Ɛzɛdɔso 28:1-43
28 “Ɛbavɛlɛ ɛ diema Aalɔn nee ɔ mra mrenyia ne mɔ wɔavi Yizilayɛma anu amaa bɛayɛ me ɛsɔfoma+—Aalɔn nee ɔ mra+ Needabe nee Abaehu,+ Ɛlieza yɛɛ Yetamaa.+
2 Ɛbayɛ adɛladeɛ nwuanzanwuanza wɔamaa ɛ diema Aalɔn, amaa yeawula ye anyunlunyia na ɔ nwo ayɛ fɛ.+
3 Ka kile menli kɔsɔɔti mɔɔ bɔ mɔdenle* mɔɔ memaa nrɛlɛbɛ sunsum ɛyi bɛ tɛkɛɛ la,+ na bɛbayɛ Aalɔn adɛladeɛ ne mɔ amaa ɔ nwo ade na yeayɛ me ɛsɔfo.
4 “Adɛladeɛ mɔɔ ɛbayɛ la ɛne: akɛnrazo aguzo,+ yifɔdo,+ tɛladeɛ mɔɔ ɛnlɛ ɔ sa,+ tɛladeɛ tendenle ndetɛndeta, abotile+ yɛɛ tabule;+ bɛbayɛ adɛladeɛ ɛhye bɛamaa ɛ diema Aalɔn nee ɔ mra mrenyia ne mɔ, amaa bɛayɛ me ɛsɔfoma.
5 Gyimayɛvoma mɔɔ bɔ mɔdenle la bava nvutuke, nyɛma buluwu, boane enrinli buluwu nee kɔkɔlɛ afonla, ɛdanlɛ kɔkɔlɛ yɛɛ lenen kpalɛ bɛanwo.
6 “Bɛbava nvutuke, nyɛma buluwu, boane enrinli buluwu nee kɔkɔlɛ afonla, ɛdanlɛ kɔkɔlɛ yɛɛ lenen nyɛma kpalɛ bɛayɛ yifɔdo ne, ɔwɔ kɛ bɛnwo nuhua.+
7 Bɛbayɛ ɔ bati nwiɔ na bɛava bɛasosɔ ye wɔ ɔ nloa nwiɔ ne.
8 Ɔwɔ kɛ bɛfa nvutuke, nyɛma buluwu, boane enrinli buluwu nee kɔkɔlɛ afonla, ɛdanlɛ kɔkɔlɛ yɛɛ lenen nyɛma kpalɛ ne bie bɛnwo bɛlɛte*+ bɛsɔ yifɔdo ne na bɛava bɛahye zo.
9 “Ɛbava ɔnekese awolɛ nwiɔ+ na wɔahɛlɛ Yizilayɛ amra mrenyia ne mɔ aluma wɔ zolɛ,+
10 ɛbahɛlɛ aluma nsia wɔ bolɛ ne ko azo, na wɔahɛlɛ aluma nsia ne mɔɔ ɛha la wɔ bolɛ ko ne noko azo, ɔvi kpanyinli ne anwo zo kɔdwu ekyi ne anwo zo.
11 Dwinvolɛ mɔɔ kɛlɛ aluma wɔ bolɛ zo la bahɛlɛ Yizilayɛ amra mrenyia ne mɔ aluma wɔ awolɛ nwiɔ ne azo kɛ mɔɔ ɔkɛlɛ ɔgua debie zo la.+ Akee ɛbava nvutuke wɔatoto ɔ nloa.
12 Ɛbava awolɛ nwiɔ ne wɔatoto yifɔdo ne abati ne mɔ na yeayɛ ngakyelɛ awolɛ yeamaa Yizilayɛma,+ na Aalɔn bava bɛ aluma mɔɔ wɔ ɔ bati nwiɔ ne la ahɔ Gyihova anyunlu kɛ ngakyedeɛ.
13 Fa nvutuke yɛ debie toto ɔ nloa
14 na fa nvutuke tagyee yɛ kyeenyi nwiɔ mɔɔ bɛbɛka ye kɛ nyɛma la,+ na fa kyeenyi ne mɔ sosɔ nvutuke ne mɔɔ deda ɔ nloa la.+
15 “Maa awie ɛnwo ndɛnebualɛ akɛnrazo aguzo ne.+ Ɔwɔ kɛ ɔfa nvutuke, nyɛma buluwu, boane enrinli buluwu nee kɔkɔlɛ afonla, ɛdanlɛ kɔkɔlɛ yɛɛ lenen nyɛma kpalɛ ɔnwo ye kɛ yifɔdo ne la.+
16 Saa bɛbu bɛgua zo a, ɔwɔ kɛ ye tɛbanu ne mɔ sɛ, ye tendenle bayɛ waa ko* yɛɛ ye tɛtɛlɛ bayɛ waa ko.
17 Ɛbava ezukoa awolɛ wɔabetɛbeta zolɛ, yɛ ye ekpunli nna. Ekpunli ne mɔɔ limoa la le wulubi, topaze yɛɛ ɛmelade.
