Mateyu 10:1-42
10 Yemɔti ɔvɛlɛle ye ɛdoavolɛma 12 ne na ɔmaanle bɛ tumi mɔɔ bɛbava bɛadu sunsum ɛtane nee mɔɔ bɛbava bɛayɛ anwodolɛ nee ewule ngakyile ayile la.
2 Ɛzoanvolɛma 12 ne aluma ɛne: Mɔɔ limoa la a le Saemɔn, mɔɔ bɛfɛlɛ ye Pita la, nee ɔ diema Andelu; Zɛbɛdi ara Gyemise nee ɔ diema Dwɔn;
3 Felepe nee Baatɔlomiyu; Tɔmase nee adwuledievolɛ Mateyu; Afeɛse ara Gyemise; Tadease;
4 Saemɔn, mɔdenlebɔvolɛ ne; yɛɛ Dwudase Yesekaleɔto, mɔɔ nzinlii yele ye maanle la.
5 Gyisɛse zoanle bɛdabɛ 12 ne na ɔvale adehilelɛ ɛhye ɔmaanle bɛ: “Bɛmmamakyi bɛfa maanle maanle ne mɔ adenle biala azo yɛɛ bɛmmakɔ Samɛlea sua biala azo;
6 emomu, bɛhɔkpondɛ Yizilayɛ sua nu mboane mɔɔ ɛminli la ala.
7 Saa bɛkɔ a bɛbɔ nolo kɛ: ‘Anwuma Belemgbunlililɛ ne ɛbikye.’
8 Bɛyɛ wuliravolɛma ayile, bɛdwazo menli mɔɔ ɛwu la, bɛmaa kokobɛvolɛma ɛde kpɔkɛ, bɛdu sunsum ɛtane. Bɛnyianle ye mgbane, bɛva bɛmaa mgbane.
9 Bɛmmakpondɛ nvutuke anzɛɛ dwɛtɛ fufule anzɛɛ kɔbele bɛgua bɛ ezukoa ahodoku nu,
10 anzɛɛ bɛmmafa aleɛ kodoku bɛtu adenle ne, anzɛɛ adɛladeɛ nwiɔ,* anzɛɛ mgbɔlaboa anzɛɛ kpɔma, ɔluakɛ ɔfɛta kɛ bɛmaa gyimayɛvolɛ ne aleɛ.
11 “Sua anzɛɛ namule biala mɔɔ bɛkɛhɔ zo la, bɛkpondɛ awie mɔɔ fɛta wɔ ɛkɛ la, na bɛdɛnla ɛkɛ kɔkpula kɛ bɛkɛvi ɛkɛ.
12 Saa bɛwolo awuke ne anu a, bɛbiza awuke ne anu amra ahye.
13 Saa awuke ne fɛta a, bɛmaa anzodwolɛ mɔɔ bɛkulo kɛ ɔnyia la ɛha ɛkɛ; noko saa ɔnfɛta a, bɛmaa bɛ anzodwolɛ ne ɛzia ɛrɛla bɛ ɛkɛ.
14 Ɛleka biala mɔɔ awie anlie bɛ anzɛɛ andie bɛ edwɛkɛ ne la, saa bɛlɛfi awuke ne anu anzɛɛ sua ne azo bɛahɔ a, bɛkpokpo bɛ gyakɛ abo munlutu bɛgua ɛkɛ.
15 Nɔhalɛ nu, meka meahile bɛ kɛ, wɔ Ndɛnebualɛ Kenle ne ɔbayɛ bɛtɛɛ yeamaa Sodɔm nee Gomɔla yeadɛla sua zɔhane.
16 “Nea! melɛsoa bɛ kɛ mboane wɔ bedi avinli; yemɔti bɛmaa bɛ nye ɛla ɛkɛ kɛ nwɔlɛ na bɛyɛ bɛlɛvo kɛ mɔlɔnoma.
17 Bɛnlea bɛ nwo boɛ wɔ menli nwo, ɔluakɛ bɛbava bɛ bɛahɔ kɔɔto yɛɛ bɛbabila bɛ empele* wɔ bɛ nyianu azua ne mɔ anu.
18 Ɔlua me ti, bɛbava bɛ bɛahɔ amɛnladoma nee arelemgbunli nyunlu, na yeayɛ daselɛlilɛ yeamaa bɛ nee maanle maanle ne mɔ.
19 Noko, saa bɛfa bɛ bɛkɔ a, bɛmmadwenledwenle kɛzi bɛbadendɛ anzɛɛ mɔɔ bɛbaha la anwo, ɔluakɛ bɛbava mɔɔ bɛbaha la bɛamaa bɛ wɔ dɔnehwele zɔhane anu;
20 tɛ bɛmɛ a bɛbadendɛ a, emomu bɛ Ze sunsum ne a balua bɛ nwo zo adendɛ a.
21 Bieko, adiema baye adiema amaa yeamaa bɛahu ye, na papa aye ɔ ra amaa, yɛɛ ngakula badwazo atia bɛ awovolɛ na bɛamaa bɛahu bɛ.
22 Na me duma ne ati menli kɔsɔɔti bakpɔ bɛ, noko mɔɔ kɛgyinla nu kɛhɔ awieleɛ la bɛbalie ye ngoane.
23 Saa bɛyɛ bɛ kpɔdekpɔde wɔ sua ko azo a, bɛnriandi bɛhɔ fofolɛ zo; nɔhalɛ nu, meka meahile bɛ kɛ, bɛnrɛwie Yizilayɛ azua kɔsɔɔti azo kɔ na sonla Ra ne ara.
