Ɛfɛsɛsema 3:1-21
3 Ɛhye ati, medame Pɔɔlo mɔɔ Kelaese Gyisɛse ati meyɛ pilizanli memaa bɛmɛ maanle maanle ne anu amra—
2 nɔhalɛ nu, bɛde Nyamenle ɛlolɛ nwo gyima mɔɔ bɛdabɛ ti yeva yemaa me la,
3 kɛ yeye fealeranu edwɛkɛ nwuanzanwuanza ne yehile me, kɛ mɔɔ melimoa mehɛlɛ nwolɛ edwɛkɛ sikalɛ la.
4 Ɔti saa bɛkenga ɛhye a, bɛbanwu Kelaese anwo fealeranu edwɛkɛ nwuanzanwuanza ne anwo ndelebɛbo mɔɔ melɛ la.
5 Wɔ awolɛndoazo mɔɔ ɛze ɛhɔ la anu, bɛammaa menli annwu fealeranu edwɛkɛ ɛhye kɛ mɔɔ kɛkala bɛlua sunsum ne azo bɛye bɛhile ye ɛzoanvolɛma nee ngapezoma nwuanzanwuanza ne mɔ,
6 kɛ ɔwɔ kɛ maanle maanle ne anu amra dua edwɛkpa ne azo bɛ nee yɛ bɔ nu yɛ koliagyama na yɛyɛ sonlabaka ko mɔɔ yɛbanyia ɛwɔkɛ ne wɔ Kelaese Gyisɛse anu a.
7 Menyɛle ɛhye anwo sonvolɛ kɛ mɔɔ Nyamenle ɛlolɛ ahyɛlɛdeɛ ne mɔɔ ɔvale ɔmaanle me ɔlua ye tumi ne gyimalilɛ zo de la.
8 Medame, mɔɔ mendwu nwuanzanwuanzama ne anu mɔɔ le ekyi bɔbɔ la, bɛva ɛlolɛ ɛhye bɛmaa me, amaa meabɔ Kelaese anwonyia ne mɔɔ ɛnlɛ ɔ nloa la anwo edwɛkpa ne nolo meahile maanle maanle ne
9 na meamaa awie biala anwu fealeranu edwɛkɛ nwuanzanwuanza ne anwo gyimalilɛ mɔɔ bɛva bɛvea mekɛ tendenle wɔ Nyamenle mɔɔ bɔle debie biala anu la.
10 Ɛhye rale ye zɔ, amaa bɛalua asafo ne azo bɛamaa anwuma tumivolɛma nee mgbolema anwu Nyamenle nrɛlɛbɛ kpole ne.
11 Kɛ mɔɔ ye dahuu bodane ne mɔɔ ɔluale yɛ Awulae, Gyisɛse Kelaese anwo zo ɔlile nwolɛ gyima de la,
12 yemɔ a yɛdua ɔ nwo zo yɛtendɛ akɛnrasesebɛ zo na diedi mɔɔ yɛlɛ ye wɔ ye nu la ati yɛkola yɛkɔ Nyamenle anyunlu a.
13 Yemɔti mesɛlɛ bɛ kɛ bɛmmamaa amaneɛ dɔɔnwo mɔɔ bɛdabɛ ti melɛnwu ye la bɔ bɛ rɛle, ɔluakɛ ɔle anyunlunyia ɔmaa bɛ.
14 Ɛhye ati mekoto Selɛ ne,
15 mɔɔ abusua biala mɔɔ wɔ anwuma nee azɛlɛ ye azo nyia ye duma fi ye ɛkɛ ne la anyunlu.
16 Meyɛ asɔne kɛ Nyamenle mɔɔ ɔlɛ anyunlunyia kpole la ɛlua ye sunsum ne azo ɛmaa bɛ anwosesebɛ ɔmaa bɛgyinla kpundii wɔ bɛ ahonle nee bɛ adwenle nu,
17 na Kelaese ɛlua bɛ diedi ne azo ɛdɛnla bɛ ahonle nu wɔ ɛlɔlɛ nu. Bɛsosɔ ndinli na bɛgyinla kpundii wɔ adiabo ne azo,
18 amaa bɛ nee nwuanzanwuanzama ne amuala ade ye tɛtɛlɛ nee ye tendenle nee ye anwumahɔlɛ nee kɛzi ye kuma ne de la abo kpalɛ,
19 na bɛanwu Kelaese ɛlɔlɛ ne mɔɔ bo adwenle biala azo la, amaa Nyamenle subane ne mɔ mɔɔ ɔfa ɔmaa la ayi bɛ tetɛkɛɛ.
20 Ahenle ne mɔɔ kola yɛ maa ɔtɛla mɔɔ yɛbiza nee mɔɔ yɛdwenle nwo, kɛ mɔɔ ye tumi ne mɔɔ yɛ gyima wɔ yɛ nu de la,
21 anyunlunyia ɛlua asafo ne nee Kelaese Gyisɛse anwo zo ɛha ye wɔ awolɛndoazo kɔsɔɔti anu dahuu. Amen.
