Kɔlɔsaema 3:1-25
3 Saa bɛdwazo bɛ nee Kelaese a, ɛnee bɛhɔ zo bɛkpondɛ ninyɛne mɔɔ wɔ anwuma lɔ, ɛleka mɔɔ Kelaese de wɔ Nyamenle asa fema zo la.
2 Bɛva bɛ adwenle bɛzie ninyɛne mɔɔ wɔ anwuma lɔ la azo, na tɛ ninyɛne mɔɔ wɔ azɛlɛ ye azo la ɔ.
3 Ɔluakɛ bɛwule, na bɛva bɛ ngoane nee Kelaese bɛvea Nyamenle anu.
4 Saa bɛda Kelaese, yɛ ngoane ne ali a, bɛbala bɛdabɛ noko ali bɛaboka ɔ nwo wɔ anyunlunyia nu.
5 Yemɔti bɛhu bɛ sonlabaka ne nvɛyeba ne mɔ mɔɔ wɔ azɛlɛ ye azo la wɔ adwɔmane ɛbɛla,* evinli nyɛleɛ, nla nwo atiakunluwɔzo ɛtane, nganeɛdelɛ ɛtane, nee anyebolo mɔɔ le awozonle ɛzonlenlɛ la anwo.
6 Ninyɛne ɛhye mɔ ati a Nyamenle ɛya ne ɛlɛba a.
7 Bɛdabɛ noko, mekɛ bie kɛ bɛbɔle bɛ ɛbɛla la ɛne.
8 Noko kɛkala, ɔwɔ kɛ bɛye ɛhye mɔ amuala bɛgua: ɛya, ahonle kpole, ninyɛndane, aholoba, na bɛmmamaa edwɛkɛ ɛtane fi bɛ nloa anu finde.
9 Bɛmmabɔ adalɛ bɛkile bɛ nwo. Bɛye subane* dɛba ne nee ye nyɛleɛ ne mɔ bɛgua,
10 na bɛva subane fofolɛ ne mɔɔ bɛlua nɔhalɛ ndelebɛbo zo bɛlɛyɛ ye fofolɛ kɛ mɔɔ Ahenle mɔɔ bɔle ye la subane ne de la bɛwula,
11 ɛleka mɔɔ Gilikinli anzɛɛ Dwuunli, mrenyia zo mɔɔ bɛpɛ anzɛɛ bɛtɛpɛle, ɛyɛvolɛ, Siteanenli,* akɛlɛ anzɛɛ dehelɛ ɛnle ɛkɛ; na Kelaese le ninyɛne muala na ɔwɔ ɔ muala anu la.
12 Bɛle menli mɔɔ Nyamenle ɛkpa bɛ, nwuanzanwuanzama nee alɔvolɛ, yemɔti bɛwula anwunvɔnezelɛ, atiakunlukɛnlɛma, mɛlɛbɛnwoaze,* bɛtɛɛyɛlɛ, nee abotane.
13 Saa bɛ nuhua bie lɛ edwɛkɛ tia ɔ gɔnwo bɔbɔ a, bɛhɔ zo bɛnyia abotane na bɛva bɛhyɛ bɛ nwo bɔkɔɔ. Kɛ mɔɔ Gyihova* ɛva bɛ ɛtane ɛhyɛ bɛ la, bɛdabɛ noko bɛyɛ ye zɔhane ala.
14 Na ɛhye mɔ amuala anzi, bɛwula ɛlɔlɛ, ɔluakɛ ɔmaa menli koyɛlɛ di munli.
15 Bieko, bɛmaa Kelaese anzodwolɛ ne ɛdɛnla bɛ ahonle nu,* ɔluakɛ bɛvɛlɛle bɛ bɛrale zɔhane anzodwolɛ ne anu wɔ sonlabaka ko anu. Na bɛhile anyezɔlɛ.
16 Bɛmaa Kelaese edwɛkɛ ne ɛyɛ gyima dɔɔnwo wɔ bɛ nu wɔ nrɛlɛbɛ muala anu. Bɛhɔ zo bɛva edwɛne, ayɛlɛyelɛ, nee sunsum nu moyɛlɛ edwɛne bɛhilehile bɛ nwo na bɛmaa bɛ nwo anwosesebɛ,* na bɛdo edwɛne wɔ bɛ ahonle nu bɛmaa Gyihova.*
17 Wɔ bɛ edwɛkɛ nee bɛ nyɛleɛ biala anu, bɛyɛ debie biala wɔ Awulae Gyisɛse duma nu na bɛlua ɔ nwo zo bɛyɛ Nyamenle Selɛ ne mo.
18 Yelɛma, bɛbɛlɛ bɛ nwo aze bɛmaa bɛ hu mɔ kɛ mɔɔ ɔfɛta wɔ Awulae anu la.
19 Kunlima, bɛhɔ zo bɛhulo bɛ ye mɔ, na bɛmmafa bɛ nwo ɛya kpole.*
20 Ngakula, bɛdie bɛ awovolɛ wɔ debie biala anu, ɔluakɛ ɛhye a sɔ Awulae anye a.
21 Selɛma, bɛmmaka bɛ mra ɛya na bɛ rɛle ambɔ.*
22 Ngɛkɛlɛ, bɛdie bɛ menle mɔ mɔɔ bɛwɔ azɛlɛ ye azo la wɔ debie biala anu, tɛ mekɛ mɔɔ menli ɛlɛnea bɛ la angome, kɛ bɛyɛ bɛazɔ menli nye ala, emomu bɛyeye bɛ ahonle nu bɛyɛ ye wɔ Gyihova* anwo ɛzulolɛ nu.
23 Debie biala mɔɔ bɛyɛ la, bɛvi ɛkɛla* muala anu bɛyɛ kɛ asɛɛ bɛyɛ bɛamaa Gyihova,* na tɛ menli ɔ,
24 ɔluakɛ bɛze kɛ Gyihova* ɛkɛ a bɛbanyia agyapadeɛ ne kɛ ahatualɛ a. Bɛzonle bɛ Menle Kelaese.
25 Nɔhalɛ nu, mɔɔ ɔyɛ ɛtane la banyia ye ɛtane ne anwo ahatualɛ, na ɔnnea sonla nyunlu.
Ɔbodwɛkɛ
^ Giliki, por·neiʹa. Nea Edwɛkɛbohilelɛ.
^ Giliki aneɛ nu, “sonla.”
^ “Siteanenli” kile awie mɔɔ ɔ nye ɛtɛbukele la.
^ Anzɛɛ “mɛlɛbɛnwoaze adwenle.”
^ Nea Edwɛkɛbohilelɛ.
^ Anzɛɛ “ɛhomo bɛ ahonle zo.”
^ Anzɛɛ “bɛdu bɛ nwo folɛ.”
^ Nea Edwɛkɛbohilelɛ.
^ Anzɛɛ “bɛmmayɛ bɛ nwo zo kyengye.”
^ Anzɛɛ “bɛ sa nu ando.”
^ Nea Edwɛkɛbohilelɛ.
^ Nea Edwɛkɛbohilelɛ, “Ɛkɛla.”
^ Nea Edwɛkɛbohilelɛ.
^ Nea Edwɛkɛbohilelɛ.