18 Ekpunli ne mɔɔ tɔ zolɛ nwiɔ la le tɛkoyɛse, safaya yɛɛ gyasepa.
19 Ekpunli ne mɔɔ tɔ zolɛ nsa la le lihyɛm bolɛ,* agate yɛɛ ametese.
20 Ekpunli ne mɔɔ tɔ zolɛ nna la le kelesɔlaete, ɔnekese yɛɛ gyeede. Ɔwɔ kɛ bɛfa nvutuke bɛtoto bɛ nloa.
21 Kɛlɛ Yizilayɛ amra mrenyia 12 ne aluma wɔ bolɛ ko biala azo. Ɔwɔ kɛ bɛkɛlɛ ko biala azo kɛ mɔɔ bɛkɛlɛ bɛgua debie zo la, duma ko biala bagyinla ɛkɛ ne amaa mbusua 12 ne anu ko.
22 “Ɛbava nvutuke tagyee wɔayɛ kyeenyi wɔagua akɛnrazo aguzo ne azo kɛ nyɛma la.+
23 Ɛbayɛ nvutuke ngɛba nwiɔ wɔamaa akɛnrazo aguzo ne na wɔava ngɛba nwiɔ ne wɔasosɔ akɛnrazo aguzo ne anloa nwiɔ ne.
24 Ɛbava nvutuke nyɛma nwiɔ ne wɔasosɔ ngɛba nwiɔ ne mɔɔ wɔ akɛnrazo aguzo ne anloa la.
25 Ɛbava nyɛma nwiɔ ne anloa nwiɔ ne wɔasosɔ nvutuke nwiɔ ne mɔɔ deda bɛ nloa la, na ɔwɔ kɛ ɛfa ɛsɔ yifɔdo ne abati ne mɔ wɔ ɔ nyunlu.
26 Ɛbayɛ nvutuke ngɛba nwiɔ na wɔava wɔasosɔ akɛnrazo aguzo ne anloa nwiɔ ne mɔɔ wɔ ɔ bo la akunlu ne mɔɔ beta yifɔdo ne la.+
27 Ɛbayɛ nvutuke ngɛba nwiɔ bieko wɔ yifɔdo ne anyunlu, wɔ ɔ bati nwiɔ ne abo, mɔɔ bikye ɛleka mɔɔ bɛsosɔ yifɔdo ne la wɔ yifɔdo bɛlɛte* ne mɔɔ bɛnwo la anwuma.+
28 Ɔwɔ kɛ bɛfa nyɛma buluwu bɛsosɔ akɛnrazo aguzo ne na bɛfa bɛkyekye ye ngɛba ne nee yifɔdo ne ngɛba ne mɔ. Ɛhye bamaa akɛnrazo aguzo ne ala yifɔdo ne azo wɔ bɛlɛte* ne mɔɔ bɛnwo la anwuma.
29 “Ɔwɔ kɛ Aalɔn fa ndɛnebualɛ aguzo ne mɔɔ Yizilayɛ amra mrenyia ne mɔ aluma wɔ zo la bɔ ɔ kɛnra azo wɔ mekɛ mɔɔ ɔlɛkɔ Nwuanzanwuanza Ɛleka ne la kɛ ngakyedeɛ wɔ Gyihova anyunlu dahuu.
30 Ɛbava Yulem nee Tɛmem*+ ne wɔawula ndɛnebualɛ akɛnrazo aguzo ne anu, na Aalɔn ava abɔ ɔ kɛnra azo wɔ mekɛ mɔɔ ɔlɛba Gyihova anyunlu la, na ɔwɔ kɛ Aalɔn fa deɛ ne mɔɔ ɔbava yeabua Yizilayɛma ndɛne ne la bɔ ɔ kɛnra azo wɔ Gyihova anyunlu dahuu.
31 “Ɛbava nyɛma buluwu angomekye a wɔayɛ yifɔdo tɛladeɛ ne mɔɔ ɛnlɛ ɔ sa la.+
32 Ɔwɔ kɛ bɛpɛ tɛladeɛ ne akɔme wɔ ye avinli. Ɔwɔ kɛ bɛnwo ɔ nloa ne amuala bɛbɛnga bɛyia. Yɛ ye kɛ konle tɛladeɛ kɔme la amaa yeande.
