Mateyu 27:1-66
27 Aleɛ hyenle la, ɛsɔfo mgbanyinli nee mgbanyima ne mɔ amuala bɔle kpɔkɛ kɛ bɛku Gyisɛse.
2 Bɛkyekyele ye bɛvale ye bɛhɔmaanle amɛnlado Paelɛte.
3 Mɔɔ Dwudase mɔɔ yele ye maanle la nwunle kɛ bɛbua ye ewule fɔlɛ la, ɔnlunle ɔ nwo na ɔvale dwɛtɛ fufule 30 ne ɔhɔmaanle ɛsɔfo mgbanyinli nee mgbanyima ne mɔ,
4 na ɔhanle kɛ: “Menyɛle ɛtane kɛ menyele awie mɔɔ le tenlenenli* la memaanle a.” Bɛhanle kɛ: “Kɛzi ɛhye fale yɛ nwo ɛ? Ɛdawɔ wɔ edwɛkɛ ɔ!”
5 Yemɔti ɔvuandinle dwɛtɛ fufule ne ɔguale ɛzonlenlɛ sua ne anu na ɔvile ɛkɛ. Akee ɔhɔzɔle ɔ kɔme nyɛma.
6 Na ɛsɔfo mgbanyinli ne mɔ sesale dwɛtɛ fufule ne na bɛhanle kɛ: “Mɛla ɛmmaa adenle kɛ yɛkɛva yɛkɛgua ezukoa ɛlɛka nwuanzanwuanza ne anu, ɔluakɛ ɔle mogya ezukoa.”
7 Mɔɔ bɛzuzule nwolɛ bɛwiele la, bɛvale ezukoa ne bɛdɔle nwovolɛ bie azɛlɛ kɛ bɛbava bɛazie nyɛvolɛ.
8 Yemɔti ɛnɛ nee ɛnɛ ala, bɛfɛlɛ zɔhane azɛlɛ ne Mogya Azɛlɛ.
9 Akee mɔɔ bɛluale ngapezonli Gyɛlɛmaya anwo zo bɛhanle la rale nu kɛ: “Na bɛvale dwɛtɛ fufule 30 ne, bolɛ mɔɔ bɛpɛle bɛdole nrenyia ne anwo zo, awie mɔɔ Yizilayɛma bie mɔ pɛle bolɛ dole ɔ nwo zo la,
10 na bɛvale bɛdɔle nwovolɛ ne azɛlɛ ne, kɛ mɔɔ Gyihova* hanle hilele me la.”
11 Akee Gyisɛse ragyinlanle amɛnlado ne anyunlu, na amɛnlado ne bizale ye kɛ: “Wɔmɔ a ɛle Dwuuma Belemgbunli ne la ɔ?” Gyisɛse buale kɛ: “Ɛdawɔ a ɛse a.”
12 Na mɔɔ ɛsɔfo mgbanyinli nee mgbanyima ne mɔ ɛlɛto ye ɛzonle la, yeandɛ ɔ nloa anu.
13 Akee Paelɛte zele ye kɛ: “Ɛnde mɔɔ bɛlɛkeha bɛatia wɔ la ɔ?”
14 Noko yeambua ye, yɛɛ yeanga edwɛkɛ kpɔkɛ ko bɔbɔ, yemɔti ɔzinle amɛnlado ne anwo kpole.
15 Ɛvoyia biala dwu zo a, amɛnlado ne ta ye pilizanli ko mɔɔ menli ne kulo la maa bɛ.
16 Mekɛ ne anu, ɛnee pilizanli bie mɔɔ ɛlie duma ɛtane mɔɔ bɛfɛlɛ ye Balabase la wɔ ɛkɛ.
17 Yemɔti mɔɔ bɛyiale la, Paelɛte bizale bɛ kɛ: “Boni a bɛkulo kɛ meye ye memaa bɛ a, Balabase anzɛɛ Gyisɛse ne mɔɔ bɛse bɛfɛlɛ ye Kelaese ne la?”
18 Ɛnee Paelɛte ze kɛ ɛkpɔlɛ ti a bɛva ye bɛrɛlɛ ye a.
