Ɛfɛsɛsema 5:1-33
5 Yemɔti, bɛzukoa Nyamenle kɛ mralɛ kulovolɛma,
2 na bɛhɔ zo bɛbɔ bɛ ɛbɛla wɔ ɛlɔlɛ nu kɛ mɔɔ Kelaese noko hulole yɛ* na ɔvale ɔ nwo ɔmaanle yɛ* kɛ afɔlebɔlɛ mɔɔ bɔ evuanlɛ maa Nyamenle la.
3 Adwɔmane ɛbɛla* nee nyɛleɛ evinli biala anzɛɛ anyebolo ɛdeɛ, bɛmmabɔ zo wɔ bɛ avinli, ɔluakɛ ɛhye ɛnfɛta menli mɔɔ le nwuanzanwuanza la;
4 yɛɛ anyiemgba ɛbɛla anzɛɛ ɛdendɛlɛ ɛtane anzɛɛ ngoayɛ mgbane mgbane—ninyɛne ɛhye mɔ ɛnfɛta—emomu bɛyɛ Nyamenle mo.
5 Ɔluakɛ bɛte ɛhye abo kpalɛ kɛ awie biala mɔɔ bɔ adwɔmane* anzɛɛ ye ɛbɛla nwo ɛnde anzɛɛ ɔle anyebolo, mɔɔ kile awozonle ɛzonlenlɛ la, ɛnlɛ agyapadeɛ biala wɔ Kelaese nee Nyamenle Belemgbunlililɛ ne anu.
6 Bɛmmamaa awie biala fa edwɛkɛ mɔɔ nvasoɛ ɛnle zo la bɛlɛbɛla bɛ, ɔluakɛ ninyɛne ɛhye mɔ ati a Nyamenle ɛya ne ɛlɛba anzosesebɛ mralɛ nwo zo a.
7 Yemɔti, bɛ nee bɛ mmatu;
8 ɔluakɛ dɛba ne ɛnee bɛwɔ awozinli nu, na kɛkala bɛra wienyi nu wɔ Awulae anu. Bɛhɔ zo bɛbɔ bɛ ɛbɛla kɛ wienyi nu mralɛ,
9 ɔluakɛ wienyi nu ma ne a le kpalɛyɛlɛ nee tenleneyɛlɛ nee nɔhalɛ muala.
10 Bɛbɔ mɔdenle bɛnwu mɔɔ sɔ Awulae anye la;
11 na bɛ nee bɛ mmayɛ awozinli nu gyima mɔɔ nvasoɛ ɛnle zo; emomu, bɛha bɛdo gua.
12 Na ɔyɛ nyiane bɔbɔ kɛ bɛkɛha ninyɛne mɔɔ bɛyɛ ye fealeranu la anwo edwɛkɛ.
13 Na ninyɛne mɔɔ ɛlɛda ali* la, wienyi ne a maa ɔda ali a, ɔluakɛ debie biala mɔɔ bɛla ye ali la le wienyi.
14 Yemɔti ɔse: “O, wɔmɔ mɔɔ wɔlafe a, tunwue, ɛvi mowuamra anu dwazo, na Kelaese ne bada ɛ nwo zo.”
15 Ɔti bɛnlea boɛ kpalɛ na kɛzi bɛlua la anyɛ kɛ menli mɔɔ ɛnze nrɛlɛbɛ emomu kɛ nrɛlɛbɛvolɛma,
16 na bɛva bɛ mekɛ bɛli gyima kpalɛ,* ɔluakɛ yɛwɔ mekɛ ɛtane nu.
17 Ɛhye ati, bɛmmayɛ bɛ nwo menli mɔɔ ɛnlɛ adwenle, emomu bɛbɔ mɔdenle bɛnwu Gyihova* ɛhulolɛdeɛ.
