Mateyu 28:1-20
28 Ɛnwomenlelielɛ kenle ne anzi, dapɛne ne kenle mɔɔ limoa la aleɛbahye ne, Mɛle Magedalene nee Mɛle ko ne hɔnleanle nla ne.
2 Na nea! ɛnee azɛlɛkpusulɛ kpole bie ɛzi, ɔluakɛ ɛnee Gyihova* anwumabɔvolɛ vi anwuma ɛdwu ɛrahundo bolɛ ne ɛvi ɛkɛ na ɔde zo.
3 Ɛnee ɔ nwo le kɛ ɛsɛlɛmanye yɛɛ ye tɛladeɛ ne le fufule kɛ ezukɔtweaba.
4 Ɛhɛe, ɔ nwo ɛzulolɛ maanle sinzavolɛma ne anwo wosole bɛ na bɛyɛle kɛ menli mɔɔ ɛwu la.
5 Noko anwumabɔvolɛ ne zele mraalɛ ne mɔ kɛ: “Bɛmmasulo, ɔluakɛ meze kɛ bɛlɛkpondɛ Gyisɛse mɔɔ bɛhunle ye wɔ baka ne azo la.
6 Ɔnle ɛke, ɔluakɛ bɛdwazo ye kɛ mɔɔ ɔhanle la. Bɛrɛla, bɛnlea ɛleka mɔɔ ɛnee ɔla la.
7 Akee bɛha bɛ nwo bɛhɔha bɛhile ye ɛdoavolɛma ne kɛ bɛdwazo ye bɛvi mowuamra anu, na nea! ɔlɛdimoa bɛ nyunlu wɔ Galeli. Bɛbanwu ye wɔ ɛkɛ. Bɛhakye mɔɔ meha mehile bɛ la.”
8 Yemɔti, ndɛndɛ ne ala bɛvile ngakyelɛ nla ne azo, bɛvale ɛzulolɛ nee anyelielɛ kpole bɛnriandile kɛ bɛkabɔ ye ɛdoavolɛma ne amaneɛ.
9 Na nea! Gyisɛse yiale bɛ na ɔhanle kɛ: “Anzodwolɛ ɛha bɛ!” Bɛhɔle ɔ nwo ɛkɛ ne, bɛzɔle ɔ gyakɛ na bɛhotole ye.
10 Akee Gyisɛse zele bɛ kɛ: “Bɛmmasulo! Bɛhɔbɔ me mediema ne mɔ amaneɛ kɛ bɛhɔ Galeli, na ɛkɛ ne yɛɛ bɛbanwu me a.”
11 Mɔɔ bɛlua adenle nu bɛlɛkɔ la, sinzavolɛma ne bie mɔ hɔle sua ne azo na bɛhanle mɔɔ ɛzi la amuala bɛhilele ɛsɔfo mgbanyinli ne mɔ.
12 Na mɔɔ ɛhye mɔ nee mgbanyima ne mɔ yiale na bɛzile kpɔkɛ la, bɛvale dwɛtɛ fufule dɔɔnwo bɛmaanle sogyama ne
13 na bɛhanle kɛ: “Bɛha kɛ, ‘Nɔe ne mɔɔ ɛnee yɛdeda la, ye ɛdoavolɛma ne rawuale ye.’
14 Na saa amɛnlado ne te a, yɛbahilehile edwɛkɛ ne anu yɛahile ye,* yemɔti bɛmmamaa ɔgyegye bɛ.”
15 Yemɔti bɛliele dwɛtɛ fufule ne na bɛyɛle mɔɔ bɛhanle bɛhilele bɛ la, na edwɛkɛ ɛhye ɛdɛlɛ Dwuuma anu ɛradwu ɛnɛ.
16 Na ɛdoavolɛma 11 ne hɔle Galeli wɔ boka ne mɔɔ Gyisɛse hilele bɛ kɛ bɛyia ye wɔ ɛkɛ la azo.
17 Mekɛ mɔɔ bɛnwunle ye la bɛhotole ye, noko bie mɔ adwenle nu yɛle bɛ kesee.
18 Gyisɛse bikyele bɛ na ɔzele bɛ kɛ: “Bɛva tumi muala bɛmaa me wɔ anwuma nee azɛlɛ ye azo.
19 Yemɔti, bɛhɔ, bɛyɛ maanle maanle kɔsɔɔti anu menli me ɛdoavolɛma, bɛzɔne bɛ wɔ Selɛ ne, Ralɛ ne nee sunsum nwuanzanwuanza ne duma nu,
20 bɛhilehile bɛ bɛmaa bɛli ninyɛne kɔsɔɔti mɔɔ meha mehile bɛ la azo. Na nea! me nee bɛ lua dahuu kɔkpula mekɛ ɛhye awieleɛ.”*
