Galeehyeama 1:1-24
1 Medame Pɔɔlo, mɔɔ mele ɛzoanvolɛ mɔɔ tɛ sonla a kpale me, emomu Gyisɛse Kelaese nee Nyamenle Selɛ ne mɔɔ dwazole ye vile mowuamra anu la a kpale me la,
2 me nee mediema mɔɔ boka me nwo la amuala ɛlɛkɛlɛ ahɔmaa Galeehyea asafo ne mɔ:
3 Yɛ Ze Nyamenle nee Awulae Gyisɛse Kelaese ɛlo bɛ na ɔmaa bɛ anzodwolɛ.
4 Ɔvale ɔ nwo ɔmaanle amaa yealie yɛ yeavi ɛtane ewiade ɛhye* mɔɔ wɔ ɛkɛ la anu kɛ mɔɔ yɛ Nyamenle nee yɛ Ze ne kulo la,
5 anyunlunyia ɛha Nyamenle dahuu. Amen.
6 Ɔyɛ me nwanwane kɛ bɛlɛtwe bɛ nwo ndɛndɛ* bɛavi Ahenle mɔɔ luale Kelaese ɛlolɛ ne azo vɛlɛle bɛ la anwo bɛahɔ edwɛkpa fofolɛ nwo la.
7 Tɛ edwɛkpa fofolɛ bie ɔ; emomu menli bie a ɛlɛgyegye bɛ na bɛkpondɛ kɛ bɛsɛkye Kelaese anwo edwɛkpa ne a.
8 Noko, saa yɛdayɛ anzɛɛ anwumabɔvolɛ bɔbɔ vi anwuma baka edwɛkpa fofolɛ bie kile bɛ wɔ edwɛkpa ne mɔɔ yɛhanle yɛhilele bɛ la anzi a, munzule ɛha ye.
9 Yɛha, na eza mesi zolɛ bieko, Awie biala mɔɔ ɔlɛka edwɛkpa fofolɛ bie wɔ mɔɔ bɛlie bɛli la anzi la, munzule ɛha ye.
10 Ɛnee akee sonla a melɛbɔ mɔdenle kɛ menyia ɔ nyunlu ɛlolɛ a anzɛɛ Nyamenle ɔ? Anzɛɛ melɛbɔ mɔdenle kɛ mesɔ menli nye ɔ? Saa menli nye a melɛsɔ a, anrɛɛ menle Kelaese akɛlɛ.
11 Mediema, mekpondɛ kɛ bɛnwu ye kɛ edwɛkpa ne mɔɔ membɔle ye nolo mengilele bɛ la ɛnvi sonla ɛkɛ;
12 ɔluakɛ meanlie meanvi sonla ɛkɛ, yɛɛ tɛ awie a hilehilele me a, emomu, Gyisɛse Kelaese mumua ne a yele hilele me a.
13 Bɛde kɛ mekɛ mɔɔ mewɔ Dwuuma ɛzonlenlɛ ne anu la, menyɛle Nyamenle asafo ne kpɔdekpɔde ɛsesebɛ* na menyɛle kɛ mesɛkye ye bɔkɔɔ;
14 na menyianle anyuhɔlɛ wɔ Dwuuma ɛzonlenlɛ ne anu mendɛlale me tipɛnema dɔɔnwo wɔ me maanle nu, ɔluakɛ ɛnee mebɔ me ze mɔ ngilehilelɛ ne anwo mɔdenle kpalɛ.
15 Noko mekɛ mɔɔ Nyamenle mɔɔ maanle me mame wole me na ɔluale ye ɛlolɛ ne azo ɔvɛlɛle me la nwunle kɛ ɔle kpalɛ
16 kɛ ɔye ɔ Ra ne ɔkile me amaa meabɔ ɔ nwo edwɛkpa ne nolo meahile maanle maanle ne la, meanyɛ ye ndɛ meangɔmbiza sonla biala adwenle;*
17 yɛɛ meangɔ menli mɔɔ limoale me nyunlu yɛle ɛzoanvolɛma la ɛkɛ wɔ Gyɛlusalɛm, emomu mengɔle Areleebea, na nzinlii menziale membale Dɛmasekɛse.
18 Akee ɛvolɛ nsa anzi mengɔle Gyɛlusalɛm kɛ mekakpɔla Sifase,* na mendɛnlanle ɔ nwo ɛkɛ kenle 15.
19 Noko meannwu ɛzoanvolɛma ne mɔɔ ɛha la biala kɛ Awulae adiema Gyemise ala.
20 Nyamenle di daselɛ kɛ ninyɛne mɔɔ melɛkɛlɛ meamaa bɛ la le nɔhalɛ.
21 Nzinlii mengɔle Selea nee Selesea maanzinli ne mɔ anu.
22 Noko ɛnee Kelaese asafo ne mɔ mɔɔ wɔ Dwudiya la biala ɛnze me.
23 Mɔɔ ɛnee bɛte la a le kɛ: “Nrenyia ne mɔɔ yɛle yɛ kpɔdekpɔde mekɛ bie la ɛnɛ ɛlɛbɔ diedi ne mɔɔ alimoa ne ɔzɛkyele ye la anwo edwɛkpa ne nolo.”
24 Na medame ti bɛbɔle ɔ bo bɛwulale Nyamenle anyunlunyia.
Ɔbodwɛkɛ
^ Anzɛɛ “munzule mekɛ.” Nea Edwɛkɛbohilelɛ.
^ Anzɛɛ “bɛlɛyɛ ye ndɛ bɛanriandi.”
^ Giliki aneɛ nu, “memaanle ɔbole zo.”
^ Giliki aneɛ nu, “nwonane nee mogya biala.”
^ Eza bɛfɛlɛ ye Pita.
