Mateyu 20:1-34
20 “Anwuma Belemgbunlililɛ ne le kɛ suamenle bie mɔɔ ɔvindele nwonlomɔ mangyee kɛ ɔkabɔ menli ɛkpa yeamaa bɛahɔyɛ gyima wɔ ye vanye egyinli nu la.
2 Mekɛ mɔɔ ɔ nee gyimayɛvoma ne hanle kɛ kenle ko ɔbadua bɛ denale* ko la, ɔmaanle bɛhɔle ye vanye egyinli ne anu.
3 Mekɛ mɔɔ ɔvindele kɛyɛ nwonlomɔ dɔne ngɔnla la,* ɔnwunle kɛ awie mɔ gyigyi gua ne azo mɔɔ bɛnyɛ ɛhwee;
4 na ɔhanle ɔhilele bɛ kɛ, ‘Bɛdabɛ noko bɛhɔ vanye egyinli ne anu, na mebamaa bɛ mɔɔ fɛta la.’
5 Yemɔti bɛhɔle. Eza ɔvindele kɛyɛ ewiazo bulu nee nwiɔ* nee dɔne nsa la,* ɔhɔyɛle zɔhane ala.
6 Akee kɛyɛ nɔsolɛ dɔne nnu,* ɔvindele na ɔnwunle awie mɔ kɛ bɛgyigyi ɛkɛ, na ɔzele bɛ kɛ, ‘Duzu ati a bɛgyigyi ɛke alehyenlɛ ye amuala mɔɔ bɛnyɛ ɛhwee a?’
7 Bɛbuale ye kɛ, ‘Awie biala ɛtɛbɔle yɛ ɛkpa la ati ɔ.’ Ɔzele bɛ kɛ, ‘Bɛdabɛ noko bɛhɔyɛ gyima wɔ vanye egyinli ne anu.’
8 “Ɔdwule nɔsolɛ nu la, vanye egyinli menle ne zele mɔɔ nea ye gyima ne azo la kɛ, ‘Fɛlɛ gyimayɛvoma ne na tua bɛ kakɛ, bɔ ɔ bo fi amozi amra anwo zo kɔkpula alimoama anwo zo.’
9 Mekɛ mɔɔ menli mɔɔ bɛvale bɛ dɔnehwele bulu nee ko ne azo rale la, bɛ nuhua biala nyianle denale ko.
10 Yemɔti, mɔɔ alimoama rale la, bɛdwenlenle kɛ bɛbanyia dɔɔnwo bɛadɛla zɔ, noko denale ko ahatualɛ ne ala a bɛnyianle a.
11 Bɛ sa hanle ye la, bɛdendɛle bɛ nzo abo bɛtiale suamenle ne
12 na bɛhanle kɛ, ‘Amozi amra yɛle gyima dɔnehwele ko ala; noko wɔmaa bɛ nee yɛdayɛ mɔɔ yɛyɛle gyima ɛsesebɛ alehyenlɛ ye amuala na ewia ɛbɔ yɛ dedee la ɛzɛ ahatualɛ!’
13 Na ɔbuale bɛ nuhua ko kɛ, ‘Ayi, metɛsisile wɔ. Wɔamkponle zolɛ kɛ ɛbalie denale ko ɔ?
14 Die wɔ ahatualɛ ne na kɔ. Mekulo kɛ metua amozi amra kakɛ ko ne ala kɛ mɔɔ meva memaa wɔ la.
15 Menlɛ adenle kɛ mefa me ninyɛne meyɛ mɔɔ medame mekulo la ɔ? Anzɛɛ kpalɛ* mɔɔ melɛyɛ la yɛ wɔ anyebolo* ɔ?’
16 Zɔhane ati, amozi amra balimoa, na alimoama ali amozi.”
17 Mɔɔ bɛlua adenle zo bɛlɛkɔ Gyɛlusalɛm la, Gyisɛse vale ɛdoavolɛma 12 ne hɔle ahane na ɔzele bɛ kɛ:
18 “Nea! Yɛlɛkɔ Gyɛlusalɛm, na bɛbaye sonla Ra ne bɛamaa ɛsɔfo mgbanyinli nee mɛla kilehilevolɛma ne. Bɛbabua ye ewule fɔlɛ
19 na bɛava ye bɛawula maanle maanle ne anu amra asa anu bɛamaa bɛagolo ɔ nwo, bɛabila ye empele na bɛahu ye wɔ baka zo; na ye kenle nsa ne azo bɛbadwazo ye.”
