Ɛzɛdɔso 23:1-33
23 “Mmamaa edwɛkɛ mɔɔ ɛnle nɔhalɛ la salo.*+ Mmadi daselɛ adalɛ+ ɛboa amumuyɛnli.
2 Mmadi menli dɔɔnwo anzi ɛkɔyɛ ɛtane, yɛɛ mmadi menli dɔɔnwo anzi ɛkɔdi daselɛ adalɛ ɛfa ɛsɛkye pɛlepɛlelilɛ.*
3 Saa ɛlɛdi ehyianli edwɛkɛ a, mmadi mɔguazo.+
4 “Saa ɛnwu kɛ wɔ kpɔvolɛ ɛnlankɛ anzɛɛ asoaso ɛminli a, kye ye kɔmaa ye.+
5 Saa ɛnwu kɛ adesoa ɛdɔ awie mɔɔ kpɔ wɔ la asoaso nwo zo a, mmagyakyi ye ɛkɛ ne ɛkɔ. Ɔwɔ kɛ ɛboa ye ɛmaa ɔye nane ne.+
6 “Ɛlɛdi ehyianli edwɛkɛ a, nea na wɔangyea nɔhalɛ ne anye.+
7 “Twe ɛ nwo fi adalɛ somolɛ* nwo, yɛɛ mmaku awie mɔɔ ɛnze nwolɛ bie la nee tenlenenli, ɔluakɛ menrɛbua amumuyɛnli benle.*+
8 “Mmadie belaebo, ɔluakɛ belaebo si menli mɔɔ nwu debie wienyi la anye yɛɛ ɔkola ɔsɛkye tenlenema edwɛkɛ.+
9 “Bɛmmasisi ɛyɛvolɛ. Bɛdabɛ bɛze kɛzi ɛyɛvolɛ edwɛkɛ de la,* ɔluakɛ ɛnee bɛle nyɛvolɛ wɔ Yigyibiti azɛlɛ zo.+
10 “Fa ɛvolɛ nsia dua ma wɔ wɔ azɛlɛ ne azo na boɔboa ɔ nloa.+
11 Noko ɛvolɛ nsuu ne azo, maa azɛlɛ ne ɛla ɛkɛ ne mgbane, mmadua debie wɔ zo na ehyiavolɛma adidi zolɛ, na mɔɔ kɛha la, ɛbɔ nu nane ali. Zɔhane ala a ɔwɔ kɛ ɛyɛ wɔ vanye nee ɔlivi egyinli a.
12 “Fa kenle nsia yɛ wɔ gyima; noko kenle nsuu ne azo, mmayɛ gyima amaa wɔ ɛnlankɛ nee asoaso alie bɛ menle na wɔ akɛlɛ bɛlɛra ara nee ɛyɛvolɛ ahola alie bɛ menle.+
13 “Bɛnlea na bɛli debie biala mɔɔ meha la azo,+ na bɛmmabɔ nyamenle gyɛne aluma; ɔnle kɛ ɔfinde bɛ nloa.+
14 “Ɛvolɛ biala, bɛli ɛvoyia nsa bɛwula me anyunlunyia.+
15 Bɛbali Paano Mɔɔ Mgbɔvonle Ɛnle Nu Ɛvoyia ne.+ Saa mekɛ ne dwu a, bɛbali paano mɔɔ mgbɔvonle ɛnle nu la kenle nsuu wɔ Ebebe* siane ne anu+ kɛ mɔɔ meha mehile bɛ la, ɔluakɛ mekɛ zɔhane a bɛvile Yigyibiti a. Ɔnle kɛ awie biala fa ɔ sa mgbane ba me nyunlu.+
16 Eza bɛbali Ma Ɛdelɛ Ɛvoyia* ne wɔ mekɛ mɔɔ bɛkɛde bɛ ɛya nu ma mɔɔ limoa la;+ yɛɛ Ma Nloa Ɛboɔboalɛ Ɛvoyia* ne wɔ ɛvolɛ ne awieleɛ, wɔ mekɛ mɔɔ bɛkɛboɔboa bɛ ɛya nu ma nloa la.+
17 Ɛvolɛ biala, ɔwɔ kɛ mrenyia ne mɔ kɔsɔɔti ba Gyihova, nɔhalɛ Awulae ne anyunlu fane nsa.+
18 “Bɛmmafa debie biala mɔɔ mgbɔvonle wɔ nu la bɛboka me afɔlebɔdeɛ mogya ne anwo. Bɛmmamaa aleɛ kye ɛnlome mɔɔ bɛva bɛbɔ afɔle wɔ me ɛvoyia ne mɔ abo la azo.
