1 Tɛsalonaekama 5:1-28
5 Mediema, mekɛ ne nee ɛlobɔ ne anwo ɛdeɛ, ɔngyia kɛ yɛkɛhɛlɛ bɛ wɔ nwolɛ.
2 Ɔluakɛ bɛdabɛ bɛze ye wienyi kɛ Gyihova* kenle ne bara kɛ awule ba nɔɔzo la.
3 Mekɛ mɔɔ menli ɛlɛka kɛ, “Anzodwolɛ nee banebɔlɛ!” la, ɛzɛkyelɛ bara bɛ nwo zo arɛlevilɛ nu kɛ mɔɔ awolɛ nyane ka nrenzɛvolɛ la, na bɛnrɛhola nriandi wɔ adenle biala azo.
4 Noko bɛmɛ mediema, bɛnle awozinli nu, bɛnle kɛ nwule na kenle zɔhane arado bɛ arɛlevilɛ nu,
5 ɔluakɛ bɛ muala bɛle wienyi nee alehyenlɛ nu mralɛ. Yɛnle aledwolɛ anzɛɛ awozinli ɛdeɛ.
6 Yemɔti bɛmmamaa yɛdafe kɛ menli mɔɔ ɛha la, emomu bɛmaa yɛzinza na yɛ nye ɛla ɛkɛ.
7 Ɔluakɛ menli mɔɔ dafe la da nɔɔzo, yɛɛ menli mɔɔ bo nza la bo nɔɔzo.
8 Noko yɛmɛ mɔɔ yɛle alehyenlɛ ɛdeɛ la, bɛmaa yɛ nye ɛla ɛkɛ na yɛwula diedi nee ɛlɔlɛ akɛnrazo enyinlike ne na yɛzoa ngoanelielɛ anyelazo ne kɛ bulalɛ kyɛlɛ.
9 ɔluakɛ Nyamenle amkpa yɛ kɛ ye ɛya ne ɛrɛla yɛ nwo zo, emomu ɔkpale yɛ kɛ yɛlua Awulae Gyisɛse Kelaese anwo zo yɛnyia ngoane.
10 Ɔwule ɔmaanle yɛ, amaa saa yɛ nye gyi zo o, yɛla o,* yɛ nee ye adɛnla ngoane nu.
11 Yemɔti bɛhɔ zo bɛmaa bɛ nwo anwosesebɛ* na bɛboa bɛ nwo ngoko kɛ mɔɔ bɛlɛyɛ ye ala la.
12 Mediema, akee yɛsɛlɛ bɛ kɛ bɛbu bɛdabɛ mɔɔ bɛlɛyɛ gyima ɛsesebɛ wɔ bɛ avinli na bɛnea bɛ nwo zo wɔ Awulae anu na bɛtu bɛ folɛ la;
13 na bɛli bɛ eni kpole kpalɛ wɔ ɛlɔlɛ nu ɔlua bɛ gyima ne mɔɔ bɛyɛ la ati. Bɛ muala bɛdɛnla anzodwolɛ nu.
14 Noko akee, mediema, yɛsɛlɛ bɛ kɛ bɛbɔ menli mɔɔ lua ye basabasa la kɔkɔ,* bɛkyekye menli mɔɔ arɛle ɛbɔ la arɛle, bɛboa mɔɔ ɛyɛ bɛtɛɛ la, bɛnyia awie biala anwo abotane.
15 Bɛnlea na awie anva ɛtane andua awie ɛtane kakɛ, dahuu bɛkpondɛ mɔɔ le kpalɛ la bɛmaa bɛ nwo ngoko nee awie biala.
16 Dahuu bɛmaa bɛ nye ɛlie.
17 Bɛyɛ asɔne dahuu.
18 Bɛva moyɛlɛ bɛmaa wɔ debie biala anu. Ɛhye a Nyamenle kpondɛ kɛ bɛyɛ kɛ Kelaese Gyisɛse ɛdoavolɛma a.
19 Bɛmmanua sunsum ne senle ne.
20 Bɛmmakpo ngapezo ne mɔ.
21 Bɛzɔ ninyɛne kɔsɔɔti bɛnlea; bɛzɔ mɔɔ le kpalɛ la anu kpundii.
22 Bɛhwe bɛ nwo bɛvi ɛtane biala anwo.
23 Anzodwolɛ Nyamenle mumua ne ɛde bɛ nwo bɔkɔɔ. Na bɛbɔ bɛ sunsum nee bɛ ɛkɛla* nee bɛ sonlabaka ne anwo bane bɛmaa ɔli munli wɔ adenle biala anu, na edwɛkɛ biala amba yɛ nwo wɔ yɛ Awulae Gyisɛse Kelaese ɛralɛ ne anu.
24 Ahenle mɔɔ ɛlɛfɛlɛ bɛ la le nɔhavo, na ɔbayɛ ye zɔ.
25 Mediema, bɛhɔ zo bɛyɛ asɔne bɛmaa yɛ.
26 Bɛva bɛ nloa anwo ɛvolɛ nwuanzanwuanza bɛbizebiza mediema ne mɔ amuala ahye.
27 Mesɛlɛ bɛ wɔ Awulae duma nu kɛ bɛgenga kɛlata ɛhye bɛhile mediema ne mɔ amuala.
28 Yɛ Awulae Gyisɛse Kelaese ɛlolɛ ne nee bɛ ɛdɛnla.
Ɔbodwɛkɛ
^ Nea Edwɛkɛbohilelɛ.
^ Anzɛɛ “yɛla wɔ ewule nu o.”
^ Anzɛɛ “bɛkyekye bɛ rɛle ngoko.”
^ Anzɛɛ “bɛdu bɛ folɛ.”
^ Anzɛɛ “ngoane.” Nea Edwɛkɛbohilelɛ.