18 Bieko, bɛmmabo nza, ɔluakɛ ɔmaa bɛyɛ mgbane mgbane,* emomu bɛhɔ zo bɛmaa sunsum ne ɛyi bɛ tetɛkɛɛ.
19 Bɛva edwɛne nee ayɛlɛyelɛ nee sunsum nu edwɛne bɛdendɛ bɛhile bɛ nwo, na bɛdo edwɛne wɔ bɛ ahonle nu bɛmaa Gyihova,*
20 na bɛyɛ yɛ Nyamenle nee Selɛ ne mo dahuu wɔ yɛ Awulae Gyisɛse Kelaese duma nu wɔ debie biala anu.
21 Kɛmɔ bɛdi Kelaese eni la ati, bɛbɛlɛ bɛ nwo aze bɛmaa bɛ nwo ngoko.
22 Yelɛma ɛbɛlɛ bɛ nwo aze ɛmaa bɛ hu mɔ kɛ mɔɔ bɛyɛ bɛmaa Awulae la,
23 ɔluakɛ kunli a le ɔ ye ati a kɛ mɔɔ Kelaese le asafo ne ati la, ye sonlabaka ne mɔɔ ɔdaye a ɔle ye ngoanedievolɛ la.
24 Nɔhalɛ nu, kɛ mɔɔ asafo ne bɛlɛ ɔ nwo aze maa Kelaese la, zɔhane ala a ɔwɔ kɛ yelɛma bɛlɛ bɛ nwo aze maa bɛ hu mɔ wɔ debie biala anu a.
25 Kunlima, bɛhɔ zo bɛhulo bɛ ye mɔ, kɛ mɔɔ Kelaese hulole asafo ne na ɔwule ɔmaanle ye la,
26 amaa yealua edwɛkɛ ne azo yeava nzule yeanrinzi nwolɛ yeamaa nwolɛ ade,
27 na yeava asafo ne kɛnlɛma gyɛlɛɛnye yeamaa ɔ nwo, mɔɔ nwolɛ ɛtɛkpɔdele anzɛɛ ngehanleɛ anzɛɛ debie zɛhae biala ɛnle nwo, na ɔle nwuanzanwuanza mɔɔ nvonleɛ biala ɛnle nwo a.
28 Zɔhane ala a ɔwɔ kɛ kunlima kulo bɛ ye mɔ kɛ bɛ nwo a. Nrenyia mɔɔ kulo ɔ ye la kulo ɔdaye ɔ nwo,
29 ɔluakɛ awie biala ɛmkpɔ ye sonlabaka ne,* emomu ɔdi ye adane na ɔnea ye boɛ kɛ mɔɔ Kelaese yɛ asafo ne la,
30 ɔluakɛ yɛle ye sonlabaka ne nvɛyeba.
31 “Ɛhye ati a nrenyia bagyakyi ye papa nee ye mame na yeahɔbeta ɔ ye anwo na bɛ mu nwiɔ bɛayɛ nwonane ko la.”
32 Fealeranu edwɛkɛ nwuanzanwuanza ɛhye le kpole. Kelaese nee asafo ne anwo edwɛkɛ a melɛka a.
33 Noko ɔwɔ kɛ bɛ nuhua ko biala kulo ɔ ye kɛ ɔdaye ɔ nwo; na yelɛ noko nyia ɛbulɛ kpole maa ɔ hu.
Ɔbodwɛkɛ
^ Anzɛɛ ɔkola ɔkile, “bɛ.”
^ Anzɛɛ ɔkola ɔkile, “bɛ.”
^ Giliki, por·neiʹa. Nea Edwɛkɛbohilelɛ.
^ Nea Edwɛkɛbohilelɛ, “Adwɔmane ɛbɛla.”
^ Anzɛɛ “bɛka bɛto gua.”
^ Giliki aneɛ nu, “bɛdɔ mekɛ ne.”
^ Nea Edwɛkɛbohilelɛ.
^ Anzɛɛ “ɔmaa bɛyɛ basabasa.”
^ Nea Edwɛkɛbohilelɛ.
^ Giliki aneɛ nu, “ɔ nwonane ne.”
