Ɛzɛdɔso 32:1-35
32 Mɔɔ menli ne nwunle kɛ Mosisi ɛhyɛ wɔ boka ne azo na ɔmba la,+ bɛboɔboale bɛ nloa wɔ Aalɔn anwo ɛkɛ ne na bɛzele ye kɛ: “Dwazo, yɛ nyamenle maa yɛ maa ɔli yɛ nyunlu,+ ɔluakɛ Mosisi ɛhye, nrenyia ne mɔɔ yele yɛ vile Yigyibiti azɛlɛ zo la, yɛnze mɔɔ ɛdo ye a.”
2 Na Aalɔn zele bɛ kɛ: “Bɛyeye nvutuke asomadeɛ+ mɔɔ wɔ bɛ ye mɔ, bɛ mra mrenyia nee bɛ mra mraalɛ ne mɔ anzo nu la bɛrɛlɛ me.”
3 Ɔti menli ne amuala yeyele nvutuke asomadeɛ mɔɔ wɔ bɛ nzo nu la rɛlɛle Aalɔn.
4 Akee ɔliele nvutuke ne ɔvile bɛ sa nu na ɔvale adwinli bulalɛ ɔzieziele ye ɔyɛle ɛnlankɛ ralɛ ananze.*+ Bɛbɔle ɔ bo bɛhanle kɛ: “O Yizilayɛ, wɔ Nyamenle ne mɔɔ yele wɔ vile Yigyibiti azɛlɛ zo la ɛne.”+
5 Mɔɔ Aalɔn nwunle ɛhye la, ɔzile afɔlemokyea ɔziele ananze ne anyunlu ɛkɛ. Akee Aalɔn deanle nu kɛ: “Ɛhyema yɛbali ɛvoyia yɛawula Gyihova anyunlunyia.”
6 Yemɔti aleɛ hyenle la, bɛdwazole ndɛ na bɛbɔle ɛyelalɛ afɔle nee anzodwolɛ afɔle. Ɛhye anzi, menli ne dɛnlanle aze lile na bɛnlonle. Akee bɛdwazole na bɛliele bɛ nye.+
7 Akee Gyihova zele Mosisi kɛ: “Dwu aze kɔ, ɔluakɛ wɔ menli ne mɔɔ ɛyele bɛ ɛvile Yigyibiti azɛlɛ zo la ɛbɛla ɛzɛkye.+
8 Bɛhwe bɛ nwo bɛvi adenle ne mɔɔ mengilele bɛ kɛ bɛlua nu la anwo ndɛndɛ.+ Bɛyɛ ɛnlankɛ ralɛ ananze* na bɛlɛkoto ye bɛabɔ afɔle bɛamaa ye na bɛaha kɛ, ‘O Yizilayɛ, wɔ Nyamenle ne mɔɔ yele wɔ vile Yigyibiti azɛlɛ zo la ɛne.’”
9 Gyihova doale zo zele Mosisi kɛ: “Menwu kɛ menli ɛhye mɔ ɛsolo.*+
10 Ɔti gyakyi me maa menva me ɛya wuluwulu ne mengua bɛ nwo zo na membɔ bɛ bo zo, na menyɛ wɔ maanle kpole.”+
11 Akee Mosisi bodole Gyihova ye Nyamenle ne+ na ɔhanle kɛ: “O Gyihova, duzu ati a ɛfa wɔ ɛya wuluwulu ne wɔagua wɔ menli ne mɔɔ ɛvale tumi kpole nee ɛsalɛ mɔɔ tumi wɔ nu ɛyele bɛ ɛvile Yigyibiti azɛlɛ zo la anwo zo a?+
12 Duzu ati a ɔwɔ kɛ Yigyibitima ka kɛ, ‘Adwenle ɛtane a ɔvale ɔyele bɛ a. Ɔkulo kɛ ɔku bɛ wɔ awoka ne mɔ azo na ɔbɔ bɛ bo zo ɔfi azɛlɛ ye azo la ati a ɔyɛle zɔ’ a?+ Gyakyi wɔ ɛya wuluwulu ne na sia suzu* kpɔkɛ mɔɔ wɔbɔ kɛ ɛmaa munzule ɛhye ado wɔ menli ne la anwo.
