Maake 10:1-52
-
Agyalɛ nee ewolebɔlɛ (1-12)
-
Gyisɛse yila ngakula (13-16)
-
Kpavolɛ sukoavolɛ bie kpuya (17-25)
-
Belemgbunlililɛ ne anwo afɔlebɔlɛ (26-31)
-
Bɛhanle Gyisɛse ewule ne bɛdole ɛkɛ bieko (32-34)
-
Gyemise nee Dwɔn biza debie (35-45)
-
Gyisɛse le ɛkpɔnedeɛ maa menli dɔɔnwo (45)
-
-
Anyezinliravolɛ Baatemeɛse ayileyɛlɛ (46-52)
10 Ɔvi ɛkɛ ne ɔdwazole na ɔhɔle Dwudiya ɛweɛne zo wɔ Dwɔdan ne anzi, na menli dɔɔnwo boɔboale bɛ nloa wɔ ɔ nwo ɛkɛ ne bieko. Na kɛ mɔɔ ɔta ɔyɛ la, eza ɔbɔle ɔ bo ɔhilehilele bɛ.
2 Na Falasiima rale ɔ nwo ɛkɛ, na kɛmɔ bɛkulo kɛ bɛsɔ ye bɛnea la ati, bɛbizale ye saa mɛla maa adenle kɛ nrenyia kola bɔ ɔ ye ewole a.
3 Ɔbuale bɛ kɛ: “Duzu mɛla a Mosisi vale maanle bɛ a?”
4 Bɛhanle kɛ: “Mosisi maanle adenle kɛ bɛkola bɛkɛlɛ ewolebɔlɛ kɛlata na bɛgyakyi ye.”
5 Na Gyisɛse zele bɛ kɛ: “Bɛ ahonle ɛsesebɛ ne ati a ɔhɛlɛle mɛla ɛhye ɔmaanle bɛ a.
6 Noko, ɔvi abɔdeɛ mɔlebɛbo ne, ‘Ɔbɔle bɛ nrenyia nee raalɛ.
7 Ɛhye ati nrenyia bagyakyi ye papa nee ye mame ɛkɛ,
8 na bɛ mu nwiɔ bɛayɛ nwonane ko,’ yemɔti bɛnle nwiɔ bieko, emomu nwonane ko.
9 Zɔhane ati, mɔɔ Nyamenle ɛha ɛbɔ nu la, mmamaa awie biala kpakye nu.”
10 Mekɛ mɔɔ eza bɛwɔ sua nu la, ɛdoavolɛma ne bɔle ɔ bo bizale ye ɛhye anwo edwɛkɛ.
11 Ɔzele bɛ kɛ: “Awie biala mɔɔ kɛbɔ ɔ ye ewole na ɔkɛgya fofolɛ la ɛzɛkye agyalɛ, yeyɛ ɛtane yetia ɔ ye,
12 na saa raalɛ bɔ ɔ hu ewole na nzinlii ɔkɔ agyalɛ fofolɛ a, ɛnee yezɛkye agyalɛ.”
13 Akee menli bɔle ɔ bo vale ngakula rale kɛ ɔva ɔ sa ɔgua bɛ nwo zo, noko ɛdoavolɛma ne deanle bɛ.
14 Mɔɔ Gyisɛse nwunle ye la, ɔvale ɛya na ɔzele bɛ kɛ: “Bɛmaa ngakula ne mɔ ɛrɛla me nwo, bɛmmasi bɛ adenle, ɔluakɛ Nyamenle Belemgbunlililɛ ne le bɛdabɛ mɔɔ bɛle kɛ ɛhye mɔ zɛhae la ɛdeɛ.
15 Nɔhalɛ nu, meka meahile bɛ, awie biala mɔɔ ɛnlie Nyamenle Belemgbunlililɛ ne kɛ kakula ekyi la ɛnrɛhɔ nu ɛlɛ.”
16 Na ɔmaanle ngakula ne mɔ zo ɔziele ɔ gyakɛ azo, na ɔvale ɔ sa ɔguale bɛ nwo zo ɔyilale bɛ.
17 Mɔɔ ɔlɛkɔ la, nrenyia bie nriandile rahotole ɔ nyunlu ɛkɛ na ɔbizale ye kɛ: “Kilehilevolɛ Kpalɛ, duzu a ɔwɔ kɛ meyɛ na meanyia dahuu ngoane a?”
18 Gyisɛse zele ye kɛ: “Duzu ati a ɛfɛlɛ me kpalɛ ɛ? Awie biala ɛnle kpalɛ kɛ Nyamenle angomekye.
19 Ɛze mɛla ne mɔ: ‘Mmayɛ kodiawu, mmasɛkye agyalɛ, mmawua, mmadi daselɛ adalɛ, mmasisi awie, di wɔ papa nee wɔ mame eni.’”
