Wɔ July 2011 mɔlebɛbo, bɛbɔle ɔ bo kɛ bɛyɛ Ɛzinzalɛ Arane mɔɔ ɔ bo ɛdelɛ ɛnyɛ se na bɛazɔ bɛanlea wɔ ɛvolɛ ko anu. Kɛkala bɛzɔ bɛnlea bɛwie, na bɛzi kpɔkɛ kɛ bɛkɔ zo bɛayɛ ye dahuu.

Ɔbɔ ye wɔ January 2013 mɔɔ ba la, bɛbayɛ bie noko wɔ Fenlanze, Portugal nee Spain aneɛ nu.

Bɛyɛle Ɛzinzalɛ Arane ne Nrelenza mɔɔ ɔ bo ɛdelɛ ɛnyɛ se la kɛ bɛfa bɛaboa menli mɔɔ yɛ bɛ debiezukoalɛ ne wɔ Nrelenza aneɛ nu noko ɔnle bɛ sua zo aneɛ la.

Bɛhɛlɛ kɛlata bɛhile anyezɔlɛ wɔ mɔɔ bɛlumuale bɛyɛle la anwo. Kɛlata ne ko vi Rebecca mɔɔ ɛli ɛvolɛ 64, mɔɔ ɔvi Liberia na ɔtɛkɔle sukulu ɛlɛ la ɛkɛ. Ɔhɛlɛle kɛ: “Melɛsukoa ɛgengalɛ. Ɔyɛ a, mekenga Ɛzinzalɛ Arane ne, noko mende ɔ bo. Mekulo mɔɔ ɔ bo ɛdelɛ ɛnyɛ se la. Yemɔ mete ɔ bo.”

Awovolɛ dɔɔnwo fa Ɛzinzalɛ Arane ɛhye mɔɔ ɔ bo ɛdelɛ ɛnyɛ se la boa bɛ mra maa bɛsiezie bɛ nwo bɛmaa Ɛzinzalɛ Arane debiezukoalɛ, mɔɔ ɔboka Gyihova Alasevolɛ ayia ne mɔ anwo la.

Rosemary, mɔɔ ɛlɛtete nlɔnra mraalɛ nsa la kɛlɛ kɛ: “Saa me nee ngakula ne mɔ ɛlɛsukoa Ɛzinzalɛ Arane ne a yɛyia ngyegyelɛ dɔɔnwo. Yɛfa edwɛbohilelɛ buluku yɛto nwo amaa yɛade edwɛkɛ kpɔkɛ ko biala abo. Ɛnee yɛsɛkye mekɛ dɔɔnwo amaa yɛade nuhua edwɛkɛ bie mɔ abo yemɔti ɔyɛ a ngakula ne mɔ ɛnde edwɛkɛ titile mɔɔ wɔ nu la abo. Kɛkala, yɛfa yɛ mekɛ ne yɛkenga ngɛlɛlera ne nee kɛzi ɔfane ɛzukoalɛdeɛ mɔɔ wɔ nu la anwo.”