1 Pita 5:1-14
5 Mele bɛ gɔnwo kpanyinli, Kelaese amaneɛnwunlɛ ne anwo dasevolɛ, yɛɛ mebanyia anyunlunyia ne mɔɔ bɛbala ye ali la bie, yemɔti mesɛlɛ mgbanyima mɔɔ wɔ bɛ avinli la kɛ:
2 Bɛnlea Nyamenle mboane ne mɔɔ wɔ bɛ sa nu, mɔɔ bɛlɛsonle bɛ kɛ neavolɛma* la boɛ, bɛmmatwenlehwenle bɛ bo aze, bɛvi bɛ ɛhulolɛ nu bɛyɛ ye wɔ Nyamenle anyunlu; tɛ kɛ bɛkpondɛ ɔ nzi ahatualɛ la ati ɔ, emomu anyelielɛ nu;
3 bɛmmadi bɛdabɛ mɔɔ bɛle Nyamenle agyapadeɛ la anwo zo tumi, emomu bɛyɛ neazo bɛmaa mboane ne.
4 Na saa bɛda mboaneneavolɛ kpanyinli ne ali a, bɛanyia anyunlunyia abotile ne mɔɔ ɛmkpa ɛlɛ la.
5 Zɔhane ala a bɛmɛ mgbavolɛ, bɛbɛlɛ bɛ nwo aze bɛmaa mgbanyima* a. Noko bɛ muala bɛwula mɛlɛbɛnwoaze* wɔ kɛzi bɛ nee bɛ gɔnwo mɔ di la anu, ɔluakɛ Nyamenle kyi menli mɔɔ memaa bɛ nwo zo la na ɔdo menli mɔɔ bɛlɛ bɛ nwo aze la.
6 Ɔti bɛbɛlɛ bɛ nwo aze wɔ Nyamenle tumi kpole ne* abo, amaa yeamaa bɛ zo wɔ mekɛ mɔɔ fɛta la anu,
7 na bɛvuandi bɛ adwenleadwenle* muala bɛgua ɔ nwo zo ɔluakɛ ɔdwenle bɛ nwo.
8 Bɛmaa bɛ nye ɛla ɛkɛ, bɛzinza! Bɛ kpɔvolɛ Abɔnsam luolua nu kɛ awenade mɔɔ ɛlɛkpo akpondɛ awie ame ye* la.
9 Noko bɛva diedi kpundii bɛho bɛtia ye, na bɛnwu ye kɛ amaneɛ ko ne ala a bɛ mediema* mɔɔ wɔ ewiade amuala la ɛlɛnwu ye a.
10 Na saa bɛnwu amaneɛ ekyii a, ɛlolɛ muala Nyamenle ne mɔɔ vɛlɛle bɛ rale ye dahuu anyunlunyia ne anu wɔ Kelaese anu la mumua ne bawie bɛ ndetelɛ ne. Ɔbamaa bɛazi pi, ɔbamaa bɛayɛ se, ɔbamaa bɛagyinla kpundii.
11 Yemɔ a tumi le ye ɛdeɛ dahuu a. Amen.
12 Melua Seleveenɛse* mɔɔ mebu ye kɛ adiema nɔhavo la anwo zo mehɛlɛ bɛ edwɛkɛ ekyi kɛ mefa meamaa bɛ anwosesebɛ na meali bɛ daselɛ ɛsesebɛ kɛ ɛhye a le Nyamenle ɛlolɛ kpalɛ ne a. Bɛgyinla kpundii wɔ nu.
13 Raalɛ* ne mɔɔ wɔ Babelɔn mɔɔ bɛkpa ye kɛ bɛdabɛ ala la nee me ra Maake biza bɛ.
14 Bɛvi ɛlɔlɛ nu bɛva bɛ nloa anwo ɛvolɛ bɛbiza bɛ nwo ahye.
Anzodwolɛ ɛha bɛ muala mɔɔ bɛle Kelaese ɛdoavolɛma la.
Ɔbodwɛkɛ
^ Anzɛɛ “bɛlɛnea bɛ nwo zo.”
^ Anzɛɛ “asafo nu mgbanyima.”
^ Anzɛɛ “bɛnyia mɛlɛbɛnwoaze adwenle.”
^ Giliki aneɛ nu, “Nyamenle asa ne mɔɔ tumi wɔ nu la.”
^ Anzɛɛ “ngyegyelɛ.”
^ Anzɛɛ “yeahye ye yeali.”
^ Giliki aneɛ nu, “mediemayɛlɛ ne.”
^ Eza bɛfɛlɛ ye Saelase.
^ Raalɛ ne kola kile asafo.
