Maake 13:1-37
13 Mekɛ mɔɔ ɔvi ɛzonlenlɛ sua ne anu ɔlɛfinde la, ye ɛdoavolɛma ne mɔ ko zele ye kɛ: “Kilehilevolɛ, nea! awolɛ nee azua ngɛnlɛma boni ɛne!”
2 Noko, Gyisɛse zele ye kɛ: “Bɛnwu azua mgbole ɛhye mɔ ɔ? Kɛ ɔde ye biala la bɛnrɛgyakyi bolɛ wɔ bolɛ zo wɔ ɛke mɔɔ bɛnrɛdwula ye aze a.”
3 Mɔɔ ɔde Ɔlivi Boka ne azo na ɔ nye dua ɛzonlenlɛ sua ne la, Pita, Gyemise, Dwɔn, nee Andelu bizale ye wɔ ahane kɛ:
4 “Ka kile yɛ, mekɛ boni a ninyɛne ɛhye mɔ bazi a, na duzu a bayɛ ninyɛne ɛhye mɔ awieleɛ ne anwo sɛkɛlɛneɛ a?”
5 Yemɔti ɔbɔle ɔ bo ɔhanle ɔhilele bɛ kɛ: “Bɛnlea boɛ na awie ambɛlɛbɛla bɛ.
6 Menli dɔɔnwo bava me duma ara na bɛaha kɛ, ‘Mame a mele Kelaese ne a,’ na bɛbabɛlɛbɛla menli dɔɔnwo.
7 Bieko, saa bɛte konle mɔɔ bikye bɛ nee konle mɔɔ wɔ moamoa la anwo amaneɛbɔlɛ a, bɛnlea na bɛ ahonle andu; ɔwɔ kɛ ninyɛne ɛhye mɔ sisi noko ɛnee awieleɛ ne ɛtɛnyianle ɛtɛbale.
8 “Na maanle badwazo atia maanle yɛɛ belemgbunlililɛ badwazo atia belemgbunlililɛ; azɛlɛkpusulɛ bara ɛleka dɔɔnwo; ɛhɔne noko bara. Ɛhye mɔ le awolɛ nyanedelɛ mɔlebɛbo.
9 “Bɛmɛ, bɛnlea bɛ nwo boɛ. Menli bava bɛ ahɔ kɔɔto, yɛɛ bɛbabo bɛ wɔ nyianu azua ne mɔ anu na bɛava bɛ bɛagyinla amɛnladoma nee arelemgbunli nyunlu ɔlua me ti, amaa yeayɛ daselɛ yeamaa bɛ.
10 Eza ɔwɔ kɛ bɛdimoa bɛbɔ edwɛkpa ne nolo wɔ maanle maanle kɔsɔɔti anu.
11 Na saa bɛ nee bɛ ɛlɛkɔ bɛahɔye bɛ bɛamaa a, bɛmmadwenledwenle mɔɔ bɛbaha la anwo; na mɔɔ bɛbava bɛamaa bɛ wɔ dɔnehwele zɔhane anu la, bɛha yemɔ ala, ɔluakɛ tɛ bɛmɛ a bɛbadendɛ a, emomu sunsum nwuanzanwuanza ne.
12 Bieko, adiema baye adiema amaa yeamaa bɛahu ye, na papa aye ɔ ra amaa, yɛɛ ngakula badwazo atia bɛ awovolɛ na bɛamaa bɛahu bɛ.
13 Na me duma ne ati menli kɔsɔɔti bakpɔ bɛ. Na mɔɔ kɛgyinla nu kɛhɔ awieleɛ la bɛbalie ye ngoane.
14 “Noko, saa bɛnwu kyibadeɛ ne mɔɔ bɔ maanle la kɛ ɔgyi ɛleka mɔɔ ɔnle kɛ ɔgyinla la a (maa kengavolɛ ne ɛva nwunu ɛli gyima), akee bɛmaa bɛdabɛ mɔɔ bɛwɔ Dwudiya la ɛbɔ ɔ bo ɛnriandi ɛhɔ awoka ne mɔ azo.
15 Mɔɔ wɔ sua ti zo la mmadwu aze anzɛɛ mmakɔ ye sua ne anu kɛ ɔkava debie;
16 na mɔɔ wɔ ɛbɔ nu la mmasia ba ninyɛne mɔɔ yegyakyi ye ɔ nzi la anwo kɛ ɔbava ye tɛladeɛ aguzo.
