1 Tɛsalonaekama 1:1-10
1 Pɔɔlo, Seleveenɛse* nee Timote ɛlɛkɛlɛ ahɔmaa Tɛsalonaekama asafo ne mɔɔ wɔ Nyamenle Selɛ ne nee Awulae Gyisɛse Kelaese anu la:
Ɛlolɛ nee anzodwolɛ ɛha bɛ.
2 Yɛkakye bɛ muala wɔ yɛ asɔneyɛlɛ nu, na yɛyɛ Nyamenle mo dahuu,
3 ɔluakɛ dahuu yɛkakye gyima mɔɔ bɛfa diedi bɛyɛ, gyima ɛsesebɛ mɔɔ vi ɛlɔlɛ nu nee abotane mɔɔ yɛ Awulae Gyisɛse Kelaese anu anyelazo ti bɛnyia ye wɔ yɛ Nyamenle nee Selɛ ne anyunlu la.
4 Mediema, yɛze kɛ Nyamenle kulo bɛ yɛɛ yekpa bɛ a,
5 ɔluakɛ yɛze kɛ edwɛkpa ne mɔɔ yɛka la anlua ɛdendɛlɛ ngome zo a rale a, emomu ɔluale tumi nee sunsum nwuanzanwuanza ne nee diedi kpole zo, kɛ mɔɔ bɛdabɛ ti yɛbɔle yɛ ɛbɛla, kɛ mɔɔ bɛze la.
6 Na bɛzukoale yɛ nee Awulae, ɔluakɛ bɛvale anyelielɛ ne mɔɔ vi sunsum nwuanzanwuanza ne la bɛliele edwɛkɛ ne wɔ anwongyelelɛ dɔɔnwo anu,
7 ɛhye ati bɛyɛle neazo bɛmaanle diedima mɔɔ wɔ Masidonea nee Akaya la amuala.
8 Ɔle nɔhalɛ kɛ, tɛ Gyihova* edwɛkɛ ne angome a vi bɛ ɛkɛ ne ɛdwu Masidonea nee Akaya a, emomu Nyamenle anu diedi mɔɔ bɛlɛ la ɛdɛlɛ ɛdwu ɛleka biala, yemɔti ɔngyia kɛ yɛka edwɛkɛ biala.
9 Na bɛdabɛ mumua ne bɛka mekɛ mɔɔ limoa mɔɔ yɛnwunle bɛ la anwo edwɛkɛ nee kɛzi bɛhwenle bɛ nwo bɛvile bɛ ananze ne mɔ anwo na bɛrayɛle tease nee nɔhalɛ Nyamenle ne ngɛkɛlɛ la,
10 bɛrale kɛ bɛbahendɛ ɔ Ra ne mɔɔ vi anwuma, mɔɔ ɔdwazole ye ɔvile mowuamra anu, Gyisɛse, mɔɔ ɔbalie yɛ yeavi ɛya ne mɔɔ ɛlɛba la anu la.