20 Nrenyia ne zele ye kɛ: “Kilehilevolɛ, meli ninyɛne ɛhye mɔ kɔsɔɔti azo sumunli me ngakula nu.”
21 Gyisɛse nleanle ye na ɔhulole ye na ɔhanle kɛ, “Yeha wɔ debie ko: Kɔdɔne ninyɛne mɔɔ ɛlɛ la na fa ezukoa ne maa ehyiavolɛma, na ɛbanyia anwonyia wɔ anwuma; na bɛla badoa me.”
22 Na mualɛ ne maanle ɔ rɛle bɔle na ɔvale alɔbɔlɛ ɔhɔle, ɔluakɛ ɛnee ɔlɛ agyapadeɛ dɔɔnwo.
23 Gyisɛse nleanle menli mɔɔ wɔ ɛkɛ ne la na ɔzele ye ɛdoavolɛma ne kɛ: “Nea kɛzi ɔbayɛ se yeamaa bɛdabɛ mɔɔ bɛlɛ ezukoa la kɛ bɛbahɔ Nyamenle Belemgbunlililɛ ne anu a!”
24 Noko ye edwɛkɛ ne zinle ye ɛdoavolɛma ne anwo. Akee Gyisɛse buale kɛ: “Me mra, bɛnlea kɛzi ɔyɛ se kɛ awie kɛhɔ Nyamenle Belemgbunlililɛ ne anu a!
25 Ɔnyɛ se kɛ afunlumu kɛwolo agbuyia nye* nu tɛla kɛ sukoavolɛ kɛhɔ Nyamenle Belemgbunlililɛ ne anu.”
26 Akee ɔzinle bɛ nwo kpole na bɛzele ye* kɛ: “Ɛnee akee nwane a kɛnyia ngoane a?”
27 Gyisɛse nleanle bɛ koonwu na ɔhanle kɛ: “Sonla ɛdeɛ ɛhye yɛ se maa ye, noko Nyamenle ɛdeɛ ɔnle zɔ, ɔluakɛ Nyamenle kola yɛ debie biala.”
28 Pita zele ye kɛ: “Nea! Yɛgyakyi debie biala yɛɛ yɛdoa wɔ a.”
29 Gyisɛse hanle kɛ: “Nɔhalɛ nu meka meahile bɛ kɛ, awie biala ɛnle ɛkɛ mɔɔ yegyakyi sua anzɛɛ mediema mrenyia anzɛɛ mediema mraalɛ anzɛɛ papa anzɛɛ mame anzɛɛ mralɛ anzɛɛ azɛlɛ wɔ me nee edwɛkpa ne ati
30 mɔɔ ɔnrɛnyia bɛ mɔnwo 100 kɛkala wɔ mekɛ ɛhye anu—azua, mediema mrenyia, mediema mraalɛ, mame mɔ, mralɛ nee azɛlɛ mɔɔ kpɔdekpɔdeyɛlɛ boka nwo—nee dahuu ngoane wɔ mekɛ ne* mɔɔ ɛlɛba la anu a.
31 Noko alimoama dɔɔnwo bali amozi, na amozi amra alimoa.
32 Ɛnee bɛlua adenle zo bɛlɛkɔ Gyɛlusalɛm, na ɛnee Gyisɛse li bɛ nyunlu, yemɔti ɔzinle bɛ nwo, yɛɛ ɛzulolɛ hanle bɛdabɛ mɔɔ bɛdoa bɛ la. Ɔvale Bulu Nee Nwiɔ ne ɔhɔle ahane bieko na ɔbɔle ɔ bo ɔhanle ninyɛne ɛhye mɔ mɔɔ bado ye la ɔhilele bɛ kɛ:
33 “Nea! Yɛlɛkɔ Gyɛlusalɛm, na bɛbaye sonla Ra ne bɛamaa ɛsɔfo mgbanyinli nee mɛla kilehilevolɛma ne mɔ. Bɛbabua ye ewule fɔlɛ na bɛaye ye bɛamaa maanle maanle ne anu amra,
34 na menli ɛhye mɔ bagolo ɔ nwo, atoto nyɛlɛ wɔ ɔ nwo, abila ye empele na bɛahu ye, noko ye kenle nsa ne azo ɔbadwazo.”
35 Gyemise nee Dwɔn, Zɛbɛdi amra ne mɔ hɔle ɔ nwo ɛkɛ na bɛzele ye kɛ: “Kilehilevolɛ, yɛkulo kɛ ɛyɛ debie biala mɔɔ yɛbabiza wɔ la ɛmaa yɛ.”
36 Ɔbizale bɛ kɛ: “Duzu a bɛkpondɛ kɛ meyɛ memaa bɛ a?”