33 Ɛbava nyɛma buluwu, boane enrinli buluwu nee kɔkɔlɛ afonla, nee ɛdanlɛ kɔkɔlɛ wɔayɛ pɔmegelanate wɔ ɔ nloa ne amuala, na wɔayɛ nvutuke dɔne wɔ bɛ avinli.
34 Ɛbamaa nvutuke dɔne ko adoa pɔmegelanate ko biala wɔ tɛladeɛ tendenle ne mɔɔ ɛnlɛ ɔ sa la anloa ne amuala.
35 Ɔwɔ kɛ Aalɔn wula fa yɛ gyima, na mekɛ biala mɔɔ ɔbahɔ ɛleka nwuanzanwuanza ne kɛ ɔkagyinla Gyihova anyunlu anzɛɛ ɔlɛfinde la, bɛbade dɔne ne mɔ ane amaa yeanwu.+
36 “Ɛbava nvutuke tagyee wɔabolo debie ɛdɛbaa mɔɔ ta la na wɔahɛlɛ zolɛ kɛ mɔɔ bɛkɛlɛ bɛgua debie zo la kɛ: ‘Gyihova le nwuanzanwuanza.’+
37 Ɛbava nyɛma buluwu wɔakyekye wɔabɔ abotile ne+ anwo; ɔbaha abotile ne anyunlu.
38 Ɔbabɔ Aalɔn anwoma azo, na saa awie yɛ ɛtane tia ninyɛne nwuanzanwuanza ne mɔ+ mɔɔ Yizilayɛma te nwo wɔ mekɛ mɔɔ bɛkɛva bɛkɛmaa kɛ ahyɛlɛdeɛ nwuanzanwuanza la a, Aalɔn ali nwolɛ ɛzonle. Ɔwɔ kɛ dahuu ɔbɔ ɔ nwoma azo amaa bɛanyia Gyihova anyunlu ɛlolɛ.
39 “Ɛbava lenen kpalɛ wɔanwo tɛladeɛ tendenle ndetɛndeta, wɔava lenen kpalɛ wɔayɛ abotile na wɔanwo tabule.+
40 “Eza ɛbayɛ adɛladeɛ ndendenle, tabule nee ahyɛlɛ wɔamaa Aalɔn amra mrenyia ne mɔ,+ amaa yeawula bɛ anyunlunyia na bɛ nwo ayɛ fɛ.+
41 Ɛbava wɔawulowula Aalɔn nee ɔ mra mrenyia ne mɔ na wɔakpokpa bɛ nwole+ na wɔakpa bɛ+ kɛ ɛsɔfoma* na wɔade bɛ nwo, na bɛayɛ me ɛsɔfoma.
42 Eza yɛ lenen nika* maa bɛ maa bɛva bɛheda bɛ nwo.+ Maa ɔvi bɛ nze zo ɔhɔdwu bɛ ɛzɔlɛ nwo.
43 Mekɛ biala mɔɔ Aalɔn nee ɔ mra mrenyia ne mɔ kɛra nyianu ɛdanlɛsua ne anu anzɛɛ bɛkɛbikye afɔlemokyea ne kɛ bɛbazonle wɔ ɛleka nwuanzanwuanza ne la, ɔwɔ kɛ bɛwula adɛladeɛ ɛhye mɔ amaa bɛanli fɔlɛ na bɛanwu. Ɔle mɛla mɔɔ wɔ ɛkɛ ne dahuu maa ɔdaye nee ɔ bo zo amra a.
Ɔbodwɛkɛ
^ Hibulu aneɛ nu, “mɔɔ lɛ ahonle mɔɔ ze nrɛlɛbɛ.”
^ Anzɛɛ “akyeso.”
^ Ɔvi bɛ sa kokotile mɔɔ kɔdwu bɛ sa ɛrɛlɛsɛka ekyi ne azo la a le bɛ sa waa ko a. Ye tendenle le sm 22.2 (enkyi 8.75) Nea Mok. B14.
^ Ezukoa bolɛ bie mɔɔ bɛnze ye, ɔbahola yeayɛ amba, hayasente, opale anzɛɛ tɔmalene.
^ Anzɛɛ “akyeso.”
^ Anzɛɛ “akyeso.”
^ Nea Edwɛkɛbohilelɛ.
^ Hibulu aneɛ nu, “na wɔava tumi wɔawula bɛ sa nu.”
^ Anzɛɛ “aze adɛladeɛ.”