19 Bieko, mekɛ mɔɔ ɔde ndɛnebualɛ ebia ne azo la, ɔ ye dole ye nrɛlaleɛ kɛ: “Mmayɛ nrenyia tenlenenli ne ɛhwee, ɔluakɛ ɔdaye ti, menwunle amaneɛ dɔɔnwo ɛnɛ wɔ ɛlalɛ nu.”
20 Noko ɛsɔfo mgbanyinli nee mgbanyima ne mɔ lile wulale menli ne kɛ bɛha kɛ bɛkulo Balabase, na bɛmaa bɛhu Gyisɛse.
21 Amɛnlado ne buale bɛ kɛ: “Menli nwiɔ ne anu boni a bɛkulo kɛ meye ye memaa bɛ a?” Bɛhanle kɛ: “Balabase.”
22 Paelɛte zele bɛ kɛ: “Ɛnee kɛ menyɛ Gyisɛse ne mɔɔ bɛfɛlɛ ye Kelaese ne la ɛ?” Bɛ muala bɛhanle kɛ: “Bɔ ye baka nu!”*
23 Ɔzele kɛ: “Kɛmɔti ɛ? Ɛtane boni a yeyɛ a?” Noko bɛdeɛdeanle nu kpole kɛ: “Bɔ ye baka nu!”
24 Mɔɔ Paelɛte nwunle kɛ ɔyɛ nwolɛ bie a ɔnrɛyɛ boɛ, na emomu basabasayɛlɛ ɛlɛba la, ɔvale nzule ɔnrinzinle ɔ sa anwo wɔ menli ne anyunlu na ɔhanle kɛ: “Menli nrenyia ɛhye mogya nwo fɔlɛ. Bɛdabɛ bɛ edwɛkɛ ɔ.”
25 Na menli ne amuala buale kɛ: “Maa ye mogya ɛragua yɛdayɛ nee yɛ mra ati zo.”
26 Akee ɔyele Balabase ɔmaanle bɛ, na ɔmaanle bɛbole Gyisɛse na ɔvale ye ɔmaanle bɛ kɛ bɛhɔbɔ ye baka nu.
27 Amɛnlado ne sogyama ne vale Gyisɛse hɔle amɛnlado ne sua nu ɛkɛ ne na bɛboɔboale sogyama ne amuala anloa wɔ ɔ nwo ɛkɛ.
28 Na bɛyele ye tɛladeɛ ɛdeɛ ne na bɛvale tɛladeɛ kɔkɔlɛ tendenle bie bɛwulale ye,
29 na bɛnwonle mbowule abotile bɛkpolole ɔ ti, na bɛvale ndɔ baka bɛwulale ɔ sa fema ne anu. Akee bɛhotole ɔ nyunlu ɛkɛ ne na bɛgolole ɔ nwo kɛ: “Anzodwolɛ* ɛha wɔ, Dwuuma Belemgbunli!”
30 Na bɛtotole nyɛlɛ bɛguale ɔ nwo na bɛliele baka ne bɛvale bɛbobɔle ɔ ti zo.
31 Mɔɔ bɛgolole ɔ nwo bɛwiele la, bɛkpolole tɛladeɛ tendenle ne na bɛvale ye tɛladeɛ aguzo ne bɛwulale ye na bɛ nee ye hɔle kɛ bɛkabɔ ye baka nu.
32 Mekɛ mɔɔ bɛlɛkɔ la, bɛnwunle nrenyia bie mɔɔ vi Saelini mɔɔ bɛfɛlɛ ye Saemɔn la. Bɛmaanle nrenyia ɛhye zoale ye amaneɛnwunlɛ baka ne.*
33 Na mɔɔ bɛdwule ɛleka bie mɔɔ bɛfɛlɛ ye Gɔlogota, mɔɔ kile Etile Kanrɛlɛ la,
34 bɛmaanle ye nwanye mɔɔ debie ɛnwonle wɔ nu la kɛ ɔnlo; noko ɔbɔle zolɛ la yeanno.
