Bɛyele Me Buluku Mɔɔ Ɔka Baebolo nu Edwɛkɛ wɔ Pangasinan aneɛ nu wɔ 2012, na ɔlɛboa sukulu ngakula mɔɔ bɛwɔ Philippines mɔɔ bɛka aneɛ zɔhane la. Philippines Department of Education ne hanle kɛ bɛva ngakula ne mɔ sua zo aneɛ bɛhile bɛ debie wɔ mɔlebɛbo sukulu nu, yemɔti buluku ne ɛlɛboa kpalɛ.

Bɛka aneɛ mɔɔ bo 100 la wɔ Philippines, yemɔti wɔ mekɛ tendenle anu bɛnnwu aneɛ holɛ ko mɔɔ ɔwɔ kɛ bɛfa bɛkile debie wɔ sukulu a. Wɔ 2012, Department of Education ne hanle kɛ saa bɛfa “aneɛ mɔɔ bɛka wɔ sua nu” la bɛkile debie a, ɔmaa ngakula “nwu debie ndɛndɛ kpalɛ.” Ɛhye ati bɛyɛle ngyehyɛleɛ kɛ bɛva bɛ sua zo aneɛ ngakyile ne mɔ bɛhile debie wɔ sukulu.

Bɛkpale Pangasinan bɛbokale aneɛ mɔɔ ɔwɔ kɛ bɛfa bɛkile debie wɔ sukulu la anwo. Noko ɛnee bɛlɛ ngyegyelɛ. Sukulu kpanyinli ko hanle kɛ Pangasinan mbuluku mɔɔ ngakula ne mɔ bɛagenga la anzo. Ɛhye ati ɔmanle Me Buluku Mɔɔ Ɔka Baebolo nu Edwɛkɛ mɔɔ bɛyele ye wɔ Pangasinan aneɛ nu wɔ Gyihova Alasevolɛ maanzinli nyianu bo wɔ November 2012 la rale mekɛ kpalɛ nu.

Bɛyɛle buluku ne kɛyɛ 10,000 na bɛhyɛle ye wɔ nyianu ne abo. Ngakula ngyikyi nee bɛ awovolɛ anye liele kɛ bɛnyia buluku wɔ bɛ sua zo aneɛ nu la. Agyalɛma bie hanle kɛ: “Yɛ mra ne mɔ anye die buluku ne anwo ɔluakɛ bɛte ɔbo kpalɛ.”

Bɛwiele nyianu ne la, Alasevolɛ bie mɔ vale bɛ Baebolo nu Edwɛkɛ mbuluku ne mɔ hɔle sukulu bie mɔɔ wɔ Dagupan City azo la. Kilehilevolɛma mɔɔ wɔ ɛkɛ ne mɔɔ ɛnee bɛlɛbɔ mɔdenle kɛ bɛbanyia mbuluku wɔ Pangasinan aneɛ nu la anye liele buluku ne anwo. Bɛhyɛle mbuluku mɔɔ bo 340. Ɛkɛ ne ala kilehilevolɛma ne bɔle ɔ bo kɛ bɛfa buluku ne bɛahile ngakula ne mɔ bɛ sua zo aneɛ ne ɛgengalɛ.

Gyihova Alasevolɛ anye die kɛ bɛlɛfa buluku ɛhye bɛahile ngakula ngyikyi debie wɔ sukulu la. Menli mɔɔ hilele Me Buluku Mɔɔ Ɔka Baebolo nu Edwɛkɛ ne abo la anu ko hanle kɛ: “Yɛnwunle ye mekɛ tendenle kɛ nvasoɛ wɔ zo kɛ yɛbava menli ne sua zo aneɛ yɛahɛlɛ buluku amaa yeaha bɛ ahonle. Ɛhye ati a Alasevolɛ ne mɔ ɛlɛbɔ mɔdenle kɛ bɛbahile Baebolo ne nee Baebolo mbuluku bo wɔ aneɛ dɔɔnwo anu la.”