Kɔlɔsaema 2:1-23
2 Na mekpondɛ kɛ bɛnwu kɛzi melɛko ɛsesebɛ meamaa bɛ nee bɛdabɛ mɔɔ bɛwɔ Lawɔdesia nee bɛdabɛ mɔɔ bɛtɛnwunle me ɛlɛ* la amuala la.
2 Ɛhye le zɔ amaa bɛ ahonle adɔ bɛ azule nu na bɛayɛ ko wɔ ɛlɔlɛ nu na bɛanyia anwonyia ne mɔɔ vi bɛ ndelebɛbo kpalɛ nu la amuala, na bɛanyia Nyamenle fealeranu edwɛkɛ nwuanzanwuanza ne mɔɔ yemɔ a le Kelaese la anwo nɔhalɛ ndelebɛbo.
3 Ye nuhua a bɛva nrɛlɛbɛ nee ndelebɛbo anwonyia muala bɛvea a.
4 Melɛka ɛhye amaa awie anva edwɛkɛ menlemenle biala ambɛlɛbɛla bɛ.
5 Menle bɛ nwo lɔ wɔ nwonane nu ɛdeɛ, noko mewɔ bɛ nwo lɔ wɔ sunsum nu, na me nye die kɛ menwu bɛ ngyehyɛleɛ kpalɛ ne nee kɛzi bɛ diedi gyi kpundii wɔ Kelaese anu la.
6 Ɛhye ati, kɛ mɔɔ bɛlie Awulae Kelaese Gyisɛse bɛdo nu la, bɛhɔ zo bɛ nee ye ɛlua,
7 bɛsosɔ ndinli na bɛnyi wɔ ye nu, na bɛgyinla kpundii wɔ diedi ne anu kɛ mɔɔ bɛhilehilele bɛ la, na moyɛlɛ ɛyi bɛ tɛkɛɛ.
8 Bɛnlea boɛ na awie anva ewiade nrɛlɛbɛ nee mɛlɛbɛla mɔɔ gyi sonla amaamuo nee ewiade ye anu ninyɛne zo na ɔngyi Kelaese ngilehilelɛ ne azo la anyɛ bɛ ngɛkɛlɛ;
9 ɔluakɛ Nyamenle subane ne mɔ amuala ɛyi ye sonlabaka ne.
10 Yemɔti ɔlua ɔdaye mɔɔ ɔle arane nee tumililɛ muala ati la anwo zo, bɛngyia debie biala.
11 Ɔlua agɔnwolɛ mɔɔ bɛ nee ye vale la azo, bɛdabɛ noko bɛpɛle bɛ mrenyia zo mɔɔ tɛ ɛsalɛ a bɛvale bɛpɛle a, emomu bɛyele nwonane nu sonlabaka ne bɛvile ɛkɛ, ɛhye a le adenle mɔɔ ɔwɔ kɛ bɛdua zo bɛpɛ Kelaese azonvolɛ mrenyia zo a.
12 Ɔluakɛ bɛziele bɛ bɛbokale ɔ nwo wɔ ye ɛzɔnenlɛ ne anu, na ɔlua agɔnwolɛ mɔɔ bɛ nee ye vale la azo bɛdwazole bɛdabɛ noko bɛbokale ɔ nwo, ɔlua Nyamenle mɔɔ dwazole ye vile mowuamra anu la nwanwane gyima ne mɔɔ ɔyɛle la anu diedi mɔɔ bɛnyianle la azo.
13 Bieko, ɛnee bɛwu wɔ bɛ ɛtane nee mekɛ mɔɔ bɛtɛpɛle bɛ mrenyia zo wɔ nwonane nu la anu ɛdeɛ, noko Nyamenle maanle bɛ nee ye rale ngoane nu bieko. Ɔlole yɛ ɔvale yɛ ɛtane kɔsɔɔti ɔhyɛle yɛ
14 na ɔkyikyile mɛla ne mɔɔ ɛnee bɛhɛlɛ mɔɔ ɔtia yɛ la ɔvile ɛkɛ. Ɔyele ye ɛkɛ ne na ɔvale ɔbɔle amaneɛnwunlɛ baka* ne anu.
15 Ɔkpale arane nee tumililɛ ne mɔ anwo ɛdanlɛ na ɔmaanle bɛnwunle ye wienyi kɛ yeli bɛ nwo zo konim, na ɔlile bɛ nyunlu wɔ konimlilɛ ɛlɔnwɔnedolɛ nu.
16 Yemɔti bɛmmamaa awie bua bɛ ndɛne wɔ mɔɔ bɛdi nee mɔɔ bɛno anzɛɛ ɛvoyialilɛ anzɛɛ siane fofolɛ anzɛɛ ɛnwomenlelielɛ kenle nwo.
17 Ninyɛne zɔhane mɔ le ninyɛne mɔɔ bara la ɛlawolɛ, na bɛ kpalɛ kpalɛ ne le Kelaese ɛdeɛ.
18 Bɛmmamaa awie biala yɛ maa ahyɛlɛdeɛ ne bɔ bɛ, awie mɔɔ ɔ nye die adalɛ mɛlɛbɛnwoaze nee anwumabɔvolɛma ɛzonlenlɛ nwo la, “ɔgyinla”* ninyɛne mɔɔ ɔnwu ye la azo. Ɔfa ye nwonane nu adwenle ne ɔtu ɔ nwo mɔɔ ndelebɛbo biala ɛnle nu a,
19 sonla mɔɔ le zɛhae la ɛndoa tile ne, ahenle mɔɔ maa sonlabaka ne amuala nyia mɔɔ ɔhyia nwo, na ɔmaa nvɛyeba ne mɔ amuala bɔ nu yɛ ko na ɔ nwo zo a Nyamenle ɛlɛdua amaa sonlabaka ne anyi kɛ mɔɔ ɔkpondɛ ye ala la.
20 Saa bɛ nee Kelaese wule wɔ ewiade ye anu ninyɛne nwo a, ɛnee duzu ati a bɛkɔ zo bɛbɔ bɛ ɛbɛla kɛ bɛtɛbɔ ewiade ne anu na bɛdi mɛla mɔɔ le kɛ:
21 “Bɛmmasɔ nu, bɛmmasɔ bɛnea, bɛmmafa bɛ sa bɛka ye” la azo,
22 wɔ ninyɛne mɔɔ bɛfa bɛyɛ debie ko a ɔ muala sɛkye la anwo, kɛ mɔɔ menli mɛla nee bɛ ngilehilelɛ de la ɛ?
23 Ninyɛne ɛhye mɔ amuala le bɛ ɛzonlenlɛ nu debie mɔɔ sonla nye zo a ɔzɔho kɛ nrɛlɛbɛ wɔ nu, noko ɔle adalɛ mɛlɛbɛnwoaze mɔɔ maa bɛkile sonlabaka ne nyane a, na tumi biala ɛnle nu mɔɔ ɔbahola yeaho yeatia nwonane ne atiakunluwɔzo ne a.
Ɔbodwɛkɛ
^ Giliki aneɛ nu, “bɛtɛnwunle me nyunlu ɛlɛ.”
^ Nea Edwɛkɛbohilelɛ.
^ Ɔvale edwɛkɛ ne ɔvile awozonle ɛzonlenlɛ nyɛleɛ nu.
