2 Pita 1:1-21
1 Saemɔn Pita, Gyisɛse Kelaese akɛlɛ nee ɛzoanvolɛ, ɛlɛkɛlɛ ahɔmaa bɛdabɛ mɔɔ ɔlua yɛ Nyamenle nee yɛ Ngoanedievolɛ Gyisɛse Kelaese tenleneyɛlɛ ti bɛnyia diedi mɔɔ sonle bolɛ kɛ yɛ ɛdeɛ ne* la:
2 Ɛlolɛ nee anzodwolɛ molozo ɛlua Nyamenle nee yɛ Awulae Gyisɛse anwo nɔhalɛ ndelebɛbo zo ɛha bɛ,
3 ɔluakɛ Nyamenle ɛlua ye tumi ne azo yemaa yɛnyia debie biala mɔɔ yɛhyia* na yɛava nyamenlezonlenlɛ kpalɛ yɛabɔ yɛ ɛbɛla, ɔlua Ahenle mɔɔ luale ye anyunlunyia nee ɛbɛla kpalɛ zo vɛlɛle yɛ la anwo nɔhalɛ ndelebɛbo zo.
4 Yelua ɛhye mɔ azo yemaa yɛ ɛwɔkɛ mgbole mɔɔ sonle bolɛ,* na mekɛ mɔɔ bɛnriandi bɛvi ewiade ɛkpɔlɔlɛ mɔɔ atiakunluwɔzo ɛtane* fa ba la anwo la, bɛalua ɛhye mɔ azo bɛanyia Nyamenle subane ne mɔ bie.
5 Ɛhye ati, bɛbɔ mɔdenle biala bɛva ɛbɛla kpalɛ bɛboka bɛ diedi ne anwo, na bɛva ndelebɛbo bɛboka bɛ ɛbɛla kpalɛ nwo,
6 bɛva bɛnwozohomolɛ bɛboka bɛ ndelebɛbo nwo, bɛva abotane* bɛboka bɛnwozohomolɛ nwo, bɛva nyamenlezonlenlɛ kpalɛ bɛboka bɛ abotane nwo,
7 bɛva mediema ɛlɔlɛ bɛboka bɛ nyamenlezonlenlɛ kpalɛ nwo, na bɛva ɛlɔlɛ bɛboka bɛ mediema ɛlɔlɛ nwo.
8 Na saa ɛhye mɔ amuala wɔ bɛ nu na bɛnyia ye molozo a, ɔnrɛmaa bɛnrɛdɛnla ɛkɛ mgbane anzɛɛ bɛnrɛyɛ menli mɔɔ ɛnzo ma* la wɔ yɛ Awulae Gyisɛse Kelaese anwo nɔhalɛ ndelebɛbo nu.
9 Na awie biala mɔɔ ɛhye mɔ ɛnle ye nu la anye ɛzi, ɔngola ɔnnwu wienyi ne,* na ɔ rɛle ɛvi kɛ bɛde ɔ nwo bɛvi ye ɛtane mɔɔ ɔyɛle ye dɛba ne la anwo.
10 Yemɔti, mediema, bɛbɔ mɔdenle biala bɛmaa bɛ ɛvɛlɛlɛ nee bɛ ɛkpalɛ ne ɛli munli, na saa bɛkɔ zo bɛyɛ ye zɔhane a, bɛnrɛdɔ aze ɛlɛ.
11 Nɔhalɛ nu, ɛhye a bamaa bɛanyia adenle* bɛahɔ yɛ Awulae nee yɛ Ngoanedievolɛ Gyisɛse Kelaese dahuu Belemgbunlililɛ ne anu a.
12 Zɔhane ati meyɛ me adwenle kɛ dahuu mebahakyehakye bɛ ninyɛne ɛhye mɔ, noko bɛze ninyɛne ɛhye mɔ yɛɛ bɛgyi nɔhalɛ ne mɔɔ wɔ bɛ nu la anu kpundii.
13 Noko mekɛ ala mɔɔ mewɔ ɛdanlɛsua* ɛhye anu la, menwu kɛ ɔle kpalɛ kɛ mekakyehakye bɛ,
14 na meze kɛ ɔnrɛhyɛ bɛbaye me ɛdanlɛsua ne kɛ mɔɔ yɛ Awulae Gyisɛse Kelaese noko lale ye ali hilele me la.
15 Mebabɔ mɔdenle mekɛ biala amaa saa mekɔ a, bɛdabɛ mumua ne bɛahola bɛahakye* ninyɛne ɛhye mɔ.
16 Tɛ adalɛ edwɛkɛ mɔɔ bɛhyehyɛ la azo a yɛluale yɛmaanle bɛnwunle yɛ Awulae Gyisɛse Kelaese tumi ne nee ye ɛralɛ ne a, emomu yɛdayɛ mumua ne yɛvale yɛ nye yɛnwunle ye anyunlunyia ne.
17 Na ɔnyianle enililɛ nee anyunlunyia ɔvile Nyamenle Selɛ ne ɛkɛ wɔ mekɛ mɔɔ anyunlunyia bedevinli ne hanle edwɛkɛ zɛhae hilele ye la: “Ɛhye a le me Ra mɔɔ mekulo ye, na melie ye medo nu a.”
18 Edwɛkɛ ɛhye a yɛdele yɛvile anwuma wɔ mekɛ mɔɔ ɛnee yɛ nee ye wɔ boka nwuanzanwuanza ne azo la.
19 Yemɔti bɛzi ngapezo edwɛkɛ ne pi kpalɛ bɛmaa yɛ, na ɔle kpalɛ kɛ bɛmaa bɛ nye ɛhɔ nwo kɛ kɛnlaneɛ mɔɔ ɛlɛta wɔ awozinli nu (kɔkpula kɛ aleɛ kɛhye na alehyenlɛ ɛwɔlɔra ne kɛvinde) wɔ bɛ ahonle nu la.
20 Mɔɔ limoa la, bɛze kɛ Ngɛlɛlera ne anu ngapezo biala ɛnvi sonla adwenle nu.
21 Ɔluakɛ ngapezo anlua sonla ɛhulolɛ zo amba ɛlɛ, emomu sunsum nwuanzanwuanza ne a hanle* menli maanle bɛhanle mɔɔ vi Nyamenle ɛkɛ ne la a.
Ɔbodwɛkɛ
^ Anzɛɛ “diedi mɔɔ bɛnyia adenle bɛ nee yɛ lɛ.”
^ Anzɛɛ “azo ɛva debie biala ɛmaa yɛ mgbane.”
^ Anzɛɛ “yeva yemaa yɛ mgbane.”
^ Anzɛɛ “ɛhulolɛ ɛtane.”
^ Anzɛɛ “kpundiigyinlanlɛ.”
^ Anzɛɛ “menli mɔɔ nvasoɛ ɛnle bɛ nwo zo.”
^ Anzɛɛ ɔkola ɔkile, “ɔlɛ ɛnyelɛ mɔɔ ɛnnwu debie kpalɛ.”
^ Anzɛɛ “bɛava anyunlunyia kpole.”
^ Ɛhye kile, ye sonlabaka ne.
^ Anzɛɛ “bɛaha.”
^ Giliki aneɛ nu, “wolole.”