35 Mekɛ mɔɔ bɛbɔle ye baka nu la, bɛguale ma* bɛvale bɛhyɛle ye tɛladeɛ aguzo ne,
36 na bɛdɛnlanle aze bɛzinzale ye.
37 Bɛhɛlɛle ɛzonle mɔɔ bɛdonle ye la noko bɛbɔle ɔ ti zo anwuma kɛ: “Ɛhye a le Gyisɛse mɔɔ le Dwuuma Belemgbunli ne la.”
38 Akee bɛbɔle nwule nwiɔ baka nu bɛbokale ɔ nwo, ko wɔ ye fema zo yɛɛ ko wɔ ye bɛne zo.
39 Na bɛdabɛ mɔɔ bɛpɛle nuhua ɛkɛ ne la wosole bɛ ti dendɛle tiale ye
40 na bɛhanle kɛ: “Wɔmɔ mɔɔ ɛbabubu ɛzonlenlɛ sua ne na wɔava kenle nsa wɔazi la, die ɛ nwo ɛ! Saa ɛle Nyamenle ara a, ɛvi amaneɛnwunlɛ baka ne* azo dwu aze!”
41 Zɔhane ala a ɛsɔfo mgbanyinli nee mɛla kilehilevolɛma yɛɛ mgbanyima ne mɔ noko bɔle ɔ bo golole ɔ nwo hanle kɛ:
42 “Ɔliele awie mɔ; noko ɔngola ɔnlie ɔ nwo! Ɔle Yizilayɛ Belemgbunli; ɔvi amaneɛnwunlɛ baka ne* azo ɔdwu aze kɛkala na yɛkɛlie ye yɛkɛli.
43 Yeva ɔ rɛle yewula Nyamenle anu; saa Ɔ nye die ɔ nwo a maa ɔlie ye, ɔluakɛ ɔhanle kɛ, ‘Mele Nyamenle Ara.’”
44 Zɔhane ala a nwule ne mɔ mɔɔ bɛbɔle bɛ baka nu bɛbokale ɔ nwo la noko yɛle ye aholoba a.
45 Ɔvi kɛyɛ ewiazo bulu nee nwiɔ* mɔɔ kɔ la, awozinli hedale azɛlɛ ne kɔsɔɔti azo hɔkpulale dɔne nsa.*
46 Kɛyɛ dɔne nsa ne azo, Gyisɛse vale ɛnelɛ kpole deanle nu kɛ: “Eli, Eli, lama sabaketani?” mɔɔ kile kɛ, “Me Nyamenle, me Nyamenle, duzu ati a wɔkpo me a?”
47 Mɔɔ bɛdele ɛhye la, menli mɔɔ gyigyi ɛkɛ ne la bie mɔ bɔle ɔ bo hanle kɛ: “Nrenyia ɛhye ɛlɛfɛlɛ Yilaegya.”
48 Na ɛkɛ ne ala, menli mɔɔ gyigyi ɛkɛ ne la anu ko nriandile hɔvale emiane bɔle nza mɔɔ nyinyia la anu vale duale baka ti maanle ye kɛ ɔnlo.
49 Na bɛdabɛ mɔɔ bɛha la hanle kɛ: “Bɛgyakyi ye! Bɛmaa yɛnlea saa Yilaegya kɛralie ye a.”
50 Gyisɛse vale ɛnelɛ kpole deanle nu bieko na ɔwule.
51 Na nea! ɛzonlenlɛ sua ne anu mgbɛnu ɛdanlɛ ne anu dele sinli nwiɔ, ɔvi anwuma ɔpenle aze, azɛlɛ kpusule na awolɛ kpukekpukele.
52 Nla* zo bukebukele na nwuanzanwuanzama mɔɔ bɛwu la* avunli dɔɔnwo vindele zo*
53 na menli dɔɔnwo nwunle bɛ. (Menli mɔɔ vi azie ne azo rale wɔ Gyisɛse ewudwazo ne anzi la hɔle sua nwuanzanwuanza ne azo.)
