Kɔlɔsaema 4:1-18
4 Bɛmɛ menlenlɛma, bɛ nee bɛ ngɛkɛlɛ ɛli ye wɔ adenle kɛnlɛma mɔɔ le kpalɛ la azo, ɔluakɛ bɛze kɛ bɛdabɛ noko bɛlɛ bɛ Menle wɔ anwuma.
2 Bɛyɛ asɔne dahuu, bɛmmabu bɛ nye bɛgua asɔneyɛlɛ zo, na bɛva moyɛlɛ bɛyɛ.
3 Mekɛ ko ne ala, bɛyɛ asɔne bɛmaa yɛdayɛ noko, amaa Nyamenle abuke adenle amaa yɛ na yɛabɔ Kelaese anwo fealeranu edwɛkɛ nwuanzanwuanza ne nolo, ɛhye ati a mela efiade a,
4 na meabɔ ye nolo kpalɛ kɛ mɔɔ ɔfɛta kɛ meyɛ ye la.
5 Bɛhɔ zo bɛ nee bɛdabɛ mɔɔ bɛmboka bɛ nwo la ɛlua nrɛlɛbɛ nu, na bɛva bɛ mekɛ bɛli gyima kpalɛ.*
6 Bɛmaa bɛ ɛdendɛlɛ ɛyɛ fɛ dahuu na ngyenle ɛrɛla nu, amaa bɛanwu kɛzi ɔwɔ kɛ bɛbua awie biala la.
7 Tekekɛse mɔɔ le me diema kulovolɛ nee sonvolɛ nɔhavo nee me gɔnwo akɛlɛ wɔ Awulae anu la baha me nwo edwɛkɛ kɔsɔɔti ahile bɛ.
8 Melɛsoa ye meara bɛ nwo lɔ amaa bɛanwu kɛzi yɛ nwo de la na yeamaa bɛ ahonle adɔ bɛ azule nu.
9 Ɔ nee Onɛsemɛse, me diema nɔhavo mɔɔ mekulo ye na ɔvi bɛ nehane la a ɛlɛba a; bɛbaha mɔɔ ɛlɛkɔ zo wɔ ɛke la amuala bɛahile bɛ.
10 Alesetaakɛse mɔɔ nee me la efiade la nee Maake mɔɔ le Baanabase busuanli (mɔɔ bɛhanle bɛhilele bɛ kɛ ɔba bɛ nehane a bɛlie ye kɛnlɛma) la,
11 yɛɛ Gyisɛse mɔɔ bɛfɛlɛ ye Gyɛsetɛse la biza bɛ, bɛboka bɛdabɛ mɔɔ bɛpɛ bɛ mrenyia zo la anwo. Ɛhye mɔ ala a le me gɔnwo mɔ gyimayɛvoma wɔ Nyamenle Belemgbunlililɛ ne anwo a, na bɛkyekye me rɛle* kpole kpalɛ.
12 Ɛpafelase mɔɔ le Kelaese Gyisɛse akɛlɛ na ɔvi bɛ nehane la biza bɛ. Dahuu ɔyɛ asɔne ɛsesebɛ ɔmaa bɛ amaa bɛagyinla kpundii kɛ menli mɔɔ ɛnyi sunsum nu la na bɛanyia anwodozo kpole wɔ Nyamenle ɛhulolɛdeɛ ne amuala anu.
13 Na medi ɔ nwo daselɛ kɛ ɔbɔ mɔdenle kpalɛ ɔmaa bɛ nee menli mɔɔ wɔ Lawɔdesia nee Hayɛleepɔlese la.
14 Luku, ayileyɛvolɛ kulovolɛ ne nee Dimase biza bɛ.
15 Mebiza mediema mɔɔ wɔ Lawɔdesia nee adiema raalɛ Nemefa nee asafo ne mɔɔ wɔ ye sua nu ɛkɛ ne la.
16 Na saa bɛkenga kɛlata ɛhye wɔ bɛ ɛkɛ bɛwie a, bɛyɛ ngyehyɛleɛ bɛmaa bɛgenga ye wɔ Lawɔdesiama asafo ne noko anu na bɛdabɛ noko bɛgenga Lawɔdesia ɛdeɛ ne.
17 Akee bɛha bɛhile Aakepɛse kɛ: “Nea ɛzonlenlɛ gyima ne mɔɔ ɛnyianle ye ɛvile Awulae ɛkɛ ne la azo boɛ, amaa wɔayɛ wɔawie.”
18 Mebiza bɛ, medame Pɔɔlo, me sa anloa ɛne. Bɛhakye kɛ mela efiade. Ɛlolɛ ɛha bɛ.
