Galeehyeama 2:1-21
2 Ye ɛvolɛ 14 anzi, me nee Baanabase hɔle Gyɛlusalɛm bieko, menvale Taetɛse noko membokale me nwo.
2 Mengɔle, ɔluakɛ bɛyele bɛhilele me kɛ ɔwɔ kɛ mekɔ, na menvale edwɛkpa ne mɔɔ melɛbɔ ye nolo wɔ maanle maanle ne anu la mendole bɛ nyunlu. Menyɛle ɛhye wɔ mediema mɔɔ bɛbu bɛ kpalɛ la anyunlu amaa gyima ne mɔɔ melɛyɛ anzɛɛ menyɛle la anyɛ mgbane.
3 Noko, Taetɛse mɔɔ le Gilikinli bɔbɔ mɔɔ ɛnee boka me nwo la, bɛanga bɛangile ye kɛ ɔpɛ ye mrenyia zo.
4 Noko edwɛkɛ ɛhye rale ɔluakɛ mediema adalɛma veale bɛ nwo rale yɛ nu kɛ bɛbanlea fanwodi ne mɔɔ yɛlɛ ye wɔ Kelaese Gyisɛse anu la, amaa bɛava yɛ bɛayɛ ngɛkɛlɛ bɔkɔɔ;
5 yɛammaa bɛ adenle fee, kyɛkyɛ, wɔ mekɛ ekyi* bɔbɔ anu, amaa edwɛkpa ne anwo nɔhalɛ ne ahɔ zo adɛnla bɛ nu.
6 Noko bɛdabɛ mɔɔ bɛbu bɛ kpalɛ la ɛdeɛ—kɛzi bɛde ye biala la ɛnvale me nwo, ɔluakɛ Nyamenle ɛnnea sonla nyunlu—meannyia debie biala meanvi bɛdabɛ mɔɔ bɛbu bɛ kpalɛ la ɛkɛ.
7 Noko, mekɛ mɔɔ bɛnwunle kɛ bɛva edwɛkpa ne bɛwula me sa nu kɛ menga mengile bɛdabɛ mɔɔ bɛtɛpɛle bɛ mrenyia zo, kɛ mɔɔ Pita ɛyɛ ɛmaa bɛdabɛ mɔɔ bɛpɛ bɛ mrenyia zo la—
8 ɔluakɛ ahenle mɔɔ maanle Pita tumi kɛ ɔyɛ ɛzoanvolɛ wɔ bɛdabɛ mɔɔ bɛpɛ bɛ mrenyia zo avinli la noko a maanle me tumi wɔ bɛdabɛ mɔɔ bɛwɔ maanle maanle ne anu la avinli a—
9 na mekɛ mɔɔ Gyemise nee Sifase* nee Dwɔn mɔɔ bɛle kɛ pila la nwunle ɛlolɛ ne mɔɔ bɛva bɛmaa me la, bɛzomanle me nee Baanabase asa anu bɛvale bɛhilele kɛ bɛlie yɛ bɛdo nu,* na ɔwɔ kɛ yɛkɔ maanle maanle ne anu na bɛmɛ bɛkɔ bɛdabɛ mɔɔ bɛpɛ bɛ mrenyia zo la anu.
10 Mɔɔ bɛhanle bɛhilele yɛ la a le kɛ anrɛɛ yɛhakye ehyiavolɛma, na ɛhye noko a melɛbɔ mɔdenle ɛsesebɛ kɛ meyɛ a.
11 Noko mɔɔ Sifase* rale Anteɔko la, mendwile ɔ nyunlu,* ɔluakɛ ɛnee mɔɔ ɔlɛyɛ la ɛnle kpalɛ.
12 Alimoa ne mɔɔ menli bie mɔɔ Gyemise zoanle bɛ la ɛtɛbale la, ɛnee ɔ nee maanle maanle ne anu amra di debie; noko mekɛ mɔɔ bɛrale la, ɔgyakyile ɛhye ɛyɛlɛ na ɔhwenle ɔ nwo ɔvile bɛ nwo, ɛnee ɔsulo bɛdabɛ mɔɔ bɛgyi mrenyia zo ɛpɛlɛ ne anzi la.
13 Dwuuma mɔɔ ɛha la noko hɔbokale ɔ nwo wɔ nabalaba nyɛleɛ ɛhye anu, na Baanabase bɔbɔ bɔle bɛ nabalaba ɛbɛla ɛhye bie.
14 Noko mekɛ mɔɔ menwunle kɛ bɛnlua edwɛkpa ne anwo nɔhalɛ adenle ne anu la, menganle mengilele Sifase* wɔ bɛ muala bɛ nyunlu ɛkɛ ne kɛ: “Saa wɔmɔ mɔɔ ɛle Dwuunli la ɛbɔ wɔ ɛbɛla kɛ maanle maanle ne anu amra na ɛnyɛ ye kɛ Dwuuma la a, ɛnee duzu ati a ɛkpondɛ kɛ maanle maanle ne anu amra bɔ bɛ ɛbɛla kɛ Dwuuma ɛ?”
15 Yɛle Dwuuma, yɛnle kɛ maanle maanle ne anu amra mɔɔ bɛyɛ ɛtane la,
16 yɛnwu kɛ tɛ mɛla gyima zo a bɛdua bɛbua awie benle a, emomu bɛdua Gyisɛse Kelaese anu diedi zo. Yemɔti yɛnyia Kelaese Gyisɛse anu diedi amaa bɛalua Kelaese anu diedi zo bɛabua yɛ benle na tɛ mɛla gyima zo ɔ, ɔluakɛ bɛnrɛlua mɛla gyima zo bɛnrɛbua awie biala* benle.
17 Na saa bɛnwu yɛdayɛ noko kɛ ɛtanevolɛma wɔ mekɛ mɔɔ yɛkpondɛ kɛ bɛdua Kelaese anwo zo bɛbua yɛ benle la a, ɛnee Kelaese le ɛtane sonvolɛ ɔ? Kyɛkyɛ!
18 Na saa mɔɔ mekɛ bie membule menguale la a melɛsi ye bieko a, ɛnee ɔda ali kɛ melɛto mɛla.
19 Ɔluakɛ ɔlua mɛla zo menwule memaanle mɛla, amaa meadɛnla aze meamaa Nyamenle.
20 Bɛbɔ me baka nu bɛboka Kelaese anwo. Tɛ medame a mede aze bieko a, emomu Kelaese mɔɔ de me nu la ɔ. Nɔhalɛ nu, kɛzi mede aze kɛkala wɔ nwonane nu la, mede ye wɔ Nyamenle Ara ne mɔɔ hulole me na ɔvale ɔ nwo ɔmaanle me la anu diedi nu.
21 Memkpo Nyamenle ɛlolɛ ne,* ɔluakɛ saa bɛdua mɛla zo bɛbua awie benle a, ɛnee noko Kelaese ɛwu mgbane.
Ɔbodwɛkɛ
^ Giliki aneɛ nu, “wɔ dɔnehwele ko.”
^ Eza bɛfɛlɛ ye Pita.
^ Anzɛɛ “kɛ yɛle agɔnwolɛ.”
^ Eza bɛfɛlɛ ye Pita.
^ Anzɛɛ “menganle menzile ɔ nyunlu.”
^ Eza bɛfɛlɛ ye Pita.
^ Giliki aneɛ nu, “nwonane biala.”
^ Anzɛɛ “menva Nyamenle ɛlolɛ ne menzie ahane.”
