Ɛseta 9:1-32
9 Siane 12 ne, mɔɔ le Eda* siane ne kenle mɔɔ tɔ zo 13 ne azo,+ mɔɔ ɛnee belemgbunli ne edwɛkɛ ne nee ye mɛla ne bayɛ gyima,+ kenle mɔɔ ɛnee Dwuuma agbɔvolɛ anye la kɛ bɛbali bɛ nwo zo konim la, ninyɛne hakyile na Dwuuma lile bɛ agbɔvolɛ anwo zo konim.+
2 Dwuuma boɔboale bɛ nloa wɔ bɛ azua ne mɔ azo wɔ Belemgbunli Ahazelɔse maanzinli ne mɔ amuala anu+ kɛ bɛko bɛatia menli mɔɔ kpondɛ kɛ bɛsɛkye bɛ la, na awie biala angola angyinla bɛ nyunlu ɔluakɛ bɛ nwo ɛzulolɛ dɔle menli ne kɔsɔɔti anwo zo.+
3 Na mgbanyima mɔɔ wɔ maanzinli ne mɔ anu, maanzinli zo neavolɛma,+ amɛnladoma nee menli mɔɔ yɛ belemgbunli ne gyima la kɔsɔɔti gyinlanle Dwuuma anzi, ɔluakɛ ɛnee bɛsulo Mɔdekae.
4 Mɔdekae nyianle tumi kpole+ wɔ belemgbunli sua nu ɛkɛ, na ɛnee ye duma ɛlɛtɛlɛ wɔ maanzinli ne mɔ amuala anu, ɔluakɛ Mɔdekae tumi ne hɔle zo yɛle kpole.
5 Dwuuma vale konle dadeɛ hunle bɛ agbɔvolɛ kɔsɔɔti na bɛzɛkyele bɛ; bɛyɛle menli mɔɔ kpɔ bɛ la kɛ mɔɔ bɛkulo la.+
6 Dwuuma hunle menli 500 wɔ Hyuhyan*+ belemgbunli sua nu* na bɛzɛkyele bɛ.
7 Eza bɛhunle Paahyandeeta, Dalefɔn, Asepata,
8 Pɔleeta, Adeelea, Aledeeta,
9 Pamahyeta, Alesae, Aledae yɛɛ Vaezata,
10 Hamɛdeeta ara Heeman, Dwuuma kpɔvolɛ ne+ amra mrenyia bulu ne. Noko bɛhunle bɛ bɛwiele la, bɛanva bɛ debie biala.+
11 Kenle zɔhane bɛhanle menli dodo mɔɔ bɛhunle bɛ wɔ Hyuhyan* belemgbunli sua nu* la bɛhilele belemgbunli ne.
12 Belemgbunli ne zele Ɔbahyema* Ɛseta kɛ: “Dwuuma ɛhu menli 500 wɔ Hyuhyan* belemgbunli sua nu* na bɛzɛkye bɛ, yɛɛ bɛhu Heeman amra mrenyia bulu ne. Duzu a bɛyɛ ye wɔ belemgbunli ne maanzinli ne mɔ mɔɔ ɛha la anu a?+ Duzu a ɛhyia nwo kɛkala a? Mebayɛ meamaa wɔ. Yɛɛ duzu bieko a ɛkpondɛ a? Ɛ sa baha ye.”
13 Ɛseta buale kɛ: “Saa belemgbunli ne anye die nwo a,+ kɛ mɔɔ ɛnɛ mɛla ne kile la, ɔmaa Dwuuma mɔɔ wɔ Hyuhyan* la adenle ɔmaa bɛyɛ ye zɔhane ala ɛhyema;+ na bɛhenda Heeman amra bulu ne wɔ baka zo.”+
14 Yemɔti belemgbunli ne hanle kɛ bɛyɛ ye zɔ. Bɛlile mɛla wɔ Hyuhyan* na bɛhendanle Heeman amra bulu ne.
15 Dwuuma mɔɔ wɔ Hyuhyan* la boɔboale bɛ nloa bieko, wɔ Eda siane ne kenle mɔɔ tɔ zo 14 la azo,+ na bɛhunle menli 300 wɔ Hyuhyan,* noko bɛanva bɛ debie biala.
16 Dwuuma mɔɔ ɛha mɔɔ wɔ belemgbunli ne maanzinli ne mɔ anu la noko boɔboale bɛ nloa na bɛhonle bɛliele bɛ nwo.*+ Bɛbɔle bɛ agbɔvolɛ abo zo,+ bɛhunle menli mɔɔ kpɔ bɛ la anu 75,000; noko bɛanva bɛ debie biala.
17 Bɛyɛle ɛhye wɔ Eda siane ne kenle ne mɔɔ tɔ zo 13 la azo, bɛliele bɛ menle wɔ kenle mɔɔ tɔ zo 14 la azo na bɛyɛle ye ɛkponledolɛ nee anyelielɛ kenle.
18 Dwuuma mɔɔ wɔ Hyuhyan* la boɔboale bɛ nloa wɔ siane ne kenle mɔɔ tɔ zo 13+ nee 14+ la azo, bɛliele bɛ menle wɔ kenle ne mɔɔ tɔ zo 15 la azo na bɛyɛle ye ɛkponledolɛ nee anyelielɛ kenle.
19 Ɛhye ati a Dwuuma mɔɔ de azua mɔɔ ɛha la azo la yɛle Eda siane ne kenle mɔɔ tɔ zo 14 la anyelielɛ nee ɛkponledolɛ kenle, fɛlɛkolilɛ kenle,+ yɛɛ mekɛ mɔɔ bɛfa aleɛ bɛkyɛ bɛ nwo la.+
20 Mɔdekae+ hɛlɛle edwɛkɛ ɛhye mɔ na ɔmaanle bɛvale ngɛlata bɛhɔmaanle Dwuuma kɔsɔɔti mɔɔ wɔ Belemgbunli Ahazelɔse maanzinli ne mɔ anu la, bɛdabɛ mɔɔ bɛbikye nee bɛdabɛ mɔɔ bɛwɔ moa la.
