Kɔlɔsaema 1:1-29
1 Pɔɔlo, mɔɔ ɔlua Nyamenle ɛlolɛ zo yeyɛ Kelaese Gyisɛse ɛzoanvolɛ la nee yɛ diema Timote,
2 ɛlɛkɛlɛ ahɔmaa nwuanzanwuanzama nee mediema nɔhavoma mɔɔ bɛwɔ Kelaese anu wɔ Kɔlɔsae la:
Yɛ Ze Nyamenle ɛlo bɛ na ɔmaa bɛ anzodwolɛ.
3 Mekɛ biala mɔɔ yɛkɛyɛ asɔne yɛkɛmaa bɛ la, yɛyɛ Nyamenle, yɛ Awulae Kelaese Gyisɛse ɔ Ze ne mo,
4 ɔluakɛ yɛde kɛ bɛlie Kelaese Gyisɛse bɛli na bɛnyia nwuanzanwuanzama ne amuala anwo ɛlɔlɛ
5 ɔlua anyelazo ne mɔɔ ɛlɛkendɛ bɛ wɔ anwuma la ati. Bɛdele anyelazo ɛhye dɛba ɔlua edwɛkpa ne anwo nɔhalɛ edwɛkɛ ne
6 mɔɔ ɛdwu bɛ ɛkɛ la azo. Kɛ mɔɔ edwɛkpa ne ɛlɛso ma na ɔlɛnyia anyuhɔlɛ wɔ ewiade amuala la, zɔhane ala a ɔlɛyɛ ye wɔ bɛ avinli ɔvi kenle mɔɔ bɛdele na bɛnwunle Nyamenle ɛlolɛ ne kpalɛ wɔ nɔhalɛ nu la.
7 Ɛhye a bɛzukoa bɛvi yɛ kulovolɛ nee yɛ diema Ɛpafelase mɔɔ di nɔhalɛ na ɔsonle kɛ Kelaese akɛlɛ ɔmaa yɛ la ɛkɛ a.
8 Eza yeha bɛ sunsum nu ɛlɔlɛ ne anwo edwɛkɛ yehile yɛ.
9 Ɛhye ati a ɔvi kenle mɔɔ yɛdele nwolɛ edwɛkɛ la, yɛtɛgyakyile kɛ yɛbayɛ asɔne yɛamaa bɛ na yɛazɛlɛ kɛ ye ɛhulolɛdeɛ ne anwo nɔhalɛ ndelebɛbo ne ɛyi bɛ tɛkɛɛ wɔ nrɛlɛbɛ nee sunsum nu ndelebɛbo muala anu a,
10 amaa bɛalua bɛamaa yeafɛta Gyihova* na bɛazɔ ɔ nye bɔkɔɔ, mekɛ mɔɔ bɛlɛkɔ zo bɛazo ma wɔ gyima kpalɛ biala anu na bɛanyia Nyamenle anwo nɔhalɛ ndelebɛbo dɔɔnwo;
11 na bɛanyia anwosesebɛ wɔ ye tumi kpole ne anu kɛ mɔɔ ye anyunlunyia tumi ne de la, amaa bɛava abotane nee anyelielɛ bɛagyinla debie biala anloa,
12 na bɛayɛ Selɛ ne mɔɔ yemaa bɛfɛta kɛ bɛ nee nwuanzanwuanzama ne mɔɔ wɔ wienyi nu banyia agyapadeɛ ne la mo.
13 Yelie yɛ yevi awozinli nu tumi bo na yeva yɛ yera ye kulovolɛ Ralɛ ne belemgbunlililɛ ne anu,
14 yelua ɔ nwo zo yekpɔne yɛ, yeva yɛ ɛtane yehyɛ yɛ.
15 Yemɔ a ɔle Nyamenle ne mɔɔ bɛnnwu ye la ɛsaso, abɔdeɛ muala anu belamunli ralɛ a;
16 bɛluale ɔ nwo zo a bɛbɔle debie biala mɔɔ wɔ anwuma nee azɛlɛ ye azo a, ninyɛne mɔɔ bɛnwu bɛ nee ninyɛne mɔɔ bɛnnwu bɛ, arelemgbunli mbia, anzɛɛ mgbolema anzɛɛ tumililɛ anzɛɛ tumivolɛma. Bɛluale ɔ nwo zo a bɛbɔle ninyɛne mɔɔ ɛha la a, na bɛbɔle bɛmaanle ye.