20 Akee Zɛbɛdi amra mrenyia ne mɔ mame nee ɔ mra ne rale ɔ nwo ɛkɛ rahotole ye kɛ ɔsɛlɛ ye debie.
21 Ɔbizale ye kɛ: “Duzu a ɛkpondɛ a?” Ɔbuale ye kɛ: “Ka maa me mra nwiɔ ye ko ɛdɛnla wɔ fema zo na ko ɛdɛnla wɔ bɛne zo wɔ wɔ Belemgbunlililɛ ne anu.”
22 Gyisɛse buale kɛ: “Bɛnze mɔɔ bɛlɛbiza la. Asoo bɛbahola bɛanlo kanrɛlɛ ne mɔɔ mebanlo nu la anu?” Bɛhanle kɛ: “Yɛbahola.”
23 Ɔzele bɛ kɛ: “Amgba bɛbahola bɛanlo, noko me sa fema anzɛɛ bɛne zo ɛdɛnlanlɛ ɛdeɛ, ɔnle me ɛdeɛ na meava meamaa, emomu ɔle bɛdabɛ mɔɔ me Ze ɛziezie ɛmaa bɛ la ɛdeɛ.”
24 Mekɛ mɔɔ bulu ne mɔɔ ɛha la dele ɛhye la, bɛvale mediema nwiɔ ne anwo ɛya.
25 Noko Gyisɛse vɛlɛle bɛ wɔ ɔ nwo ɛkɛ na ɔhanle kɛ: “Bɛze kɛ maanle maanle arelemgbunli kile bɛ tumi wɔ bɛ menli nwo zo yɛɛ bɛ menli titili di bɛ nwo zo tumi.
26 Noko bɛmɛ, bɛnle zɔ; emomu awie biala mɔɔ kpondɛ kɛ ɔyɛ kpole wɔ bɛ nu la ɛyɛ bɛ sonvolɛ,
27 na awie biala mɔɔ kpondɛ kɛ ɔdi bɛ nyunlu la ɛyɛ bɛ akɛlɛ.
28 Kɛ mɔɔ sonla Ra ne amba kɛ bɛzonle ye, emomu ɔrale kɛ ɔbazonle na yeava ye ngoane* yeayɛ ɛkpɔnedeɛ yealie menli dɔɔnwo la.”
29 Mɔɔ bɛvi Gyɛleko bɛkɔ la, menli dɔɔnwo doale ye.
30 Na nea! mekɛ mɔɔ anyenzinliravolɛma nwiɔ mɔɔ bɛde adenle ne anloa dele kɛ Gyisɛse ɛlɛpɛ nu la, bɛdeɛdeanle nu kɛ: “Awulae, Devidi Ara, nwu yɛ anwunvɔne!”
31 Na menli ne hwile bɛ nyunlu na bɛzele bɛ kɛ bɛyɛ koonwu; noko bɛdeɛdeanle nu kpalɛ kɛ: “Awulae, Devidi Ara, nwu yɛ anwunvɔne!”
32 Yemɔti Gyisɛse gyinlanle, ɔvɛlɛle bɛ na ɔbizale bɛ kɛ: “Duzu a bɛkulo kɛ meyɛ memaa bɛ a?”
33 Bɛbuale ye kɛ: “Awulae, buke yɛ nye.”
34 Alɔbɔlɛ hunle Gyisɛse na ɔvale ɔ sa ɔhehanle bɛ nye, na ɛkɛ ne ala bɛ nye bukebukele na bɛdoale ye.
Ɔbodwɛkɛ
^ Wulomu ezukoa. Ɔle kenle ko ahatualɛ.
^ Giliki aneɛ nu, kɛyɛ dɔnehwele nsa ne azo la.
^ Giliki aneɛ nu, kɛyɛ dɔnehwele nsia ne azo.
^ Giliki aneɛ nu, kɛyɛ dɔnehwele ngɔnla ne azo.
^ Giliki aneɛ nu, kɛyɛ dɔnehwele bulu nee ko ne azo.
^ Anzɛɛ “boɛ.”
^ Giliki aneɛ nu, “ɛtane; amumuyɛ.”
^ Anzɛɛ “ye ɛkɛla.”