13 Kakye wɔ sonvolɛma Ebileham, Ayezeke nee Yizilayɛ mɔɔ ɛdawɔ mumua ne ɛhanle ndane ɛhilele bɛ kɛ: ‘Mebamaa bɛ bo zo amra azo kɛ anwomanyunlu nwɔlɔra,+ yɛɛ mebava azɛlɛ ɛhye mɔɔ mehile bɛ la meamaa bɛ bo zo amra amaa bɛava bɛayɛ bɛ agyapadeɛ dahuu la.’”+
14 Yemɔti Gyihova ziale zuzule* munzule ne mɔɔ ɔhanle kɛ ɔbamaa yeado ye menli ne la anwo.+
15 Akee Mosisi hakyile ɔ nwo na ɔvale Daselɛlilɛ awolɛ ndɛbandɛba nwiɔ ne+ ɔlɛle ɔ sa nu ɔvile boka ne azo ɔdwule.+ Ɛnee bɛhɛlɛ awolɛ ndɛbandɛba ne foa nwiɔ ne amuala azo; ɔ nyunlu nee ɔ nzi.
16 Awolɛ ndɛbandɛba ne le Nyamenle asa anloa gyima, yɛɛ ye edwɛkɛ a ɔhɛlɛle ye wɔ zolɛ a.+
17 Mɔɔ Dwɔhyua dele kɛ menli ne ɛlɛteɛdea nu ayɛ dede la, ɔzele Mosisi kɛ: “Mete konle ne wɔ azokoɛleɛ lɔ.”
18 Noko Mosisi hanle kɛ:
“Tɛ konimlilɛ* edwɛne ɔ,Yɛɛ tɛ kɛ bɛli bɛ nwo zo konim la ati a bɛlɛye awolɛ a;Mete kɛ bɛlɛto edwɛne fofolɛ bie.”
19 Mɔɔ Mosisi bikyele azokoɛleɛ ne na ɔnwunle ɛnlankɛ ralɛ ne+ nee agolezilɛ ne la, ɔvale ɛya kpole na ɔvuandinle awolɛ ndɛbandɛba ne mɔɔ ɔlɛ la ɔguale boka ne abo ɔbubule bɛ.+
20 Ɔvale ɛnlankɛ ralɛ ne mɔɔ bɛyɛ la na ɔvale senle ɔyelale ye na ɔdinle ye motomoto;+ akee ɔkpondenle ye wɔ nzule ne anye ɔmaanle Yizilayɛma nlonle.+
21 Na Mosisi bizale Aalɔn kɛ: “Duzu a menli ɛhye vale yɛle wɔ mɔɔ ɔti wɔva ɛtane kpole zɛhae wɔra bɛ nwo zo ɛ?”
22 Aalɔn buale kɛ: “Me menle, mmafa ɛya. Ɛdawɔ ɛze kɛ ɛtane ala a wɔ menli ne adwenle nu a.+
23 Ɔti bɛzele me kɛ, ‘Yɛ nyamenle maa yɛ maa ɔli yɛ nyunlu, ɔluakɛ Mosisi ɛhye, nrenyia ne mɔɔ yele yɛ vile Yigyibiti azɛlɛ zo la, yɛnze mɔɔ ɛdo ye a.’+
24 Yemɔti menzele bɛ kɛ, ‘Awie biala mɔɔ lɛ nvutuke la ɛye ɛmaa me.’ Akee menvuandinle menguale senle nu, na mɔɔ vi nu rale la a le ɛnlankɛ ralɛ ɛhye.”
