Ɛseta 7:1-10
7 Yemɔti belemgbunli ne nee Heeman+ hɔle Ɔbahyema* Ɛseta ɛkponledolɛ ne abo.
2 Belemgbunli ne bizale Ɛseta bieko wɔ kenle nwiɔ ne azo wɔ nwanye ɛkponledolɛ ne abo kɛ: “Ɔbahyema Ɛseta, duzu a ɛhyia nwo a? Mebava meamaa wɔ. Yɛɛ duzu a ɛkpondɛ a? Saa me belemgbunlililɛ ne foa ko bɔbɔ a, ɛ sa baha ye!”+
3 Ɔbahyema Ɛseta buale ye kɛ: “O belemgbunli, saa menyia ɛ nyunlu ɛlolɛ yɛɛ saa belemgbunli anye balie nwo a, ɛnee mɔɔ mehyia nwo la a le kɛ ɛbalie me ngoane,*+ yɛɛ mɔɔ mekpondɛ la a le kɛ ɛbalie me menli ne.
4 Ɔluakɛ bɛdɔne yɛ,+ medame nee me menli ne, kɛ bɛhu yɛ, bɛzɛkye yɛ na bɛbɔ yɛ bo zo bɔkɔɔ.+ Saa bɛdɔnenle yɛ kɛ ngɛkɛlɛ mrenyia nee mraalɛ ala a, anrɛɛ mebayɛ koonwu. Noko edwɛkɛ ɛhye ɛnle kpalɛ, ɔluakɛ ɔbamaa belemgbunli ne aminli debie.”
5 Akee Belemgbunli Ahazelɔse bizale Ɔbahyema Ɛseta kɛ: “Ɛnee nwane ɔ, yɛɛ ahenle mɔɔ ɛzi ɔ kɛnra kɛ ɔyɛ debie zɛhae la wɔ ni?”
6 Ɛseta buale kɛ: “Kpɔvolɛ ne nee ɛtanevolɛ ne a le amumuyɛnli Heeman ɛhye.”
Heeman ahonle dule ɔlua belemgbunli ne nee ɔbahyema ne ati.
7 Belemgbunli ne vale ɛya dwazole vile nwanye ɛkponledolɛ ne abo na ɔhɔle belemgbunli sua nu ɛkɛ ne tola ne anu, noko Heeman dwazole kɛ ɔkpa Ɔbahyema Ɛseta kyɛlɛ kɛ ɔlie ye ngoane,* ɔluakɛ ɛnee yenwu kɛ belemgbunli ne ɛbɔ kpɔkɛ kɛ ɔtwe ɔ nzo.
8 Belemgbunli ne vi tola ne anu ziale rale nwanye ɛkponledolɛ sua ne anu la, ɔnwunle kɛ Heeman ɛdu ɛdɔ ebia ne mɔɔ Ɛseta la nu la azo. Belemgbunli ne deanle nu kɛ: “Eza me nye zo ɛke wɔ me sua nu ɛke ala yɛɛ ɛkulo kɛ ɛkye ɔbahyema ne mialera nu ɛ nee ye da ɔ?” Belemgbunli ne anloa penle ala la, bɛhedale Heeman anyunlu.
9 Haabona,+ belemgbunli ne mgbanyima ne mɔ ko akee hanle kɛ: “Heeman maanle bɛkpɔnlanle baka bɛmaanle Mɔdekae+ mɔɔ hanle edwɛkɛ mɔɔ liele belemgbunli ne ngoane la.+ Ɔgyi Heeman sua nu, ye tendenle le kubit 50.”* Ɔti belemgbunli ne hanle kɛ: “Bɛhɔhenda ye wɔ zolɛ.”
10 Yemɔti bɛhɔhendanle Heeman wɔ baka ne mɔɔ ɔkpɔnlanle ɔmaanle Mɔdekae la azo, na belemgbunli ne ɛya ne dwole.
