Ɛfɛsɛsema 2:1-22
2 Bieko, Nyamenle maanle bɛrale ngoane nu, wɔ mekɛ mɔɔ bɛwule wɔ bɛ mɛladonlɛ nee bɛ ɛtane ne mɔ anu la,
2 nuhua a mekɛ bie bɛluale kɛ mɔɔ ewiade ɛhye ɛbɛla ne de, kɛ mɔɔ anwoma ne mɔɔ ɛlɛbɔ la tumivolɛ ne de la, ɛhye a le sunsum ne mɔɔ kɛkala yɛ gyima wɔ anzosesebɛ mralɛ nu la.
3 Ɛhɛe, bɛ nuhua a mekɛ bie yɛ muala yɛbɔle yɛ ɛbɛla kɛ mɔɔ yɛ nwonane nu atiakunluwɔzo ne de la, yɛyɛle mɔɔ yɛ sonlabaka ne nee yɛ nzuzulɛ kulo la, na bɛkawo yɛ la, ɛnee yɛle mralɛ mɔɔ Nyamenle ɛya ne wɔ yɛ nwo zo kɛ bɛdabɛ mɔɔ bɛha la.
4 Noko Nyamenle anwunvɔnezelɛ ne zonle, na kɛmɔ ɔlɛ ɛlɔlɛ kpole ɔmaa yɛ la ati,
5 yeva yɛ yeboka Kelaese anwo yemaa yɛ ngoane, wɔ mekɛ mɔɔ ɛnee yɛwu wɔ ɛtane nu bɔbɔ la—bɛlua ɛlolɛ zo bɛlie bɛ ngoane.
6 Bieko, yedwazo yɛ nee Kelaese na yemaa yɛbɔ nu yɛdɛnla anwuma wɔ Kelaese Gyisɛse anu,
7 amaa wɔ ewiade* ne mɔɔ ɛlɛba la anu, yeala ye ɛlolɛ kpole ne mɔɔ bo zo la ali wɔ ye kpalɛyɛlɛ nu yeahile yɛ wɔ Kelaese Gyisɛse anu.
8 Ɛlolɛ ɛhye a ɛmaa bɛlua diedi zo bɛlie bɛ ngoane a, na ɛhye ɛnvi bɛ; emomu, ɔle Nyamenle ahyɛlɛdeɛ.
9 Kyɛkyɛ, ɔnvi gyimayɛlɛ nu, amaa awie biala andu ɔ nwo wɔ nwolɛ.
10 Yɛle Nyamenle asa anloa gyima, na ɔbɔle yɛ wɔ Kelaese Gyisɛse anu ɔmaanle gyima kpalɛ mɔɔ Nyamenle hyehyɛle dole ɛkɛ ne kɛ yɛlua nu la.
11 Yemɔti bɛhakye kɛ mekɛ bie ɛnee bɛle maanle maanle ne anu amra, na bɛdabɛ mɔɔ “menli pɛle bɛ mrenyia zo” la vɛlɛle bɛ “menli mɔɔ bɛtɛpɛle bɛ mrenyia zo.”
12 Zɔhane mekɛ ne ɛnee bɛnze Kelaese, ɛnee bɛmboka Yizilayɛ maanle ne anwo, ɛnee bɛle ngyekyeleɛ ne nee ɛwɔkɛ ne mɔ anwo nyɛvolɛ; ɛnee bɛnlɛ anyelazo biala yɛɛ bɛnze Nyamenle wɔ ewiade.
13 Noko wɔ Kelaese Gyisɛse anu, bɛmɛ mɔɔ ɛnee bɛnze Nyamenle la ɛlua Kelaese mogya ne azo ɛbikye ye.
14 Na yemaa yɛ anzodwolɛ, ahenle mɔɔ ɛha ekpunli nwiɔ ne amuala ɛbɔ nu yeyɛ ye ko na yezɛkye bane ne mɔɔ gya bɛ ɛweɛne la.
15 Yelua ye sonlabaka ne azo yeye kpɔvolɛ ne, Mɛla ne nee nwolɛ ngyehyɛleɛ ne mɔ yevi ɛkɛ, amaa yeaha ekpunli nwiɔ ne amuala yeabɔ nu wɔ ye nu yeayɛ ye sonla fofolɛ na anzodwolɛ ara,
16 na yelua ye amaneɛnwunlɛ baka* ne azo yeha ekpunli nwiɔ ne yebɔ nu bɔkɔɔ wɔ sonlabaka ko anu yemaa Nyamenle, ɔluakɛ ɔluale ye sonlabaka ne azo ɔyele ɛkpɔlɛ ne.
17 Na ɔrabɔle anzodwolɛ edwɛkpa ne nolo ɔhilele bɛdabɛ mɔɔ bɛnze Nyamenle la, yɛɛ anzodwolɛ nolo ɔhilele bɛdabɛ mɔɔ bɛze ye la,
18 ɔluakɛ yɛdayɛ ekpunli nwiɔ ne amuala, yɛkola yɛdua sunsum ko ne ala azo yɛkɔ Selɛ ne ɛkɛ.
19 Yemɔti bɛnle nyɛvolɛ anzɛɛ maanle gyɛne zo amra bieko, bɛ nee nwuanzanwuanzama ne mɔ amuala vi maanle ko anu, bɛle Nyamenle sua nu amra,
20 na bɛzi bɛ kɛ sua la bɛzie adiabo ne mɔɔ ɛzoanvolɛma nee ngapezoma ne mɔ wulale la azo, na Kelaese Gyisɛse mumua ne a le adiabo bolɛ ne mɔɔ anwo hyia la.
21 Ye nuhua a bɛmaa sua ne ɛdoɔdoa zo pɛpɛɛpɛ a, ɔlɛkpogya yeayɛ ɛzonlenlɛ sua nwuanzanwuanza yeamaa Gyihova.*
22 Wɔ Kelaese anu, bɛlɛsi bɛdabɛ noko bɛaboka awie mɔ anwo bɛayɛ ye ɛleka mɔɔ Nyamenle badɛnla wɔ sunsum nu a.
