Ɛzela 4:1-24
4 Mɔɔ Dwuda nee Bɛngyaman agbɔvolɛ+ dele kɛ menli mɔɔ vi akɛlɛzonlenlɛ nu rale+ la ɛlɛsi ɛzonlenlɛsua amaa Gyihova, Yizilayɛ Nyamenle ne la,
2 ndɛndɛ ne ala bɛhɔle Zɛlubabɛle nee mbusua mgbanyima ne mɔ ɛkɛ na bɛhanle kɛ: “Bɛmaa yɛboka bɛ nwo yɛzi sua ne; ɔluakɛ yɛle kɛ bɛdabɛ la, yɛsonle* bɛ Nyamenle ne+ yɛɛ yɛbɔ afɔle yɛmaa ye ɔvi Aselea Belemgbunli Yisaa-hadɔn+ mɔɔ vale yɛ rale ɛke la mekɛ zo.”+
3 Noko Zɛlubabɛle nee Gyɛhyua yɛɛ Yizilayɛ mbusua mgbanyima mɔɔ ɛha la zele bɛ kɛ: “Bɛ nee yɛ ɛnlɛ kyɛfoa biala wɔ sua mɔɔ yɛsi yɛamaa yɛ Nyamenle ne la anu,+ yɛ ngomekye yɛbazi sua ne yɛamaa Gyihova, Yizilayɛ Nyamenle ne, kɛ mɔɔ Pɛhyea Belemgbunli Saelɛse ɛha kɛ yɛyɛ la.”+
4 Ɛnee menli mɔɔ wɔ azɛlɛ ne azo la ɛlɛkɔ zo amaa Dwudama asa anu ado* na bɛannyia anwosesebɛ bɛanzi sua ne.+
5 Bɛbɔle folɛtuvoma ɛkpa kɛ bɛzɛkye bɛ ngyehyɛleɛ ne mɔ+ wɔ Pɛhyea Belemgbunli Saelɛse mekɛ zo amuala too ɔhɔdwule Pɛhyea Belemgbunli Dalayɛse+ mekɛ zo.
6 Wɔ Ahazelɔse belemgbunlililɛ ne mɔlebɛbo, bɛhɛlɛle kɛlata bɛhɔbɔle menli mɔɔ de Dwuda nee Gyɛlusalɛm la somolɛ.
7 Wɔ Pɛhyea Belemgbunli Atazɛzɛse mekɛ zo noko, Behyelam, Metelɛda, Tabiale nee ɔ gɔnwo mɔ mɔɔ ɛha la hɛlɛle kɛlata hɔmaanle Belemgbunli Atazɛzɛse; bɛhilele kɛlata ne abo bɛhɔle Elam aneɛ nu+ na bɛvale Elam ngɛlɛleramgbɔkɛ bɛhɛlɛle.*
8 * Arane abɔlɔba kpanyinli Rilihɛm nee kɛlɛhɛlɛvolɛ Hyemehyae hɛlɛle kɛlata mɔɔ tia Gyɛlusalɛm la hɔmaanle Belemgbunli Atazɛzɛse kɛ:
9 (Ɛnee ɔvi arane abɔlɔba kpanyinli Rilihɛm nee kɛlɛhɛlɛvolɛ Hyemehyae yɛɛ bɛ gɔnwo mɔ mɔɔ ɛha la, ndɛnebuavolɛma nee amɛnlado ngyikyi ne mɔ, kɛlɛhɛlɛvolɛma, menli mɔɔ vi Yilɛke,+ Babeloniama, menli mɔɔ de Susa,+ mɔɔ le Yilamma,+
10 nee maanle maanle mɔɔ ɛha mɔɔ anyunlunyianli Asenapa kpole ne vale bɛ hɔle akɛlɛzonlenlɛ nu na ɔmaanle bɛdɛnlanle Samɛlea azuamgbole ne mɔ azo+ yɛɛ menli mɔɔ ɛha mɔɔ bɛwɔ Azule Ne Anzi* maanzinli ne anu la ɛkɛ, na
11 kɛlata ne mɔɔ bɛvale bɛhɔmaanle ye la anu edwɛkɛ ɛne.)
“Kɔmaa Belemgbunli Atazɛzɛse, ɔvi wɔ sonvolɛma, menli mɔɔ wɔ Azule Ne Anzi maanzinli ne anu la ɛkɛ:
12 Yɛmaa belemgbunli ne ade kɛ, Dwuuma mɔɔ vi ɛ nwo lɔ rale yɛ nwo ɛke la ɛradwu Gyɛlusalɛm. Bɛlɛsi atuadelɛ nee amumuyɛyɛlɛ sua ne bieko, yɛɛ bɛlɛto ye bane ne mɔ+ na bɛayɛ ye adiabo ne mɔ boɛ.