17 Eza ɔlile ninyɛne mɔɔ ɛha la amuala anyunlu, na bɛluale ɔ nwo zo a bɛbɔle ninyɛne mɔɔ ɛha la a,
18 na yemɔ a ɔle sonlabaka ne, mɔɔ le asafo ne la ati a. Yemɔ a ɔle mɔlebɛbo ne, mowuamra ɛdwazolɛ ne anu belamunli ralɛ a, amaa yealimoa wɔ debie biala anu;
19 ɔluakɛ ɛnee ɔsɔ Nyamenle anye kɛ ɔbamaa ninyɛne kɔsɔɔti ali munli wɔ ye nu,
20 na ɔlua ɔ nwo zo yeaha ɔdaye nee ninyɛne mɔɔ ɛha la amuala yeabɔ nu bieko, ɔlua anzodwolɛ mɔɔ ɔvale ye mogya ne mɔɔ ɔhwinle ɔguale amaneɛnwunlɛ baka* ne azo ɔlile nwolɛ gyima la azo, azɛlɛ ye azo ninyɛne nee anwuma ninyɛne kɔsɔɔti.
21 Nɔhalɛ nu, bɛmɛ mɔɔ dɛba ne ɛnee bɛminli na bɛyɛ agbɔvolɛ ɔluakɛ ɛnee bɛ adwenle wɔ ninyɛndane zo la,
22 yelua zɔhane sonla ne sonlabaka ne mɔɔ ɔvale ɔhɔle ewule nu la azo yeha bɛ yebɔ nu bieko, amaa yeava bɛ yeahile kɛ bɛle nwuanzanwuanza mɔɔ nvonleɛ nee edwɛkɛ biala ɛnle bɛ nwo wɔ ɔ nyunlu—
23 noko kyesɛ bɛkɔ zo bɛtɛnla diedi ne anu, bɛgyinla adiabo ne azo na bɛgyinla kpundii mɔɔ bɛmmaa bɛndwe bɛ bɛnvi edwɛkpa ne mɔɔ bɛdele na bɛbɔle ye nolo bɛhilele abɔdeɛ muala mɔɔ wɔ aleɛabo la anwo anyelazo ne anwo a. Medame Pɔɔlo, bɛyɛle me edwɛkpa ɛhye anwo sonvolɛ.
24 Kɛkala melɛdi fɛlɛko wɔ amaneɛ ne mɔɔ bɛdabɛ ti menwu ye la anu, melɛnwu amaneɛ na mete nganeɛ kɛ ɔndwu amaneɛ ne mɔɔ Kelaese mɔɔ le asafo ne sonlabaka ne nwunle ye la ɛdeɛ ne.
25 Bɛkpale me kɛ menyɛ asafo ɛhye sonvolɛ ɔlua gyima mɔɔ bɛdabɛ ti Nyamenle vale maanle me kɛ membɔ Nyamenle edwɛkɛ ne nolo kpalɛ la azo,
26 fealeranu edwɛkɛ nwuanzanwuanza ne mɔɔ bɛvale bɛveale ewiade ne* nee awolɛndoazo dɛba ne mɔ la. Noko kɛkala bɛye bɛhile ye nwuanzanwuanzama ne,
27 mɔɔ ɔsɔ Nyamenle anye kɛ ɔbamaa maanle maanle ne anwu fealeranu edwɛkɛ nwuanzanwuanza ɛhye anyunlunyia nu anwonyia ne, mɔɔ yemɔ a le Kelaese ne mɔɔ wɔ bɛ nu la, ye anyunlunyia nwo anyelazo ne.
28 Yemɔ a yɛlɛbɔ ye nolo, yɛadu awie biala folɛ na yɛahilehile awie biala wɔ nrɛlɛbɛ muala anu a, amaa yɛava awie biala yɛahile kɛ ɔdi munli wɔ Kelaese anu.
29 Ɛhye ati melɛyɛ gyima ɛsesebɛ, melɛpele kɛ mebava ye anwosesebɛ kpole ne mɔɔ yɛ gyima ɛsesebɛ wɔ me nu la a meayɛ a.
