Wɔ November 2011 anu, Gyihova Alasevolɛ ekpunli bie bɔle ɔ bo kɛ bɛdua ndenle fofolɛ zo bamaa menli mɔɔ wɔ Manhattan la ade Baebolo ne anu edwɛkɛ ne ɔlua ɛkponle nee ehwili ngɛnlɛma mɔɔ bɛfa mbuluku bɛgua zo la azo. Bɛlɛbɔ nolo ɛhye wɔ Manhattan nyiakɛ, mɔɔ wɔ New York City, maanzinli bie mɔɔ alagye fee ɛnle ɛkɛ la azo.

Bɛhyɛle maanzinli ne anu nna. Maanzinli ko biala lɛ ɛleka dɔɔnwo mɔɔ menli mɔɔ se ɛkɛ la kola gyinla ɛkponle anzɛɛ ehwili mɔɔ Baebolo nwo mbuluku dɔɔnwo gua zo na adekpakyelɛnli gyi nwo la anwo. Ɛbahola wɔanwu ninyɛne mɔɔ bɛziezie mɔɔ bɛlɛfa bɛabɔ nolobɔlɛ ɛhye la wɔ ɛleka dɔɔnwo anzɛɛ ɛleka mɔɔ bikye kale agyinlaleɛ mɔɔ menli dɔɔnwo se ɛkɛ kenle ko biala la.

Wɔ ɛleka ɛhye mɔ, menli kola sukoa Baebolo kpuyia nwo mualɛ dɔɔnwo. Menli mɔɔ ɛngulo kɛ gyinla ɛkɛ ne kyɛ la kola fa mbuluku ne bie na nzinlii bɛagenga.

Bɛyɛ mbuluku dɔɔnwo wɔ aneɛ ngakyile nu. Saa awie annyia buluku wɔ aneɛ mɔɔ ɔkulo la anu a, bɛkɛla bie na nzinlii ɔbadie.

Maanlema nee arane mgbanyima ɛlie adenle fofolɛ ɛhye ɛdo nu. Kpolisi kpanyinli ko hanle kɛ: “Duzu ati a bɛmaa yehyɛ a? Amgba bɛlɛ debie mɔɔ menli hyia nwolɛ la.”

Nrenya ko gyinlanle arɛlevilɛ nu wɔ mekɛ mɔɔ ɔnwunle Duzu A Baebolo ne Kilehile Amgba A? buluku ne la. Ɔhanle kɛ ɔnwunle menli bie kɛ bɛlua azɛlɛ bo keteke adenle ne anu kɛ bɛlɛkenga buluku ne, na ɛnee ɔnze ɛleka mɔɔ bɛnyianle ye la. Kɛkala yenwu ye.

Ɛnee kpavolɛ bie se ɛkponle ne mɔ ko anwo kɔ gyima toonwo dapɛne nsia. Awieleɛ kolaa ne, ɔgyinlanle na ɔhanle kɛ, “Mehyia moalɛ.” Ɛnee bɛdabɛ mɔɔ bɛgyi ɛkponle ne anwo la anye die kɛ bɛbaboa ye. Bɛmanle ye Baebolo na bɛhilele ye kɛzi ɔbaboa ye la.

Menli mɔɔ se ɛkɛ la gyinla kɛ yɛ nee bɛ ɛzuzu Baebolo ne anwo. Wɔ kenlensa ye siane bie anu, adenle fofolɛ mɔɔ bɛluale zo la manle menli mɔɔ wɔ Manhattan la nyianle magazine 3,797 yɛɛ mbuluku 7,986.