17 Mekɛ ne anu, nrenzɛvolɛma nee bɛdabɛ mɔɔ bɛmaa ngakula nyɛfonlɛ la, bɛ gyakɔ!
18 Bɛhɔ zo bɛyɛ asɔne na yeanzi fɔsɛlɛ nu;
19 ɔluakɛ mekɛ zɔhane bayɛ anwongyelelɛ mekɛ mɔɔ ɔvi abɔdeɛ mɔɔ Nyamenle bɔle la mɔlebɛbo too mɔɔ badwu zɔhane mekɛ ne la, bie ɛtɛsile ɛlɛ yɛɛ bie noko ɛnrɛzi ɛlɛ.
20 Nɔhalɛ nu, saa Gyihova* ampɛ mekɛ ne azo a, bɛnrɛlie nwonane biala ngoane. Noko ɔlua bɛdabɛ mɔɔ yekpa bɛ la ati yepɛ mekɛ ne azo.
21 “Akee saa awie ka kile bɛ kɛ, ‘Nea! Kelaese ne wɔ ɛke,’ anzɛɛ ‘Nea! Yemɔ a wɔ nehane la a,’ bɛmmadie bɛdi.
22 Ɔluakɛ adalɛ Kelaesema nee adalɛ ngapezoma badwazo na bɛbayɛ sɛkɛlɛneɛ mgbole nee nwanwane ninyɛne bɛava bɛabɛlɛbɛla, na saa bɛyɛ na ɔkɛyɛ boɛ a, bɛabɛlɛbɛla bɛdabɛ mɔɔ bɛkpa bɛ la.
23 Yemɔti bɛnlea bɛ nwo boɛ. Melimoa meha ninyɛne ɛhye mɔ amuala mehile bɛ.
24 “Mekɛ ne anu, wɔ anwongyelelɛ mekɛ zɔhane anzi, awozinli baheda sɛnzɛne ne azo, na siane ne ɛnrɛda,
25 na nwɔlɔra vi anwuma badudu agua aze, na bɛbawoso anwuma tumi.
26 Akee bɛbanwu kɛ sonla Ra ne lua amungu nu ɔlɛ tumi kpole nee anyunlunyia ɔlɛba.
27 Na ɔbazoa anwumabɔvolɛma yeamaa bɛahɔboɔboa bɛdabɛ mɔɔ yekpa bɛ la anloa bɛavi anwoma nna ne anu, ɔvi azɛlɛ ye azo yeahɔdwu anwuma nehane.
28 “Akee bɛzukoa debie bɛvi feege baka ne anwo ndonwo ɛhye anu: Saa ɔ nye wɔlɔ na ɔwula nya a, ɛnee bɛze kɛ wawaa ɛbikye.
29 Zɔhane ala a bɛdabɛ noko, saa bɛnwu kɛ ninyɛne ɛhye mɔ ɛlɛsisi a, bɛnwu ye kɛ yebikye nlenkɛ ne mɔ anloa a.
30 Nɔhalɛ nu, meka meahile bɛ kɛ awolɛndoazo ɛhye ɛnrɛpɛ nu ɛlɛ kɔkpula kɛ ninyɛne ɛhye mɔ amuala bara nu.
31 Anwuma nee azɛlɛ bapɛ nu, noko me edwɛkɛ ɛnrɛpɛ nu ɛlɛ.
32 “Mɔɔ fale kenle zɔhane anzɛɛ dɔnehwele ne anwo la ɛdeɛ, awie biala ɛnze, anwumabɔvolɛma mɔɔ bɛwɔ anwuma nee Ralɛ ne bɔbɔ ɛnze, kyesɛ Selɛ ne ala.
33 Bɛhɔ zo bɛnlea, bɛhɔ zo bɛzinza, ɔluakɛ bɛnze mekɛ ne.
34 Ɔle kɛ nrenyia bie mɔɔ ɛlɛtu adenle na ɔvale ye sua ɔwulale ye ngɛkɛlɛ ne mɔ asa nu la, ɔmaanle ko biala gyima, na ɔhanle ɔhilele mɔɔ nea anlenkɛ ne la kɛ ɔhɔ zo ɔzinza.
35 Yemɔti bɛhɔ zo bɛzinza, ɔboalekɛ bɛnze kenle mɔɔ suamenle ne bara la, saa ɔbara nɔsolɛ nu anzɛɛ alevinli mu nwiɔ avinli anzɛɛ aleɛbahye* anzɛɛ nwonlomɔ mangyee a,
36 amaa saa ɔba arɛlevilɛ nu a, yeambando bɛ kɛ bɛdeda.
37 Mɔɔ melɛka meahile bɛ la, melɛka meahile awie biala: Bɛhɔ zo bɛzinza.”
