Galeehyeama 6:1-18
6 Mediema, saa awie fo adenle kolaa na ɔ nye ara ɔ nwo zo bɔbɔ a, bɛdabɛ mɔɔ bɛnyi sunsum nu la ɛlua mɛlɛbɛnwoaze adenle zo ɛdenrɛ ye. Noko bɛnlea bɛ nwo boɛ na bɛanzɔ bɛdabɛ noko bɛannea.
2 Bɛhɔ zo bɛboa bɛ nwo ngoko wɔ ninyɛne mɔɔ anu yɛ ɛlomboɛ la anu, na ɔlua zo bɛali Kelaese mɛla ne azo.
3 Na saa awie dwenle kɛ ɔ nwo hyia noko ɔnle ɛhwee a, ɛnee ɔlɛbɛlɛbɛla ɔ nwo.
4 Noko bɛmaa awie biala ɛnleɛnlea ɔdaye ye nyɛleɛ nu, na yeanyia debie yeava yeadu ɔ nwo, na ɔmmafa ɔ nwo ɔtoto awie mɔ anwo.
5 Ɔluakɛ awie biala ɔdaye ɔbazoa ye adesoa.*
6 Bieko, bɛmaa awie biala mɔɔ bɛhilehile ye edwɛkɛ ne la ɛmaa ye kilehilevolɛ ne ninyɛne mgbalɛ mɔɔ ɔkɛnyia la bie.
7 Bɛmmabɛlɛbɛla bɛ nwo: Nyamenle ɛnle awie mɔɔ bɛbɛlɛbɛla ye a.* Na mɔɔ sonla kɛlua la yɛɛ ɔbu a;
8 ɔluakɛ mɔɔ dua maa ɔ nwonane ne la balua ɔ nwonane ne azo anyia ɛzɛkyelɛ, na mɔɔ dua maa sunsum ne la balua sunsum ne azo anyia dahuu ngoane.
9 Yemɔti bɛmmamaa yɛgyakyi kpalɛyɛlɛ, ɔluakɛ saa yɛangyakyi a,* yɛbanyia zolɛ nvasoɛ wɔ mekɛ kpalɛ nu.
10 Ɛhye ati, mekɛ biala mɔɔ yɛkɛnyia nwolɛ adenle ne la, bɛmaa yɛyɛ kpalɛ yɛmaa menli kɔsɔɔti, titili bɛdabɛ mɔɔ yɛ nee bɛ lɛ diedi ko la.
11 Bɛnlea kɛzi medame mumua ne meva me sa mehɛlɛ bɛ mgbole la.
12 Bɛdabɛ mɔɔ bɛkulo kɛ bɛsɔ menli nye la kɔsɔɔti a ɛlɛbɔ mɔdenle kɛ bɛmaa bɛapɛ bɛ mrenyia zo a, bɛlɛyɛ ɛhye amaa bɛanyɛ bɛ kpɔdekpɔde wɔ Kelaese amaneɛnwunlɛ baka* ne anwo.
13 Ɔluakɛ bɛdabɛ mɔɔ bɛlɛmaa bɛapɛ bɛ mrenyia zo bɔbɔ la ɛnli Mɛla ne azo, noko bɛkpondɛ kɛ bɛmɛ bɛpɛ bɛ mrenyia zo amaa bɛanyia debie wɔ bɛ sonlabaka ne anwo bɛava bɛadu bɛ nloa anu.
14 Noko mame, menrɛdu me nloa anu kyesɛ yɛ Awulae Gyisɛse Kelaese amaneɛnwunlɛ baka* ne anwo ala, yemɔ a ɔlua ɔ nwo zo bɛhu ewiade ne* bɛmaa me na bɛhu medame noko bɛmaa ewiade ne a.
15 Na saa yɛpɛ yɛ mrenyia zo o, yɛampɛ yɛ mrenyia zo o, ɔngyia, mɔɔ hyia la a le kɛ yɛkɛyɛ abɔdeɛ fofolɛ.
16 Na bɛdabɛ mɔɔ bɛdua adenle ɛhye azo bɛbɔ bɛ ɛbɛla kɛnlɛma la amuala, anzodwolɛ nee anwunvɔnezelɛ ɛha bɛ, ɛhɛe, Nyamenle Yizilayɛ ne.
17 Ɔvi ɛnɛ mɔɔ kɔ la, awie biala mmagyegye me, ɔluakɛ ahapenle mɔɔ wɔ me nwo la kile kɛ mele Gyisɛse akɛlɛ.
18 Mediema, yɛ Awulae Gyisɛse Kelaese ɛlolɛ ne nee sunsum ne mɔɔ bɛda ye ali la ɛdɛnla. Amen.
Ɔbodwɛkɛ
^ Anzɛɛ “ye gyimalilɛ nwo adesoa.”
^ Giliki aneɛ nu, “bɛgolo ɔ nwo a.”
^ Giliki aneɛ nu, “saa yɛanvɛ a.”
^ Nea Edwɛkɛbohilelɛ.
^ Nea Edwɛkɛbohilelɛ.
^ Anzɛɛ “bɛhu ewiade ne baka zo.”
