Ɛseta 5:1-14
5 Kenle nsa ne azo,+ Ɛseta wulale ye ɔbahyema tɛladeɛ ne na ɔhɔgyinlanle belemgbunli suakunlu alienwo ɛkɛ ne ɛleka mɔɔ nee belemgbunli sua ne anye bɔ zo la. Ɛnee belemgbunli ne noko de ye ebia nu wɔ sua nu ɛkɛ ne ɛleka mɔɔ nee anuhɔlɛ ne anye bɔ zo la.
2 Mɔɔ belemgbunli ne nwunle Ɔbahyema* Ɛseta kɛ ɔgyi alie ne anwo ala la, ɔnyianle ɔ nyunlu ɛlolɛ, na belemgbunli ne dendenle ye nvutuke kpɔma ne+ mɔɔ ɛnee ɔlɛ la wɔ Ɛseta anwo zo. Akee Ɛseta bikyele ye na ɔvale ɔ sa ɔhanle kpɔma ne ati.
3 Belemgbunli ne bizale ye kɛ: “Ɔbahyema Ɛseta, duzu edwɛkɛ ɔ? Duzu a ɛkpondɛ a? Saa me belemgbunlililɛ ne foa ko bɔbɔ a, mebava meamaa wɔ!”
4 Ɛseta buale kɛ: “Saa belemgbunli anye balie nwo a, maa belemgbunli nee Heeman+ ɛrɛla ɛkponle ne mɔɔ meto meamaa ye ɛnɛ la abo.”
5 Yemɔti belemgbunli ne zele ye menli ne kɛ: “Bɛhɔha bɛhile Heeman kɛ ɔrɛla ndɛndɛ kɛ mɔɔ Ɛseta ɛha la.” Yemɔti belemgbunli ne nee Heeman hɔle ɛkponle ne mɔɔ Ɛseta dole la abo.
6 Wɔ nwanye ɛkponledolɛ ne abo, belemgbunli ne bizale Ɛseta kɛ: “Duzu a ɛhyia nwo a? Mebava meamaa wɔ! Yɛɛ duzu a ɛkpondɛ a? Saa me belemgbunlililɛ ne foa ko bɔbɔ a, ɛ sa baha ye!”+
7 Ɛseta buale kɛ: “Mɔɔ mehyia nwolɛ nee mɔɔ mekpondɛ la ɛne,
8 Saa menyia belemgbunli anyunlu ɛlolɛ, na belemgbunli anye die nwo kɛ ɔbayɛ mɔɔ mehyia nwo nee mɔɔ mekpondɛ la yeamaa me a, maa belemgbunli nee Heeman ɛrɛla ɛkponle mɔɔ mebado meamaa bɛ ɛhyema la abo; na ɛhyema, mebayɛ ye kɛ mɔɔ belemgbunli ɛha la.”
9 Zɔhane kenle ne, Heeman vale anyelielɛ nee ahonle mɔɔ fɛlɛko ɛyi ye tɛkɛɛ la vindele hɔle. Noko mɔɔ Heeman nwunle Mɔdekae wɔ belemgbunli anlenkɛ kpole ne anloa na ɔnwunle kɛ yeandwazo yɛɛ ɔ nwo anwoso ye wɔ ɔ nyunlu la, Heeman vale Mɔdekae anwo ɛya kpole.+
10 Noko Heeman zɔle ɔ nwo na ɔhɔle ye sua nu. Akee ɔzoanle ɔmaanle bɛhɔvɛlɛle ɔ gɔnwo mɔ nee ɔ ye Zilɛhye+ bɛrale.
11 Heeman vale ye anwonyia kpole ne, ɔ mra mrenyia dɔɔnwo ne+ nee kɛzi belemgbunli ne ɛkpogya ye na yemaa ye gyinlabelɛ titili yedɛla ye mgbanyima nee ye azonvolɛ mɔɔ ɛha la dule ɔ nloa anu.+
12 Heeman vale zɔle zolɛ kɛ: “Mɔɔ tɛla ɛhye la, Ɔbahyema Ɛseta ando ɛsalɛ anvɛlɛ awie gyɛne biala kɛ ɔ nee belemgbunli ne ɛrɛla ye ɛkponledolɛ ne abo kɛ me ngome.+ Eza yedo ɛsalɛ yevɛlɛ me ɛhyema kɛ me nee belemgbunli ne ɛrɛla.+
13 Noko ɛhye mɔ amuala ɛmmaa me kunlu ɛndwo wɔ mekɛ ala mɔɔ menwu Dwuunli Mɔdekae kɛ ɔde belemgbunli ne anlenkɛ kpole ne anloa la.”
14 Yemɔti ɔ ye Zilɛhye nee ɔ gɔnwo mɔ amuala zele ye kɛ: “Maa bɛkpɔnla baka mɔɔ ye tendenle le kubit 50* la. Na nwonlomɔ, ka kile belemgbunli ne kɛ ɔmaa bɛhenda Mɔdekae wɔ zolɛ.+ Akee ɛ nee belemgbunli ne ɛhɔ ɛkponledolɛ ne abo na kɔlie ɛ nye.” Heeman anye liele nzuzulɛ ɛhye anwo, yemɔti ɔmaanle bɛkpɔnlanle baka ne.