21 Ɔhanle kɛ bɛhakye Eda siane ne kenle mɔɔ tɔ zo 14 nee 15 la ɛvolɛ biala,
22 ɔluakɛ Dwuuma liele bɛ menle vile bɛ agbɔvolɛ anwo wɔ zɔhane kenle ne, yɛɛ zɔhane siane ne anu a bɛ nyanelilɛ hakyile anyelielɛ+ na bɛ alɔbɔlɛlilɛ hakyile fɛlɛkolilɛ a. Ɛnee ɔwɔ kɛ bɛmaa ɔyɛ ɛkponledolɛ nee anyelielɛ kenle yɛɛ mekɛ mɔɔ bɛfa aleɛ bɛkyɛ bɛ nwo na bɛkyɛ ehyiavolɛma debie a.
23 Na Dwuuma liele dole nu kɛ bɛbadoa fɛlɛkolilɛ ne mɔɔ ɛnee bɛbɔ ɔ bo la azo na bɛayɛ mɔɔ Mɔdekae hɛlɛle rɛlɛle bɛ la.
24 Ɔluakɛ Agagenli+ Hamɛdeeta ara Heeman,+ Dwuuma kɔsɔɔti kpɔvolɛ ne vale Dwuuma anwo adwenle ɛtane kɛ ɔsɛkye bɛ,+ na ɔguale Pulu,+ mɔɔ yemɔ a le Ma Ɛgualɛ* la, kɛ ɔfa yeadu bɛ ahonle na yeazɛkye bɛ.
25 Noko mɔɔ Ɛseta hɔle belemgbunli ne anyunlu la, belemgbunli ne maanle bɛhɛlɛle kɛ:+ “Bɛmaa Dwuuma anwo adwenle ɛtane mɔɔ ɔvale la+ ɛzia ɛragua ɔ ti zo”; na bɛhendanle ye nee ɔ mra bulu ne wɔ baka zo.+
26 Ɛhye ati a bɛvɛlɛle kenle ɛhye mɔ Pulem la, ɔvi duma Pulu*+ anu. Zɔhane ati, ɔlua mɔɔ bɛhɛlɛle ye wɔ kɛlata ɛhye anu, mɔɔ bɛnwunle ye wɔ edwɛkɛ ɛhye anwo nee mɔɔ rale bɛ nwo zo la amuala la ati,
27 Dwuuma liele dole nu kɛ bɛ nee bɛ bo zo amra nee menli mɔɔ baraboka bɛ la kɔsɔɔti+ bali fɛlɛko wɔ kenle nwiɔ ɛhye mɔ anu mɔɔ ɔmkpa nwolɛ fee a, na ɛvolɛ biala, mekɛ ne dwu a, bɛbayɛ mɔɔ bɛhɛlɛle ye wɔ nwolɛ la.
28 Ɛnee ɔwɔ kɛ awolɛndoazo biala, abusua biala, maanzinli biala nee sua biala kakye kenle ɛhye mɔ; na ɔnle kɛ Dwuuma maa Pulem kenle ɛhye mɔ abo pɛ ɛlɛ, yɛɛ ɔnle kɛ bɛ bo zo amra gyakyi bɛ ɛhakyelɛ.
29 Akee Ɔbahyema Ɛseta, Abeheli ara raalɛ ne nee Dwuunli Mɔdekae vale tumi kpole hɛlɛle Pulem ne anwo kɛlata mɔɔ tɔ zo nwiɔ la vale zile zo.
30 Ɔhɛlɛle ngɛlata ɔmaanle bɛhɔmaanle Dwuuma kɔsɔɔti mɔɔ wɔ Ahazelɔse belemgbunlililɛ ne maanzinli 127 ne mɔ anu la,+ wɔ anzodwolɛ nee nɔhalɛlilɛ nu
31 ɔvale ɔzile Pulem kenle ne mɔ mɔɔ bɛ mekɛ dwu a ɔwɔ kɛ bɛkakye la azo kɛ mɔɔ Dwuunli Mɔdekae nee Ɔbahyema Ɛseta hanle hilele bɛ kɛ bɛyɛ ala la,+ yɛɛ kɛ mɔɔ bɛliele bɛdole nu kɛ bɛ nee bɛ bo zo amra bayɛ la,+ bɛbahye ɛhɔne+ na bɛayɛ modolɛ nzɛlɛlɛ.+
32 Na Ɛseta edwɛkɛ ne zile Pulem+ ne anwo edwɛkɛ ɛhye azo, na bɛhɛlɛle ye wɔ buluku nu bɛdole ɛkɛ.
Ɔbodwɛkɛ
^ Anzɛɛ “Susa.”
^ Anzɛɛ “aranemgbole ne anu.”
^ Anzɛɛ “Susa.”
^ Anzɛɛ “aranemgbole ne anu.”
^ Anzɛɛ “Belemgbunli Raalɛ.”
^ Anzɛɛ “Susa.”
^ Anzɛɛ “aranemgbole ne anu.”
^ Anzɛɛ “Susa.”
^ Anzɛɛ “Susa.”
^ Anzɛɛ “Susa.”
^ Anzɛɛ “Susa.”
^ Anzɛɛ “na bɛgyinlanle bɛliele bɛ ɛkɛla.”
^ Anzɛɛ “Susa.”
^ Nea Edwɛkɛbohilelɛ.
