Ɛzɛdɔso 27:1-21
27 “Ɛbava akasea baka wɔayɛ afɔlemokyea ne;+ ye tendenle bayɛ kubit* nnu yɛɛ ye tɛtɛlɛ bayɛ kubit nnu. Ɔwɔ kɛ afɔlemokyea ne tɛbanu nna ne amuala sɛ na ye anwumahɔlɛ yɛ kubit nsa.+
2 Ɛbayɛ mɛne+ wɔ ɔ bati nna ne mɔ azo; mɛne ne mɔ nee afɔlemokyea ne babɔ nu ayɛ debie ko, na kolo kɔbele gua afɔlemokyea ne anwo.+
3 Ɛbayɛ nwolɛ bokiti mɔɔ bɛbava bɛavula nzonle,* yɛɛ sofi, ahyɛnze, faka nee senlevalɛ ahyɛnze, na ɛbava kɔbele a wɔayɛ nwolɛ ninyɛne ne amuala a.+
4 Ɛbava kɔbele wɔayɛ kɛlakɛlɛ wɔ afɔlemokyea ne anu, na fa kɔbele ne bie yɛ ngɛba nna wɔ ye mgbɛnezo nna ne.
5 Ɛbava kɛlakɛlɛ ne wɔado afɔlemokyea ne anloa kɛba ne abo wɔamaa yeahɔdwu afɔlemokyea ne avinli.
6 Ɛbava akasea baka wɔayɛ mbaka ndenrɛndenra wɔamaa afɔlemokyea ne na wɔaholo kɔbele wɔagua nwolɛ.
7 Bɛbava mbaka ne bɛawulowula ngɛba ne mɔ mɔɔ wɔ afɔlemokyea ne tɛbanu nwiɔ ne la anu amaa bɛava bɛazoa.+
8 Ɛbayɛ afɔlemokyea ne kɛ taboa ɛlɛka mɔɔ ɔ kunlu le tokule la. Ɔwɔ kɛ ɛyɛ ye kɛ mɔɔ ɔvale ɔhilele wɔ wɔ boka ne azo la.+
9 “Ɛbayɛ ɛdanlɛsua ne alienwo ne.+ Ɛbava mgbɛnudanlɛ mɔɔ bɛva lenen nyɛma kpalɛ bɛnwo la wɔahenda ye nyiakɛ, ye tendenle bayɛ kubit 100.+
10 Ɛbava wɔahenda mpila 20 mɔɔ gyigyi kɔbele adiabo 20 azo la azo. Ɛbava dwɛtɛ fufule wɔayɛ mpila ne mɔ nzosɔnu nee bɛ ngɛba ne mɔ.
11 Sɔlɔ mgbɛnudanlɛ ne noko tendenle bayɛ kubit 100, ye mpila 20 yɛɛ ye kɔbele adiabo 20, yɛɛ mpila ne mɔ nzosɔnu nee bɛ ngɛba ne mɔ le dwɛtɛ fufule.
12 Adɔleɛ afoa nu mgbɛnudanlɛ ne bayɛ kubit 50 wɔ alienwo ne tɛtɛlɛ nu, ye mpila bulu yɛɛ ye adiabo bulu.
13 Alienwo ɛkɛ ne aduduleɛ afoa nu tɛtɛlɛ bayɛ kubit 50.
14 Bɛbava mgbɛnudanlɛ mɔɔ le kubit 15 la bɛahenda ye foa ko, ye mpila nsa yɛɛ ye adiabo nsa.+
15 Foa ko ne noko mgbɛnudanlɛ ne bayɛ kubit 15, ye mpila nsa yɛɛ ye adiabo nsa.
16 “Ɛbava nyɛma buluwu, boane enrinli buluwu nee kɔkɔlɛ afonla, ɛdanlɛ kɔkɔlɛ nee lenen nyɛma kpalɛ wɔabɔ nu wɔanwo ɛdanlɛ*+ mɔɔ le kubit 20 la wɔahenda alienwo anlenkɛ ne anyunlu, ye mpila nna yɛɛ ye adiabo nna.+
17 Mpila mɔɔ gyigyi alienwo ɛkɛ ne la amuala ngɛba nee ye nzosɔnu ne mɔ bayɛ dwɛtɛ fufule na bɛ adiabo ne mɔ ayɛ kɔbele.+
18 Alienwo ɛkɛ ne tendenle bayɛ kubit 100,+ ye tɛtɛlɛ bayɛ kubit 50, yɛɛ ye anwumahɔlɛ bayɛ kubit 5; fa lenen nyɛma kpalɛ mɔɔ bɛnwo la yɛ, yɛɛ ɔwɔ kɛ ye adiabo ne mɔ yɛ kɔbele.
19 Ɔwɔ kɛ ahyɛnze nee ninyɛne kɔsɔɔti mɔɔ bɛfa bɛyɛ gyima wɔ ɛdanlɛsua ne anu, yɛɛ ɛdanlɛsua ne nee alienwo ɛkɛ ne adakola ne mɔ amuala yɛ kɔbele.+
20 “Ka kile Yizilayɛma kɛ bɛva ɔlivi nwole kpalɛ mɔɔ bɛfa bɛgua kɛnlaneɛ nu la bɛrɛlɛ wɔ, amaa ahɛnlaneɛ ne mɔ agyinla zo dahuu.+
21 Aalɔn nee ɔ mra mrenyia ne mɔ banlea azɔ ahɛnlaneɛ ne mɔ wɔ mgbɛnudanlɛ ne mɔɔ henda Daselɛlilɛ ne+ anyunlu wɔ nyianu ɛdanlɛsua ne anu la anyunlu, ɔvi nɔsolɛ kɔdwu nwonlomɔ wɔ Gyihova anyunlu.+ Ɛhye le mɛla mɔɔ wɔ ɛkɛ ne dahuu mɔɔ Yizilayɛma bali zo wɔ bɛ awolɛndoazo kɔsɔɔti anu a.+
Ɔbodwɛkɛ
^ Anzɛɛ “ɛnlome nzonle,” ɛhye kile, nzonle mɔɔ nane mɔɔ bɛva bɛbɔ afɔle la ɛnlome ne ɛfonla ye la.
^ Anzɛɛ “mgbɛnudanlɛ.”
