Ɛseta 1:1-22
1 Wɔ Ahazelɔse* mekɛ zo, ɛhye kile Ahazelɔse ne mɔɔ lile belemgbunli wɔ maanzinli 127 azo,+ ɔvi Yindia kɔdwu Yiteyopea* la,
2 mekɛ zɔhane ɛnee Belemgbunli Ahazelɔse de ye belemgbunli ebia nu wɔ Hyuhyan*+ belemgbunli sua nu ɛkɛ ne,*
3 wɔ ye tumililɛ ne ɛvolɛ mɔɔ tɔ zo nsa la anu, ɔdole ɛkponle kpole bie ɔmaanle ye mgbanyima nee ye azonvolɛ kɔsɔɔti. Ɛnee Pɛhyea+ nee Medea+ sogyama, menli titili nee mgbanyima mɔɔ nea maanzinli ne mɔ azo la ɛra ɔ nyunlu,
4 na ɔvale ye anyunlunyia belemgbunlililɛ ne anu anwonyia nee ye kpoleyɛlɛ nee ye enililɛ ne ɔhilele bɛ wɔ kenle dɔɔnwo anu, kenle 180.
5 Na mɔɔ mekɛ ɛhye mɔ rale awieleɛ la, belemgbunli ne dole ɛkponle kpole bie maanle menli mɔɔ rale Hyuhyan* belemgbunli sua nu ɛkɛ* la, ɔvi mɔɔ le kpole kɔdwu mɔɔ le ekyi la anwo zo too kenle nsuu, wɔ belemgbunli sua nu alienwo ɛkɛ.
6 Ɛnee lenen, ɛdanlɛ kpalɛ nee ɛdanlɛ buluwu mɔɔ bɛva nyɛma kpalɛ bɛkyekye, nyɛma kɔkɔlɛ nee buluwu afonla mɔɔ ye nzosɔnu ne mɔ le dwɛtɛ fufule la hendɛhenda mabolo* mpila ne mɔ anwo. Nvutuke nee dwɛtɛ fufule mbia gyigyi adenle ne mɔɔ bɛva pɔfele, mabolo, avikpa nee mabolo bile bɛyɛ la anloa.
7 Bɛvale nvutuke ahanrɛlɛ a bɛzule nwanye ne a; ɛnee kanrɛlɛ ko biala le ngakyile fi mɔɔ ɛha la anwo, na belemgbunli ne nwanye ne bule ɔlua mɔɔ belemgbunli ne holale vale rale la ati.
8 Ɛnee nza ɛnlonlɛ ne anwo mɛla a le kɛ, ɔnle kɛ bɛtinlitinli awie biala anwo zo, ɔluakɛ belemgbunli ne hanle hilele ye sua nu ɛkɛ ne mgbanyima ne mɔ kɛ bɛmaa awie biala ɛnlo mɔɔ ɔkulo la.
9 Ɔbahyema* Vahyetae+ noko dole ɛkponle kpole maanle mraalɛ ne mɔ wɔ Belemgbunli Ahazelɔse belemgbunli sua nu ɛkɛ ne.
10 Kenle nsuu ne azo, mɔɔ ɛnee nwanye ɛmaa belemgbunli ne anye ɛlie la, ɔzele Mɛhuman, Bezeta, Haabona,+ Begeta, Abageta, Zita yɛɛ Kaakase, mgbanyima nsuu mɔɔ bɛle Belemgbunli Ahazelɔse mumua ne azonvolɛ la kɛ,
11 bɛhɔva Ɔbahyema Vahyetae mɔɔ ɔzo ye abotile* ne la bɛrɛla belemgbunli ne anyunlu bɛmaa ɔrava ye anwofɛlɛko ne ɔhile menli ne nee ye mgbanyima ne mɔ, ɔluakɛ ɛnee ɔ nwo yɛ fɛ kpalɛ.
12 Noko mɔɔ mgbanyima ne mɔ hɔhanle belemgbunli ne edwɛkɛ ne hilele Ɔbahyema Vahyetae la, ɔhɔle zo ɔkpole kɛ ɔkɛra. Ɔti belemgbunli ne vale ɛya kpole na ye ahonle futule.