24 “Ɛdoavolɛ ɛndɛla ye kilehilevolɛ, yɛɛ akɛlɛ ɛndɛla ɔ menle.
25 Ɔwɔ kɛ ɛdoavolɛ anye die nwo kɛ ɔbayɛ kɛ ye kilehilevolɛ la, na akɛlɛ ayɛ kɛ ɔ menle. Saa menli vɛlɛle suamenle ne Biyɛlezɛbɛle* a, ɛnee fane nyɛ yɛɛ bɛnrɛvɛlɛ ye sua nu amra zɔhane ɛ?
26 Yemɔti bɛmmasulo bɛ, ɔluakɛ debie biala ɛnle ɛkɛ mɔɔ bɛheda zo mɔɔ bɛnrɛbuke zo a, anzɛɛ debie biala ɛnle fealeranu mɔɔ bɛnrɛnwu ye a.
27 Mɔɔ meka mekile bɛ wɔ awozinli nu la, bɛha ye wienyi nu, yɛɛ mɔɔ meka megua bɛ nzo nu la, bɛha ye wɔ azua ti zo.
28 Na bɛmmasulo bɛdabɛ mɔɔ bɛku sonlabaka ne na bɛngola bɛnzɛkye ngoane* ne la; emomu, bɛzulo mɔɔ kola sɛkye ngoane ne nee sonlabaka ne amuala wɔ Gehenna* la.
29 Bɛndɔne ngɛsanloma nwiɔ kapɛlɛ* ɔ? Noko bɛ nuhua ko bɔbɔ ɛndɔ aze mɔɔ bɛ Ze ne ɛnze nwolɛ ɛhwee a.
30 Na bɛ ti zo enrinli bɔbɔ bɛdia ɔ muala.
31 Yemɔti bɛmmasulo; bɛsonle bolɛ bɛtɛla ngɛsanloma dɔɔnwo.
32 “Awie biala mɔɔ bɔ me duma wɔ menli nyunlu la, medame noko mebabɔ ye duma wɔ me Ze mɔɔ wɔ anwuma la anyunlu.
33 Na awie biala mɔɔ kpo me wɔ menli nyunlu la, medame noko mebakpo ye wɔ me Ze mɔɔ wɔ anwuma la anyunlu.
34 Bɛmmadwenle kɛ menvale anzodwolɛ membale azɛlɛ ye azo; meanva anzodwolɛ meamba, emomu konle dadeɛ.
35 Ɔluakɛ menvale mgbakyemgbakyenu membale, ralɛ nrenyia badwazo atia ye papa, na ralɛ raalɛ adwazo atia ye mame, na agyalɛ raalɛ adwazo atia ye ase.*
36 Nɔhalɛ nu, awie biala sua nu amra a bayɛ ye agbɔvolɛ a.
37 Awie biala mɔɔ kulo ye papa anzɛɛ ye mame tɛla me la ɛnfɛta me; yɛɛ awie biala mɔɔ kulo ɔ ra nrenyia anzɛɛ ɔ ra raalɛ tɛla me la ɛnfɛta me.
38 Na awie biala mɔɔ ɛnlie ye amaneɛnwunlɛ baka* ne na ɔndoa me la ɛnfɛta me.
39 Awie biala mɔɔ kulo kɛ ɔbɔ ye ngoane* nwo bane la, ɔbavi ɔ sa, na mɔɔ me ti ye ngoane* kɛvi ɔ sa la asa baha ye.
40 “Awie mɔɔ kɛlie bɛ la ɛlie medame noko, yɛɛ awie mɔɔ kɛlie me la ɛlie Ahenle mɔɔ zoanle me la noko.
41 Awie mɔɔ kɛlie ngapezonli ɔluakɛ ɔle ngapezonli la ati, banyia ngapezonli ahatualɛ, yɛɛ awie mɔɔ kɛlie tenlenenli ɔluakɛ ɔle tenlenenli la ati, banyia tenlenenli ahatualɛ.
42 Na awie mɔɔ kɛmaa ngakula ngyikyi ɛhye mɔ anu ko nzule weɛlɛkɔkɔ kanrɛlɛ ko kɛnlo ɔluakɛ ɔle ɛdoavolɛ la ati la, meka ye nɔhalɛ nu meahile bɛ kɛ, ye ahatualɛ ɛnrɛbɔ ye ɛlɛ.”
Ɔbodwɛkɛ
^ Anzɛɛ “tɛladeɛ bieko.”
^ Nea Edwɛkɛbohilelɛ.
^ Ɔle duma mɔɔ bɛfa bɛfɛlɛ Seetan, sunsum ɛtane ne mɔ kpanyinli ne.
^ Anzɛɛ “bɛngola bɛnzɛkye anyelazo mɔɔ bɛlɛ kɛ bɛbadɛnla aze bieko la.”
^ Nea Edwɛkɛbohilelɛ.
^ Giliki aneɛ nu, “assarion,” ɛhye le ezukoa ekyi mɔɔ bɛfa bɛtua awie mɔɔ kɛyɛ gyima mitini 45 kakɛ la.
^ Anzɛɛ “ɔ hu mame.”
^ Nea Edwɛkɛbohilelɛ.
^ Giliki aneɛ nu, “ɛkɛla.”
^ Giliki aneɛ nu, “ɛkɛla.”
