala la, Watchtower Educational Center, Patterson, New York. Sukuluma mɔɔ bɛtɔ zo 134 la wiele wɔ March 2013.
Anwuma: Geleade sukuluma mɔɔ tɔ zo 116 la ɛlɛsukoa debie wɔ bɛ sukulu sua ne anu wɔ 2003. Aze: Geleade sukuluma ɛlɛsukoa debie wɔ mbuluku ɛzielɛ ɛleka ne wɔ 2011
Ɛvolɛ 70 mɔɔ ɛpɛ nu la, sukuluma mɔɔ ɛwie Ɛzinzalɛ Arane Geleade Baebolo Sukulu ne la, ɛva nɔhalɛlilɛ ɛli Gyihova anwo daselɛ kɛnlɛma kpalɛ.
Bie A Eza Ɛ Nye Balie
DOCUMENTARIES
Bɛhɔ Azɛlɛ Ye Ɛleka Biala
Ɛzinzalɛ Arane Geleade Baebolo Sukulu ne si kɛzi nolobɔlɛ gyima ne anwo hyia la azo. Tie edwɛkpatɛlɛvolɛma mɔɔ ɛhɔ sukulu titile ɛhye bie la anwubielɛ.