25 Mosisi nwunle kɛ mɔɔ menli ne kulo la a bɛyɛ a, ɔluakɛ Aalɔn ɛmaa bɛ adenle kɛ bɛyɛ mɔɔ bɛkulo la, yemɔti bɛbɔle anyiemgba wɔ bɛ agbɔvolɛ anyunlu.
26 Akee Mosisi ragyinlanle azokoɛleɛ ne anuhɔlɛ na ɔhanle kɛ: “Nwane a wɔ Gyihova afoa a? Ɔrɛla me nwo ɛke!”+ Na Livaema ne amuala hɔgyinlanle ɔ nwo ɛkɛ.
27 Akee ɔzele bɛ kɛ: “Edwɛkɛ mɔɔ Gyihova, Yizilayɛ Nyamenle ne ɛha la ɛne, ‘Bɛ nuhua ko biala ɛva ye konle dadeɛ ɛzia ɔ nwo na ɔpɛ nu wɔ azokoɛleɛ ne ɔvi anuhɔlɛ ɔhɔ anuhɔlɛ, ɔhu ɔ diema, ɔ gɔnwo nee awie mɔɔ bikye ye la.’”+
28 Livaema ne yɛle mɔɔ Mosisi hanle la. Yemɔti bɛhunle menli kɛyɛ 3,000 wɔ kenle zɔhane.
29 Akee Mosisi hanle kɛ: “Bɛde bɛ nwo* bɛmaa Gyihova ɛnɛ, ɔluakɛ bɛ nuhua ko biala ɛho ɛtia ɔ ra nrenyia nee ɔ diema nrenyia;+ ɔbayila bɛ ɛnɛ.”+
30 Aleɛ hyenle la, Mosisi zele menli ne kɛ: “Bɛyɛ ɛtane kpole, na mebahɔ Gyihova ɛkɛ wɔ boka ne azo na meanlea saa mebahola meali bɛ ɛtane ne anwo mgbɔdalɛ a.”+
31 Yemɔti Mosisi hɔle Gyihova ɛkɛ na ɔhanle kɛ: “Nea ɛtane kpole mɔɔ menli ne ɛyɛ a! Bɛva nvutuke bɛyɛ nyamenle bɛmaa bɛ nwo!+
32 Noko mebodo wɔ, fa bɛ ɛtane kyɛ bɛ,+ tɛ ye zɔhane a ɛnee ye me duma fi wɔ buluku ne mɔɔ wɔhɛlɛ ye nu la anu.”+
33 Noko Gyihova zele Mosisi kɛ: “Awie biala mɔɔ ɛyɛ ɛtane ɛtia me la, mebaye ye duma meavi me buluku ne anu.
34 Akee kɔ, di menli ne anyunlu kɔ ɛleka mɔɔ mengilele wɔ la. Nea! Me anwumabɔvolɛ bali ɛ nyunlu,+ na kenle mɔɔ mebamaa bɛabu mgbonda la, mebahwe bɛ nzo wɔ bɛ ɛtane ne anwo.”
35 Akee Gyihova maanle ngyegyelɛ rale menli ne anwo zo ɔlua ɛnlankɛ ralɛ ne mɔɔ bɛluale Aalɔn anwo zo bɛyɛle la ati.
Ɔbodwɛkɛ
^ Anzɛɛ “ananze mɔɔ bɛgua.”
^ Anzɛɛ “ananze mɔɔ bɛgua.”
^ Hibulu aneɛ nu, “ɛyɛ bɛ kɔme ketee.”
^ Anzɛɛ “na nu ɛ nwo wɔ.”
^ Anzɛɛ “nlunle ɔ nwo wɔ.”
^ Anzɛɛ “Tɛ debie kpole mɔɔ bɛyɛ la anwo.”
^ Hibulu aneɛ nu, “Bɛva tumi bɛwula bɛ sa nu.”
