1 Dwɔn 4:1-21
4 Alɔvolɛ, bɛmmadie sunsum nu edwɛkɛ* kɔsɔɔti bɛdi, emomu bɛzɔ sunsum nu edwɛkɛ* ne mɔ bɛnlea saa bɛvi Nyamenle a, ɔluakɛ adalɛ ngapezoma dɔɔnwo ɛra ewiade.
2 Debie mɔɔ kɛmaa bɛkɛnwu kɛ sunsum nu edwɛkɛ ne vi Nyamenle la a le ɛhye: Sunsum nu edwɛkɛ biala mɔɔ ka ye bagua nu kɛ Gyisɛse Kelaese rale nwonane nu la vi Nyamenle.
3 Na sunsum nu edwɛkɛ biala mɔɔ ɛnga Gyisɛse anwo edwɛkɛ bagua nu la ɛnvi Nyamenle. Bieko, ɛhye a le sunsum nu edwɛkɛ ne mɔɔ vi ahenle mɔɔ dwazo tia Kelaese mɔɔ bɛdele kɛ ɔbara na kɛkala ɔwɔ ewiade ye anu dɛbadɛba la.
4 Ngakula, bɛle Nyamenle ɛdeɛ, yɛɛ bɛli bɛ nwo zo konim, ɔluakɛ ahenle mɔɔ wɔ bɛ afoa la le kpole tɛla ahenle mɔɔ wɔ ewiade ne afoa la.
5 Bɛmɛ bɛvi ewiade; ɛhye ati a bɛka ewiade ye edwɛkɛ na ewiade ye tie bɛ a.
6 Yɛmɛ yɛvi Nyamenle. Awie biala mɔɔ ze Nyamenle la tie ye; awie biala mɔɔ ɛnvi Nyamenle la ɛndie ye. Ɛhye a maa yɛnwu sunsum nu edwɛkɛ mɔɔ le nɔhalɛ nee sunsum nu edwɛkɛ mɔɔ le adalɛ a.
7 Alɔvolɛ, bɛmaa yɛhɔ zo yɛhulo yɛ nwo ngoko, ɔluakɛ ɛlɔlɛ vi Nyamenle na awie biala mɔɔ lɛ ɛlɔlɛ la le Nyamenle ara na ɔze Nyamenle.
8 Awie biala mɔɔ ɛnlɛ ɛlɔlɛ la ɛnze Nyamenle, ɔluakɛ Nyamenle le ɛlɔlɛ.
9 Ɛhye azo a bɛluale bɛlale Nyamenle ɛlɔlɛ ne ali wɔ yɛ nwo a, Nyamenle zoanle ɔ Ra kokye ne wɔ ewiade amaa ɔlua ɔ nwo zo yɛanyia ngoane.
10 Ɛhye anu a ɛlɔlɛ ne wɔ a, tɛ yɛdayɛ a yɛhulole Nyamenle a, emomu yemɔ a ɔhulole yɛ na ɔzoanle ɔ Ra ne kɛ ɔrabɔ yɛ ɛtane nwo mgbɔdalɛ afɔle a.
11 Alɔvolɛ, saa Nyamenle ɛhulo yɛ zɛhae a, ɛnee ɔwɔ kɛ yɛdayɛ noko yɛkulo yɛ nwo ngoko.
12 Awie biala ɛtɛnwunle Nyamenle ɛlɛ. Saa yɛkɔ zo yɛkulo yɛ nwo ngoko a, ɛnee Nyamenle de yɛ nu na ye ɛlɔlɛ ne ɛli munli wɔ yɛ nu.
13 Ɛhye a maa yɛnwu kɛ yɛ nee ye le ko na ɔdaye noko ɔ nee yɛ le ko a, ɔboalekɛ yeva ye sunsum ne yemaa yɛ.
14 Bieko, yɛdayɛ mumua ne yɛnwu ye yɛɛ yɛdi nwolɛ daselɛ kɛ Selɛ ne ɛzoa ɔ Ra ne kɛ ewiade ne Ngoanedievolɛ.
15 Awie biala mɔɔ ka Gyisɛse anwo edwɛkɛ kɛ ɔle Nyamenle Ara la, Nyamenle nee ye le ko yɛɛ ɔdaye noko ɔ nee Nyamenle le ko.
16 Na yɛranwu ye kɛ Nyamenle kulo yɛ yɛɛ yɛdie yɛdi.
Nyamenle le ɛlɔlɛ, na awie mɔɔ de ɛlɔlɛ nu la nee Nyamenle le ko yɛɛ Nyamenle nee ye le ko.
17 Wɔ adenle ɛhye azo bɛmaa ɛlɔlɛ ɛli munli wɔ yɛ nu, amaa yɛahola yɛadendɛ wɔ akɛnrasesebɛ zo* wɔ ndɛnebualɛ kenle ne, ɔboalekɛ kɛ mɔɔ ɔdaye ɔde la, zɔhane ala a yɛdayɛ noko yɛle wɔ ewiade ye anu a.
18 Ɛzulolɛ biala ɛnle ɛlɔlɛ nu, noko ɛlɔlɛ mɔɔ di munli la tu* ɛzulolɛ, ɔluakɛ ɛzulolɛ twe yɛ sia. Nɔhalɛ nu, mɔɔ ɛzulolɛ ɛha ye la ɛtɛdile munli wɔ ɛlɔlɛ nu.
19 Yɛda ɛlɔlɛ ali, ɔluakɛ ɔlimoale ɔhulole yɛ.
20 Saa awie ka kɛ, “Mekulo Nyamenle,” na ɔkpɔ ɔ diema a, ɛnee ɔle adalɛ. Ɔluakɛ awie mɔɔ ɛngulo ɔ diema mɔɔ ɔnwu ye la ɛnrɛhola ɛnrɛhulo Nyamenle mɔɔ ɔnnwu ye la.
21 Na ɛhye a le mɛla mɔɔ yeva yemaa yɛ a, kɛ awie biala mɔɔ kulo Nyamenle la ɔwɔ kɛ kulo ɔ diema noko.
Ɔbodwɛkɛ
^ Giliki aneɛ nu, “sunsum.”
^ Giliki aneɛ nu, “sunsum.”
^ Anzɛɛ “anwodozo nu.”
^ Anzɛɛ “foa.”