19 “Fa wɔ azɛlɛ ne azo ma mɔɔ kɛlimoa kɛbolo la anu kpalɛ ne bɛla Gyihova wɔ Nyamenle ne sua nu.+
“Mmato abɔnkye ralɛ wɔ ɔ nli nyɛfonzule nu.+
20 “Melɛsoa anwumabɔvolɛ meamaa yeali ɛ nyunlu+ na yeazinza wɔ wɔ adenle nu na yeava wɔ yeahɔ azɛlɛ ne mɔɔ meziezie la azo.+
21 Yɛ ɛnzolɛ tie ye na yɛ tieyɛ maa ye. Mmate ɔ nwo atua, ɔluakɛ ɔnrɛva wɔ mɛladonlɛ ɔnrɛhyɛ wɔ,+ ɔboalekɛ me duma la ɔ nwo zo.
22 Noko saa ɛtie ɔ ne bɔkɔɔ na ɛyɛ debie biala mɔɔ mebaha la a, mebaho meatia wɔ agbɔvolɛ na meadwazo meatia menli mɔɔ dwazo tia wɔ la.
23 Ɔluakɛ me anwumabɔvolɛ bali ɛ nyunlu na yeava wɔ yeahɔ Amɔlema, Hɛtema, Pilɛzema, Keenama, Havaema nee Gyibɛsema azɛlɛ zo, na mebazɛkye bɛ.+
24 Mmabɔ ɛ ti aze ɛmaa bɛ nyamenle ne mɔ anzɛɛ mmamaa bɛtwehwe wɔ na ɛsonle bɛ yɛɛ mmasukoa bɛ nyɛleɛ ne mɔ.+ Emomu ɔwɔ kɛ ɛbubu bɛ na ɛsɛkye bɛ ɛzonlenlɛ mpila ne mɔ.+
25 Bɛzonle Gyihova bɛ Nyamenle ne+ na ɔbayila bɛ aleɛ nee bɛ nzule zo.+ Mebaye anwodolɛ meavi bɛ avinli.+
26 Bɛ mraalɛ ne mɔ ako ɛnrɛkpɔne yɛɛ bɛnrɛyɛ mota,+ na mebamaa bɛanyia ngoane tendenle.*
27 “Mebamaa me nwo ɛzulolɛ ali bɛ nyunlu,+ na mebamaa menli kɔsɔɔti mɔɔ bɛ nee bɛ bayia la anye zo ada bɛ, na meamaa bɛ agbɔvolɛ agua ɛbɔ nu.*+
28 Mebamaa arɛlebɔlɛ* ali bɛ nyunlu,+ na ɔbavoa Havaema, Keenama yɛɛ Hɛtema yeavi bɛ nyunlu.+
29 Menrɛvoa bɛ menrɛvi bɛ nyunlu wɔ ɛvolɛ ko anu, anrɛɛ azɛlɛ ne badɔ mgbane na nane anwo ɛzulolɛ ayi zo na bɛagyegye bɛ.+
30 Mebayɛ ye ngyikyi ngyikyi meavoa bɛ kɔkpula kɛ bɛ nwo kɛzo na bɛkɛva azɛlɛ ne la.+
31 “Mebamaa bɛ azɛlɛ ne ɛweɛne ne abɔ ɔ bo wɔ Nyevile Kɔkɔlɛ ne anloa ahɔdwu Filisitiama nyevile ne anloa, yɛɛ fienemgbole ne anloa kɔdwu Azule ne* anloa;+ ɔluakɛ mebava azɛlɛ ne azo amra meawula bɛ sa nu na bɛavoa bɛ.+
32 Bɛ nee bɛ anzɛɛ bɛ nyamenle ne mɔ mmayɛ ngyekyeleɛ biala.+
33 Bɛmmamaa bɛtɛnla bɛ azɛlɛ ne azo, anrɛɛ bɛkɛmaa bɛkɛyɛ ɛtane bɛkɛtia me. Saa bɛsonle bɛ nyamenle ne mɔ a, ɔbayɛ ɛhane yeamaa bɛ.”+
Ɔbodwɛkɛ
^ Hibulu aneɛ nu, “Mmaka edwɛkɛ mɔɔ ɛnle nɔhalɛ la.”
^ Anzɛɛ “ɛkɔdi daselɛ mɔɔ bɛlɛdi la bie.”
^ Hibulu aneɛ nu, “edwɛkɛ.”
^ Anzɛɛ “menrɛmaa amumuyɛnli ɛnrɛva ɔ nwo ɛnrɛli.”
^ Anzɛɛ “bɛze ɛyɛvolɛ ɛbɛlabɔlɛ (ɛkɛla).”
^ Eza bɛfɛlɛ ye Kpɔda Bo Ɛdɛnlanlɛ (Ɛdanlɛ Azua) Ɛvoyia.
^ Eza bɛfɛlɛ ye Dapɛne Dapɛne Ɛvoyia anzɛɛ Pɛntekɔso Ɛvoyia.
^ Anzɛɛ “mebamaa bɛali bɛ ngoane mekɛ kɔsɔɔti.”
^ Anzɛɛ “meamaa bɛ agbɔvolɛ ahakyi bɛ nzi amaa bɛ.”
^ Anzɛɛ ɔkola ɔkile, “ɛzulolɛ; ahunlundetelɛ.”
^ Ɛhye kile, Yufileti ne.
