1 Tɛsalonaekama 4:1-18
4 Awieleɛ ne, mediema, yɛhilehile bɛ kɛzi ɔwɔ kɛ bɛbɔ bɛ ɛbɛla na bɛsɔ Nyamenle anye la, na nɔhalɛ nu bɛlɛyɛ zɔ. Akee yɛkulo kɛ yɛsɛlɛ bɛ na yɛtu bɛ folɛ wɔ Awulae Gyisɛse duma nu kɛ bɛhɔ zo bɛyɛ ye molozo.
2 Ɔluakɛ bɛdabɛ bɛze ngilehilelɛ ne mɔɔ ɔlua Awulae Gyisɛse tumi zo yɛvale yɛmaanle bɛ la.
3 Na Nyamenle ɛhulolɛdeɛ a le kɛ bɛ nwo kɛde na bɛkɛhwe bɛ nwo bɛkɛvi adwɔmane ɛbɛla* nwo.
4 Ɔwɔ kɛ bɛ nuhua ko biala nwu kɛzi ɔbahomo ɔdaye ye sonlabaka ne azo wɔ anwodelɛ nee enililɛ nu la,
5 tɛ wɔ nla nwo atiakunluwɔzo ɛtane nu kɛ mɔɔ maanle maanle ne mɔ mɔɔ bɛnze Nyamenle yɛ ye la.
6 Wɔ ɛhye ɛyɛlɛ nu, ɔnle kɛ awie biala yɛ ɔ diema bie ɛtane anzɛɛ sisi ye, ɔluakɛ Gyihova* fa ninyɛne ɛhye mɔ amuala anwo anzohwenlɛ maa, kɛ mɔɔ yɛlimoale yɛhanle yɛhilele bɛ na eza yɛbɔle bɛ kɔkɔ ɛsesebɛ la.
7 Tɛ evinli nyɛleɛ ti a Nyamenle vɛlɛle yɛ a, emomu ɔvɛlɛle yɛ kɛ yɛrayɛ menli mɔɔ anwo te a.
8 Yemɔti, mɔɔ kɛkpo ngilehilelɛ ɛhye la ɛmkpo sonla, emomu ɔkpo Nyamenle mɔɔ fa ye sunsum nwuanzanwuanza ne maa bɛ la.
9 Noko, mɔɔ fale mediema ɛlɔlɛ nwo la, ɔngyia kɛ yɛkɛlɛ nwolɛ debie yɛbɛlɛ bɛ ɔluakɛ Nyamenle ɛhilehile bɛ kɛ bɛhulo bɛ nwo ngoko.
10 Nɔhalɛ nu, bɛlɛyɛ zɔ bɛamaa mediema kɔsɔɔti mɔɔ wɔ Masidonea ɛleka biala la. Noko mediema, yɛtu bɛ folɛ kɛ, bɛhɔ zo bɛyɛ bɛmaa ɔbo zo.
11 Bɛbɔ mɔdenle kɛ bɛkɛdɛnla anzodwolɛ nu, bɛmmafa bɛ nloa bɛwulowula awie mɔ edwɛkɛ nu, na bɛva bɛ sa bɛyɛ gyima kɛ mɔɔ yɛhilele bɛ la,
12 amaa bɛabɔ ɛbɛla kpalɛ wɔ bɛdabɛ mɔɔ bɛwɔ ahane la anyunlu mɔɔ bɛnrɛhyia debie biala a.
13 Bieko, mediema, yɛkpondɛ kɛ bɛnwu nɔhalɛ ne mɔɔ fale bɛdabɛ mɔɔ bɛla wɔ ewule nu* la anwo, amaa bɛanli nyane kɛ bɛdabɛ mɔɔ bɛha mɔɔ bɛnlɛ anyelazo la.
14 Na saa yɛlɛ diedi kɛ Gyisɛse wule na yedwazo bieko a, zɔhane ala a Nyamenle balua Gyisɛse anwo zo ava bɛdabɛ mɔɔ bɛwu la aboka ɔ nwo azia ara ngoane nu a.
15 Na ɛhye a yɛlua Gyihova* edwɛkɛ zo yɛka yɛahile bɛ a, kɛ yɛdayɛ mɔɔ Awulae ɛralɛ ne badwu la yɛtɛte ngoane nu la ɛnrɛlimoa bɛdabɛ mɔɔ bɛwu la anyunlu;
16 ɔluakɛ Awulae mumua ne bava ɛnelɛ kpole, anwumabɔvolɛ kpanyinli ɛnelɛ nee Nyamenle aweɛne tendenle ne ɔvi anwuma lɔ yeadwu, na bɛdabɛ mɔɔ bɛwu wɔ Kelaese anu la balimoa adwazo.
17 Yemɔ anzi, bɛbava yɛdayɛ mɔɔ yɛha mɔɔ yɛtɛte aze la, nee bɛ muala wɔ amungu nu yɛahɔyia Awulae wɔ anwomanyunlu; na ɔlua zo yɛ nee Awulae adɛnla dahuu.
18 Yemɔti bɛhɔ zo bɛva edwɛkɛ ɛhye mɔ bɛkyekye bɛ rɛle ngoko.
Ɔbodwɛkɛ
^ Giliki, por·neiʹa. Nea Edwɛkɛbohilelɛ.
^ Nea Edwɛkɛbohilelɛ.
^ Anzɛɛ “bɛwu.”
^ Nea Edwɛkɛbohilelɛ.