54 Na mekɛ mɔɔ sogya kpanyinli ne nee menli mɔɔ ɔ nee bɛ ɛlɛsinza Gyisɛse nwunle azɛlɛkpusulɛ ne nee ninyɛne mɔɔ ɛlɛkɔ zo la, bɛzulole kpole na bɛhanle kɛ: “Amgba, Nyamenle Ara ɛne.”
55 Ɛnee mraalɛ dɔɔnwo bie wɔ ɛkɛ ne, bɛgyinlanle moamoa bɛnleanle mɔɔ ɛlɛkɔ zo la, bɛdoale Gyisɛse bɛ nee ye vi Galeli kɛ bɛboa ye;
56 Bɛ nuhua bie mɔ a le Mɛle Magedalene* nee Mɛle mɔɔ le Gyemise nee Dwosɛse mame yɛɛ Zɛbɛdi amra ne mɔ mame.
57 Akee ɔdwule nɔsolɛ nu la, sukoavolɛ bie mɔɔ vi Arelematia mɔɔ bɛfɛlɛ ye Dwosefi, mɔɔ ɔdaye noko yerayɛ Gyisɛse ɛdoavolɛ la rale ɛkɛ.
58 Nrenyia ɛhye hɔle Paelɛte ɛkɛ ne hɔzɛlɛle Gyisɛse funli ne. Na Paelɛte hanle kɛ bɛva bɛmaa ye.
59 Dwosefi vale funli ne, na ɔvale lenen kɛnlɛma bie ɔkyekyele ye,
60 na ɔdole ye wɔ ye nla* fofolɛ mɔɔ yepɛ wɔ bolɛ nu la anu. Akee ɔhundole bolɛ kpole bie ɔnyinle nla* ne anloa na ɔhɔle.
61 Noko Mɛle Magedalene nee Mɛle ɛhendeɛ ne hale ɛkɛ dɛnlanle nla ne anyunlu.
62 Kenle mɔɔ doa zo, mɔɔ li Anwoziezielɛ ne anzi la, ɛsɔfo mgbanyinli nee Falasiima ne mɔ yiale wɔ Paelɛte anyunlu,
63 na bɛhanle kɛ: “Yɛmenle, yɛkakye kɛ adalɛ ne de aze la ɔhanle kɛ, ‘Kenle nsa anzi mebadwazo.’
64 Yemɔti maa bɛhɔbɔ nla ne anwo bane ɔhɔkpula kenle nsa ne azo, amaa ye ɛdoavolɛma ne angɔnwua ye, na bɛaha bɛahile menli kɛ, ‘Bɛdwazo ye bɛvi mowuamra anu!’ Anrɛɛ mɛlɛbɛla ɛhye mɔɔ li amozi la kɛdɛla alimoa ɛdeɛ ne.”
65 Paelɛte zele bɛ kɛ: “Bɛlɛ sinzavolɛma. Bɛhɔbɔ nwolɛ bane kɛ mɔɔ bɛkpondɛ la.”
66 Yemɔti bɛhɔzɔle nla ne anloa na bɛmaanle sinzavolɛma zinzale.
Ɔbodwɛkɛ
^ Giliki aneɛ nu, “menyele mogya mɔɔ tenrɛ.”
^ Nea Edwɛkɛbohilelɛ.
^ Anzɛɛ “Ku ye baka zo!”
^ Anzɛɛ “Ayɛlɛyelɛ.”
^ Nea Edwɛkɛbohilelɛ.
^ Nea Edwɛkɛbohilelɛ.
^ Nea Edwɛkɛbohilelɛ.
^ Nea Edwɛkɛbohilelɛ.
^ Giliki aneɛ nu, kɛyɛ dɔnehwele nsia ne azo.
^ Giliki aneɛ nu, kɛyɛ dɔnehwele ngɔnla ne azo.
^ Anzɛɛ “ngakyelɛ nla.”
^ Giliki aneɛ nu, “bɛdabɛ mɔɔ bɛla wɔ ewule nu la.”
^ Anzɛɛ “zale guale zo.”
^ Anzɛɛ “Mɛle mɔɔ vi Magedala la.”
^ Anzɛɛ “ngakyelɛ nla.”
^ Anzɛɛ “ngakyelɛ nla.”
