Ɛfɛsɛsema 4:1-32
4 Zɔhane ati, medame mɔɔ mele pilizanli wɔ Awulae anu la, mesɛlɛ bɛ kɛ bɛbɔ bɛ ɛbɛla bɛmaa ɔfɛta ɛvɛlɛlɛ ne mɔɔ bɛvɛlɛle bɛ la,
2 wɔ mɛlɛbɛnwoaze nee bɛtɛɛyɛlɛ muala anu, abotane nu, na bɛ nee bɛ gɔnwo mɔ ɛdɛnla wɔ ɛlɔlɛ nu,
3 bɛbɔ mɔdenle ɛsesebɛ bɛva anzodwolɛ mɔɔ ka bɛ bɔ nu la bɛdɛnla sunsum nu koyɛlɛ nu.
4 Sonlabaka ko a wɔ ɛkɛ a, yɛɛ sunsum ko, kɛ mɔɔ bɛvɛlɛle bɛ wɔ anyelazo ko anu la;
5 Awulae ko, diedi ko, ɛzɔnenlɛ ko;
6 Nyamenle kokye mɔɔ le menli kɔsɔɔti bɛ Ze, ɔnea bɛ muala bɛ nwo zo yɛɛ ɔdua bɛ muala bɛ nwo zo na ɔwɔ bɛ muala bɛ nu la.
7 Na bɛlo yɛ nuhua ko biala kɛ mɔɔ Kelaese ɛzuzu ahyɛlɛdeɛ ne ɛmaa yɛ la.
8 Ɔluakɛ ɔse: “Mekɛ mɔɔ ɔvole ɔhɔle anwuma la, ɔvale ngɛkɛlɛ ɔhɔle; na ɔvale menli ɔmaanle kɛ ahyɛlɛdeɛ.”
9 Saa ɔka kɛ “ɔvole ɔhɔle anwuma” a, ɔkile duzu? Ɔkile kɛ eza noko ɔdwule ɔrale aze, ɛhye kile, azɛlɛ ye azo.
10 Ahenle mɔɔ dwule la, ɔdaye ko ne ala a ɔvole ɔhɔle anwuma anzi lɔ kpalɛ a, na yeamaa ninyɛne kɔsɔɔti ara nu.
11 Na yeva bie mɔ yemaa kɛ ɛzoanvolɛma, bie mɔ ngapezoma, bie mɔ edwɛkpakavolɛma, bie mɔ neavolɛma, nee kilehilevolɛma,
12 amaa yeaziezie* nwuanzanwuanzama ne mɔ yeamaa bɛayɛ ɛzonlenlɛ gyima ne, na bɛamaa Kelaese sonlabaka ne ayɛ se,*
13 kɔkpula kɛ yɛ kɔsɔɔti yɛbayɛ ko wɔ diedi ne anu na yɛanyia Nyamenle Ara ne anwo nɔhalɛ ndelebɛbo, na yɛayɛ kɛ sonla mɔɔ ɛwie nyi na yeli munli kɛ mɔɔ Kelaese de la.
14 Yemɔti ɔnle kɛ yɛyɛ ngakula bieko, mɔɔ adalɛma fa bɛ ngilehilelɛ anwoma ne nee bɛ agyiba ne mɔ bɛlɛbɛla yɛ bɔ yɛ kɔ ba kɛ selɛkye la.
15 Emomu ɔwɔ kɛ yɛka nɔhalɛ na yɛda ɛlɔlɛ ali, amaa yɛanyi wɔ adenle biala anu yɛava yɛazukoa Kelaese mɔɔ le tile ne la.
16 Ye nuhua a sonlabaka ne amuala toɔdoa nu pɛpɛɛpɛ na bɛbɔ nu bɛyɛ gyima na nvɛyeba biala fa mɔɔ hyia la maa a. Saa nvɛyeba biala yɛ ye gyima kpalɛ a, ɔboa ɔmaa sonlabaka ne nyi na ɔyɛ se wɔ ɛlɔlɛ nu.
17 Yemɔti meka ɛhye meadu bɛ folɛ wɔ Awulae anyunlu kɛ, bɛmmabɔ bɛ ɛbɛla kɛ maanle maanle ne anu amra mɔɔ bɛndwenle adwenle kpalɛ* la bieko.
