Ɛseta 6:1-14
-
Belemgbunli ne ɛli Mɔdekae eni (1-14)
6 Zɔhane nɔe ne, belemgbunli ne angola da.* Yemɔti ɔhanle kɛ bɛva bɛ mekɛ zo tetedwɛkɛ buluku ne bɛrɛla,+ na bɛgengale bɛhilele belemgbunli ne.
2 Bɛnwunle kɛ bɛhɛlɛ edwɛkɛ mɔɔ Mɔdekae hanle mɔɔ fale Begeteena nee Tilɛhye, belemgbunli ne mgbanyima nwiɔ mɔɔ sinza nlenkɛ ne mɔ mɔɔ bɔle kpɔkɛ kɛ bɛku* Belemgbunli Ahazelɔse la wɔ nu.+
3 Belemgbunli ne bizale kɛ: “Duzu a bɛyɛ bɛwula Mɔdekae anyunlunyia yɛɛ eni boni a bɛli ye wɔ ɛhye anwo a?” Belemgbunli ne sonvolɛma ne hanle kɛ: “Bɛtɛyɛle ɛhwee bɛtɛmaanle ye.”
4 Nzinlii belemgbunli ne bizale kɛ: “Nwane a wɔ alienwo ɛkɛ ne a?” Ɛnee Heeman ɛra belemgbunli sua nu alienwo+ ɛkɛ ne kɛ ɔbaha yeahile belemgbunli ne kɛ ɔmaa bɛhenda Mɔdekae wɔ baka ne mɔɔ yekpɔnla yemaa ye la azo.+
5 Belemgbunli ne sonvolɛma ne hanle hilele ye kɛ: “Heeman+ a gyi alienwo ɛkɛ a.” Yemɔti belemgbunli ne hanle kɛ: “Bɛmaa ɔrɛla.”
6 Mɔɔ Heeman wolole ɛkɛ ne la, belemgbunli ne bizale ye kɛ: “Duzu a ɔwɔ kɛ bɛyɛ bɛmaa sonla mɔɔ belemgbunli ne kulo kɛ ɔwula ye anyunlunyia la ɛ?” Heeman hanle ye wɔ ye ahonle nu kɛ: “Ɛnee nwane a belemgbunli ne kulo kɛ ɔwula ye anyunlunyia ɔtɛla me a?”+
7 Ɔti Heeman hanle hilele belemgbunli ne kɛ: “Sonla mɔɔ belemgbunli ne kulo kɛ ɔwula ye anyunlunyia la,
8 maa bɛva belemgbunli tɛladeɛ+ mɔɔ belemgbunli ne wula nee ɛkpɔnwɔ mɔɔ belemgbunli ne tɛnla zo mɔɔ bɛbɔ ye abotile la bɛrɛla.
9 Akee maa bɛva tɛladeɛ ne nee ɛkpɔnwɔ ne bɛwula belemgbunli ne mgbanyima titili ne mɔ ko asa anu; bɛva tɛladeɛ ne bɛwula sonla ne mɔɔ belemgbunli ne kulo kɛ ɔwula ye anyunlunyia la na bɛmaa ɔdɛnla ɛkpɔnwɔ ne azo na bɛva ye bɛpɛ gua wɔ sua ne azo. Ɔwɔ kɛ bɛdi ɔ nyunlu bɛbɔ ye nolo kɛ: ‘Kɛ bɛyɛ sonla mɔɔ belemgbunli kulo kɛ ɔwula ye anyunlunyia la ɛne!’”+
10 Ɛkɛ ne ala belemgbunli ne zele Heeman kɛ: “Maa ɔyɛ ndɛ! Kɔva tɛladeɛ ne nee ɛkpɔnwɔ ne na yɛ ye kɛ mɔɔ wɔha la maa Dwuunli Mɔdekae mɔɔ de belemgbunli ne anlenkɛ kpole ne anloa la. Mmagyakyi debie ko bɔbɔ wɔ mɔɔ wɔha la anu.”
11 Yemɔti Heeman hɔvale tɛladeɛ ne nee ɛkpɔnwɔ ne, ɔvale tɛladeɛ ne ɔwulale Mɔdekae+ na ɔvale ye ɔpɛle gua wɔ sua ne azo na ɔlile ɔ nyunlu ɔbɔle ye nolo kɛ: “Kɛ bɛyɛ sonla mɔɔ belemgbunli ne kulo kɛ ɔwula ye anyunlunyia la ɛne!”
12 Ɛhye anzi, Mɔdekae ziale hɔle belemgbunli ne anlenkɛ kpole ne anloa, noko Heeman hedale ɔ ti zo na ɔyɛle ye ndɛndɛ ɔvale nyanelilɛ ɔhɔle sua nu.
13 Mɔɔ Heeman hanle mɔɔ ɛdo ye la amuala hilele ɔ ye Zilɛhye+ nee ɔ gɔnwo mɔ kɔsɔɔti la, ye folɛtuvoma* ne nee ɔ ye Zilɛhye zele ye kɛ: “Saa Mɔdekae mɔɔ wɔbɔ ɔ bo kɛ ɛlɛtɔ aze wɔ ɔ nyunlu la le Dwuunli a, ɛnee ɛnrɛhola ye; ɛyɛ ye biala a, ɛbadɔ aze wɔ ɔ nyunlu.”
14 Mɔɔ bɛgua zo bɛ nee Heeman ɛlɛtendɛ la, belemgbunli ne mgbanyima ne mɔ rale na bɛyɛle ye ndɛndɛ bɛvale ye bɛhɔle ɛkponle ne mɔɔ Ɛseta ɛdo la abo.+
Ɔbodwɛkɛ
^ Hibulu aneɛ nu, “belemgbunli ne nafelɛ vile ɔ nye zo.”
^ Hibulu aneɛ nu, “kɛ bɛfa bɛ sa bɛaha.”
^ Hibulu aneɛ nu, “ye nrɛlɛbɛvolɛma.”
