Ɛzela 1:1-11
1 Wɔ Pɛhyea Belemgbunli Saelɛse+ ɛvolɛ ne mɔɔ limoa la anu, amaa Gyihova edwɛkɛ ne mɔɔ ɔluale Gyɛlɛmaya+ anwo zo ɔhanle la ara nu la, Gyihova hanle Pɛhyea Belemgbunli Saelɛse ahonle* ɔmaanle ɔbɔle nolo wɔ ye belemgbunlililɛ ne anu amuala, eza ɔhɛlɛle ɔdole ɛkɛ,+ ɔse:
2 “Kɛ Pɛhyea Belemgbunli Saelɛse se la ɛne, ‘Gyihova, anwuma Nyamenle ne ɛva azɛlɛ ye azo arelemgbunlililɛ kɔsɔɔti ɛmaa me,+ na yeha yehile me kɛ menzi sua memaa ye wɔ Gyɛlusalɛm+ mɔɔ wɔ Dwuda la.
3 Awie biala mɔɔ wɔ bɛ avinli mɔɔ boka ye menli ne kɔsɔɔti anwo la, ye Nyamenle ne nee ye ɛlua, na ɔvo ɔhɔ Gyɛlusalɛm mɔɔ wɔ Dwuda la, na ɔhɔzi Gyihova, Yizilayɛ Nyamenle ne sua ne bieko—yemɔ a ɔle nɔhalɛ Nyamenle ne a—mɔɔ ye sua ne wɔ Gyɛlusalɛm la.*
4 Awie biala mɔɔ le ɛyɛvolɛ+ mɔɔ ɔde ɛleka biala la, ye kpalɛzoamra* ɛboa ye na bɛmaa ye dwɛtɛ fufule nee nvutuke, ninyɛne nee nyɛmoa yɛɛ afɔlebɔdeɛ mɔɔ vi bɛ ɛhulolɛ nu mɔɔ bɛfa bɛazi nɔhalɛ Nyamenle ne sua ne+ mɔɔ ɛnee wɔ Gyɛlusalɛm la.’”
5 Akee Dwuda nee Bɛngyaman mbusua mgbanyima, ɛsɔfoma nee Livaema, awie biala mɔɔ nɔhalɛ Nyamenle ne hanle ye ahonle la, boɔboale ɔ nwo kɛ ɔkazi Gyihova sua ne mɔɔ ɛnee wɔ Gyɛlusalɛm la bieko.
6 Menli mɔɔ nee bɛ de la kɔsɔɔti boale bɛ, bɛmaanle bɛ dwɛtɛ fufule nee nvutuke ahyɛnze, ninyɛne, nyɛmoa yɛɛ ninyɛne gyɛne mɔɔ sonle bolɛ la bɛbokale afɔlebɔdeɛ mɔɔ vi bɛ ɛhulolɛ nu la kɔsɔɔti anwo.
7 Eza Belemgbunli Saelɛse vale Gyihova sua nu ahyɛnze ne mɔ mɔɔ Nɛbukadenɛza vale vile Gyɛlusalɛm na ɔvale ɔziele ye nyamenle ne sua ne anu la rale.+
8 Pɛhyea Belemgbunli Saelɛse vale vindele na ɔvale ɔwulale gyazoneavolɛ Metelɛda asa anu ɔmaanle ɔdianle na ɔvale ɔmaanle Dwuda abusua kpanyinli Hyɛhyebazaa.*+
9 Ninyɛne ne dodo ɛne: Nvutuke ahɛndɛne 30, dwɛtɛ fufule ahɛndɛne 1,000 yɛɛ pɛlɛte gyɛne 29,
10 nvutuke ahyɛnze ngyikyi 30, dwɛtɛ fufule ahyɛnze ngyikyi 410 yɛɛ ahyɛnze gyɛne 1,000.
11 Nvutuke nee dwɛtɛ fufule ahyɛnze ne amuala le 5,400. Hyɛhyebazaa vale ɔ muala hɔle wɔ mekɛ mɔɔ menli mɔɔ hɔle akɛlɛzonlenlɛ nu la+ vi Babelɔn ziale rale Gyɛlusalɛm la.
Ɔbodwɛkɛ
^ Hibulu aneɛ nu, “sunsum.”
^ Anzɛɛ ɔkola ɔkile, “mɔɔ ɔwɔ Gyɛlusalɛm la.”
^ Hibulu aneɛ nu, “menli mɔɔ wɔ ɛleka mɔɔ ɔde la.”