18 Bɛ adwenle nu le awozinli yɛɛ bɛhwe bɛ nwo bɛvi ngoane ne mɔɔ Nyamenle fa maa la anwo, ɔluakɛ bɛnze ɛhwee yɛɛ bɛ ahonle ɛsolo.*
19 Kɛmɔ nyiane ɛnle bɛ nye zo la ati, bɛbɔ anyiemgba ɛbɛla,* bɛyɛ evinli nyɛleɛ biala bie anyebolo zo.
20 Noko tɛ mɔɔ bɛzukoale ye wɔ Kelaese ɛkɛ ne la ɛne,
21 ɔluakɛ amgba bɛdele ye edwɛkɛ ne yɛɛ bɛluale ɔ nwo zo bɛhilehilele bɛ kɛ mɔɔ nɔhalɛ ne mɔɔ wɔ Gyisɛse anu de la.
22 Bɛhilehile bɛ kɛ bɛye subane dɛba ne mɔɔ nee bɛ alimoa ɛbɛlabɔlɛ ne le ko na ɔlɛsɛkye wɔ ye mɛlɛbɛla atiakunluwɔzo ne anu la bɛgua.
23 Na ɔwɔ kɛ bɛmaa bɛkɔ zo bɛyɛ bɛ fofolɛ wɔ tumi ne mɔɔ kile bɛ adwenle ne adenle la* anu,
24 na bɛva subane fofolɛ ne mɔɔ bɛbɔle ye wɔ Nyamenle ɛhulolɛ zo wɔ nɔhalɛ tenleneyɛlɛ nee nɔhalɛlilɛ nu la bɛwula.
25 Yemɔti, kɛkala mɔɔ bɛye adalɛ bɛgua la, bɛ nuhua ko biala ɛha nɔhalɛ ɛhile ɔ gɔnwo, ɔluakɛ yɛle sonlabaka ko anwo nvɛyeba.
26 Bɛva ɛya, noko bɛmmayɛ ɛtane; bɛmmamaa sɛnzɛne ne tɔ bɛ ɛyavalɛ zo;
27 bɛmmamaa Abɔnsam adenle.
28 Mɔɔ le awule la mmawua bieko; emomu ɔyɛ gyima ɛsesebɛ, ɔva ɔ sa ɔyɛ gyima kpalɛ, amaa yeanyia debie mɔɔ ɔbava bie yeamaa awie mɔɔ kɛhyia la.
29 Bɛmmamaa edwɛkɛ ɛtane fi bɛ nloa anu finde, emomu edwɛkɛ kpalɛ mɔɔ hyia na ɔmaa anwosesebɛ, mɔɔ nvasoɛ wɔ zo maa bɛdabɛ mɔɔ bɛtie la.
30 Eza bɛmmabɔ Nyamenle sunsum nwuanzanwuanza ne mɔɔ yeva yezɔ bɛ nloa yemaa kenle ne mɔɔ ɔbalua ɛkpɔnedeɛ ne azo yealie bɛ la arɛle.*
31 Bɛye ɛkpɔlɛ biala, ɛya, ahonle kpole, ɛdeɛdeanlɛ, nee aholoba, nee debie ɛtane biala bɛgua.
32 Emomu bɛyɛ atiakunlukɛnlɛma, bɛze anwunvɔne, bɛva bɛ gɔnwo mɔ ɛtane bɛhyɛ bɛ, kɛ mɔɔ Nyamenle noko ɛlua Kelaese anwo zo ɛva bɛ ɛtane ɛhyɛ bɛ la.
Ɔbodwɛkɛ
^ Anzɛɛ “yeatete.”
^ Giliki aneɛ nu, “bɛazi Kelaese sonlabaka ne.”
^ Anzɛɛ “bɛ adwenle le mgbane.”
^ Giliki aneɛ nu, “bɛ ahonle ɛtili.”
^ Giliki, a·selʹgei·a. Nea Edwɛkɛbohilelɛ.
^ Giliki aneɛ nu, “bɛ adwenle sunsum ne.”
^ Anzɛɛ “bɛmmamaa ɔdi nyane.”
