Bɛyɛ Ɛzinzalɛ Arane ne dɔɔnwo kpalɛ bɛdɛla magazine biala wɔ ewiade amuala. Bɛpelente ko biala mgbe 42. Mɔɔ tɔ zo nwiɔ la a le Awake! ne mɔɔ bɛyɛ ko biala mgbe 41 la. Gyihova Alasevolɛ a yɛ magazine nwiɔ ɛhye mɔ a, na bɛfa bɛmaa wɔ azɛlɛ 236 azo.

Kɛzi yɛbava yɛado mbuluku gyɛne nwo ɛ? Kɛmɔ Association of Magazine Media kile la, AARP ahyehyɛdeɛ bie mɔɔ ka menli mɔɔ bɛbo ɛvolɛ 50 mɔɔ kɔ la anwo edwɛkɛ la a le U.S magazine mɔɔ bɛtɔ ye kpalɛ a. Bɛyɛ magazine ɛhye mɔɔ bo mgbe 22.4. Saa bɛkyehyɛ nu a, Germany ADAC Motorwelt ne yɛ mɔɔ badwu mgbe 14, yɛɛ Chinama Gushi Hui (adwelie) kɛlata ne pelente mgbe 5.4.

Japanma Yomiuri Shimbun a le adwelie kɛlata mɔɔ bɛyɛ ye dɔɔnwo kpalɛ a. Dahuu bɛpelente mɔɔ bo mgbe bulu la.

Alasevolɛ ne mɔ noko bɔ mɔdenle kpalɛ wɔ bɛ mbuluku ne mɔ abohilelɛ nu. Bɛkile Ɛzinzalɛ Arane ne abo bɛkɔ aneɛ mɔɔ bo 190, yɛɛ Awake! ne noko wɔ aneɛ mɔɔ bo 80 la anu. Saa yɛfa yɛtoto Reader’s Digest ne anwo a, yemɔ bɛyɛ ye wɔ aneɛ 21 anu, noko asolo kɛzi nuhua edwɛkɛ ne de wɔ maanle biala anu la.

Bɛdua ndoboa mɔɔ bɛfi ahonle nu bɛye la azo a bɛbɔ Ɛzinzalɛ Arane nee Awake! anwo kakɛ a, bɛmbɔ ye nolo, yɛɛ bɛndɔne ye, ɔnle kɛ magazine gyɛne mɔɔ yɛha bɛ nwo edwɛkɛ la.

Ɛzinzalɛ Arane ne bodane a le kɛ ɔkilehile Baebolo ne anu​—titile mɔɔ Ngɛlɛlera ne ka ye wɔ Nyamenle Belemgbunlililɛ ne anwo la. Bɛhɔ zo bɛyɛ ɛhye ɔvi 1879 mɔɔ ba la. Awake! ka ninyɛne dɔɔnwo mɔɔ bie a le abɔdeɛ nee abɔdeɛ nwo nrɛlɛbɛ nwo edwɛkɛ mɔɔ maa yɛnyia diedi wɔ Bɔvolɛ ne anu la. Eza ɔsi kɛzi Baebolo ne baboa yɛ wɔ yɛ ɛbɛlabɔlɛ nu la azo.