13 Akee belemgbunli ne nee nrɛlɛbɛvolɛma mɔɔ ze amaamuo ne* la dendɛle (ɔluakɛ adenle ɛhye a belemgbunli ne dua zo fa edwɛkɛ to menli mɔɔ ze mɛla ne nee edwɛkɛlilɛ nye zo kpalɛ la anyunlu a,
14 na menli mɔɔ ɛnee bikye ye kpalɛ la a le Kaahyina, Hyita, Ademeeta, Tahyehye, Milɛse, Maasina yɛɛ Mɛmukan, Pɛhyea nee Medea mgbanyima nsuu+ mɔɔ ɛnee kola kɔ belemgbunli ne ɛkɛ na bɛlɛ gyinlabelɛ titili wɔ belemgbunlililɛ ne anu la).
15 Belemgbunli ne bizale kɛ: “Kɛ mɔɔ mɛla ne kile la, duzu a ɔwɔ kɛ bɛfa bɛyɛ Ɔbahyema Vahyetae mɔɔ yeandie Belemgbunli Ahazelɔse edwɛkɛ ne mɔɔ mgbanyima ne mɔ hɔhanle hilele ye la ɛ?”
16 Ɛhye ati Mɛmukan hanle ye wɔ belemgbunli ne nee mgbanyima ne mɔ anyunlu kɛ: “Tɛ belemgbunli ne angomekye a Ɔbahyema Vahyetae ɛyɛ ɛtane+ ɛtia ye a, emomu yeyɛ ɛtane yetia mgbanyima ne mɔ nee menli mɔɔ wɔ Belemgbunli Ahazelɔse maanzinli ne mɔ anu la kɔsɔɔti.
17 Ɔluakɛ mraalɛ mɔɔ bɛgya bɛ la kɔsɔɔti bade mɔɔ ɔbahyema ne yɛle la, bɛnrɛbu bɛ hu mɔ na bɛbaha kɛ, ‘Belemgbunli Ahazelɔse hanle kɛ bɛhɔva Ɔbahyema Vahyetae bɛrɛla ɔ nyunlu, noko yeamba.’
18 Ɛnɛ kenle ye, Pɛhyea nee Medea mgbanyima ne mɔ aye mɔ mɔɔ ze mɔɔ ɔbahyema ne yɛle la badendɛ zɔhane ala ahile bɛ hu mɔ, na ɛhye ɛnrɛmaa bɛnrɛbu bɛ na bɛbava ɛya.
19 Saa ɔle kpalɛ wɔ belemgbunli ne anye zo a, maa ɔli mɛla na bɛhɛlɛ ye wɔ Pɛhyea nee Medea mɛla ne mɔ mɔɔ bɛngola bɛntulu+ bɛ la anu, kɛ Vahyetae ɛnrɛra Belemgbunli Ahazelɔse anyunlu bieko ɛlɛ; na maa belemgbunli ne ɛlie ye ɔbahyema gyinlabelɛ ne ɛmaa raalɛ fofolɛ mɔɔ le kpalɛ tɛla ye la.
20 Na saa bɛte belemgbunli ne mɛla ne wɔ ye belemgbunlililɛ kpole ne amuala anu a, mraalɛ mɔɔ bɛgya bɛ la kɔsɔɔti bali bɛ hu mɔ eni, ɔvi mɔɔ le kpole kɔdwu mɔɔ le ekyi la anwo zo.”
21 Belemgbunli ne nee mgbanyima ne mɔ anye liele nzuzulɛ ɛhye anwo, na belemgbunli ne yɛle mɔɔ Mɛmukan hanle la.
22 Yemɔti ɔmaanle bɛvale ngɛlata bɛhɔle maanzinli ne mɔ+ amuala anu. Aneɛ mɔɔ menli ne ka wɔ maanzinli biala anu la nee bɛ ngɛlɛlera* a bɛvale bɛhɛlɛle bɛ ngɛlata ne mɔ a, kɛ kunli biala ɛyɛ ye awuke zo kpanyinli na ɔha ye sua zo aneɛ.
Ɔbodwɛkɛ
^ Bɛbu ye kɛ yemɔ a le Zɛzɛse I, Dalayɛse Kpole ne (Dalayɛse Hesetapise) ara ne.
^ Anzɛɛ “Kuhye.”
^ Anzɛɛ “Susa.”
^ Anzɛɛ “aranemgbole ne anu.”
^ Anzɛɛ “Susa.”
^ Anzɛɛ “aranemgbole ne anu.”
^ Ɔle awolɛ memeamemea bie mɔɔ sonle bolɛ.
^ Anzɛɛ “Belemgbunli Raalɛ.”
^ Anzɛɛ “kyɛlɛ.”
^ Anzɛɛ “mɛla ne.” Hibulu aneɛ nu, “mekɛ ne mɔ.”
^ Anzɛɛ “kɛzi bɛkɛlɛ bɛ edwɛkɛ la.”