37 Bɛbuale kɛ: “Anrɛɛ maa yɛ nee wɔ ɛdɛnla, ko ɛdɛnla wɔ fema zo na ko ɛdɛnla wɔ bɛne zo wɔ wɔ anyunlunyia ne anu.”
38 Noko Gyisɛse zele bɛ kɛ: “Bɛnze mɔɔ bɛlɛbiza la. Asoo bɛbahola bɛanlo kanrɛlɛ ne mɔɔ mebanlo nu la anu anzɛɛ bɛbahola bɛazɔne bɛ kɛ mɔɔ bɛlɛsɔne me la ɔ?”
39 Bɛzele ye kɛ: “Yɛbahola.” Na Gyisɛse zele bɛ kɛ: “Kanrɛlɛ ne mɔɔ melɛno nu la, bɛbanlo nu, yɛɛ ɛzɔnenlɛ ne mɔɔ bɛlɛsɔne me la, bɛbazɔne bɛ bie.
40 Noko me sa fema anzɛɛ bɛne zo ɛdɛnlanlɛ ɛdeɛ, ɔnle me ɛdeɛ na meava meamaa, emomu ɔle bɛdabɛ mɔɔ bɛziezie bɛmaa bɛ la ɛdeɛ.”
41 Mekɛ mɔɔ bulu ne mɔɔ ɛha la dele ɛhye la, bɛvale Gyemise nee Dwɔn anwo ɛya.
42 Noko Gyisɛse vɛlɛle bɛ ɔ nwo ɛkɛ na ɔzele bɛ kɛ: “Bɛze kɛ bɛdabɛ mɔɔ bɛbu bɛ kɛ maanle maanle arelemgbunli la kile bɛ tumi wɔ bɛ menli nwo zo yɛɛ bɛ menli titili di bɛ nwo zo tumi.
43 Noko bɛmɛ, bɛnle zɔ; emomu awie biala mɔɔ kpondɛ kɛ ɔyɛ kpole wɔ bɛ nu la ɛyɛ bɛ sonvolɛ,
44 na awie biala mɔɔ kpondɛ kɛ ɔdi bɛ nyunlu la ɛyɛ bɛ muala bɛ akɛlɛ.
45 Ɔluakɛ sonla Ra ne bɔbɔ amba kɛ bɛzonle ye, emomu, ɔrale kɛ ɔbazonle na yeava ye ngoane* yeayɛ ɛkpɔnedeɛ yealie menli dɔɔnwo.”
46 Akee bɛrale Gyɛleko. Na mɔɔ ɔ nee ye ɛdoavolɛma ne nee menli dɔɔnwo bie ɛlɛfi Gyɛleko ahɔ la, ɛnee Baatemeɛse, (Temeɛse ara), anyenzinliravolɛ bie mɔɔ sɛlɛzɛlɛ debie la, de adenle ne anloa.
47 Mekɛ mɔɔ ɔdele kɛ Gyisɛse mɔɔ vi Nazalɛte la a ɛlɛse la, ɔbɔle ɔ bo ɔdeɛdeanle nu ɔhanle kɛ: “Devidi Ara, Gyisɛse, nwu me anwunvɔne!”
48 Na menli dɔɔnwo bɔle ɔ bo deanle ye, na bɛzele ye kɛ ɔyɛ koonwu, noko ɔhɔle zo ɔdeanle nu kpalɛ kɛ: “Devidi Ara, nwu me anwunvɔne!”
49 Yemɔti Gyisɛse gyinlanle na ɔhanle kɛ: “Bɛvɛlɛ ye bɛmaa me.” Ɔti bɛvɛlɛle nrenyia anyenzinliravolɛ ne na bɛzele ye kɛ: “Ka wɔ ahonle to azule nu! Dwazo; ɔlɛfɛlɛ wɔ.”
50 Ɔvuandinle ye tɛladeɛ aguzo ne ɔguale, ɔdwazole ndɛndɛ na ɔhɔle Gyisɛse anwo ɛkɛ.
51 Akee Gyisɛse bizale ye kɛ: “Duzu a ɛkulo kɛ meyɛ memaa wɔ a?” Nrenyia anyenzinliravolɛ ne buale ye kɛ: “Relabonae,* maa menwu debie.”
52 Na Gyisɛse zele ye kɛ: “Kɔ. Wɔ diedi ɛmaa wɔde kpɔkɛ.” Na ɛkɛ ne ala ɔnwunle debie na ɔbɔle ɔ bo ɔdoale ye.
Ɔbodwɛkɛ
^ Anzɛɛ “tokule.”
^ Anzɛɛ ɔkola ɔkile, “bɛ nwo ngoko.”
^ Nea Edwɛkɛbohilelɛ.
^ Anzɛɛ “ɛkɛla.”
^ Ɔkile “Kilehilevolɛ.”