13 Yemɔti yɛmaa belemgbunli ne ade kɛ, saa bɛsi sua ɛhye bieko na bɛyɛ ye bane ne mɔ boɛ bɛwie a, bɛnrɛdua adwule, ninyɛne nwo adwule+ anzɛɛ adenle zo adwule na ɛhye ɛnrɛmaa arelemgbunli ne mɔ ɛnrɛnyia ezukoa dɔɔnwo.
14 Kɛmɔ yɛdi ngyenle wɔ* belemgbunli sua nu na ɔnle kpalɛ kɛ yɛbanlea yɛamaa belemgbunli ne aminli debie la ati, yɛkpondɛ kɛ belemgbunli ne te nwolɛ bie,
15 amaa wɔanleɛnlea buluku ne mɔɔ wɔ nenyia mɔ kɛlɛtokɛ ne wɔ nu la anu.+ Ɛbanwu ye wɔ buluku ne mɔɔ kɛlɛtokɛ ne wɔ nu la anu kɛ sua ɛhye le atuadelɛ sua, ɔmaa arelemgbunli nee maanzinli ne mɔ anwo kyele bɛ, na nuhua menli maa awie mɔ te atua ɔvi tete ne. Ɛhye ati a bɛzɛkyele sua ɛhye la.+
16 Yɛmaa belemgbunli ne ade kɛ, saa bɛsi sua ɛhye bieko na bɛyɛ ye bane ne mɔ boɛ bɛwie a, ɛnrɛnyia maanzinli mɔɔ wɔ Azule Ne Anzi lɔ la anwo zo tumi* biala.”+
17 Belemgbunli ne maanle bɛhɔhanle bɛhilele arane abɔlɔba kpanyinli Rilihɛm nee kɛlɛhɛlɛvolɛ Hyemehyae yɛɛ bɛ gɔnwo mɔ mɔɔ ɛha mɔɔ ɛnee bɛde Samɛlea yɛɛ maanzinli mɔɔ wɔ Azule Ne Anzi lɔ la anu amra mɔɔ ɛha la kɛ:
“Anzodwolɛ ɛha bɛ! Kɛkala
18 bɛgenga* kɛlata ne mɔɔ bɛmaanle bɛvale bɛrɛlɛle yɛ la bɔkɔɔ wɔ me nyunlu.
19 Memaanle bɛyɛle neɛnleanu na bɛnwunle kɛ ɔvi tete, sua ɛhye ɛho ɛtia arelemgbunli, yɛɛ atuadelɛ nee dwazotia ɛhɔ zo wɔ ɛkɛ.+
20 Arelemgbunli mɔɔ lɛ tumi kpole la lile tumi wɔ Gyɛlusalɛm na bɛnleanle maanzinli mɔɔ wɔ Azule Ne Anzi lɔ la amuala azo, na bɛduale adwule, ninyɛne nwo adwule nee adenle zo adwule bɛmaanle bɛ.
21 Yemɔti bɛli mɛla bɛmaa menli ɛhye mɔ ɛgyakyi gyima ne amaa bɛanzi sua ne bieko kɔkpula kɛ mebali mɛla la.
22 Bɛnlea boɛ na bɛambu bɛ nye bɛangua mɛla ɛhye azo, amaa belemgbunli ne amminli ninyɛne dɔɔnwo.”+
23 Mɔɔ bɛgengale Belemgbunli Atazɛzɛse kɛlata ne wɔ Rilihɛm nee kɛlɛhɛlɛvolɛ Hyemehyae yɛɛ bɛ gɔnwo mɔ anyunlu bɛwiele la, bɛhɔle Dwuuma mɔɔ wɔ Gyɛlusalɛm la anwo zo ndɛndɛ na bɛtinlitinlinle bɛ bɛmaanle bɛgyakyile gyima ne.
24 Yemɔti mekɛ ɛhye anu a bɛgyakyile Nyamenle sua ne mɔɔ wɔ Gyɛlusalɛm la anwo gyima ne a; na bɛangɔ nwolɛ bieko too Pɛhyea Belemgbunli Dalayɛse+ belemgbunlililɛ ne ɛvolɛ mɔɔ tɔ zo nwiɔ la azo.
Ɔbodwɛkɛ
^ Hibulu aneɛ nu, “yɛkpondɛ.”
^ Hibulu aneɛ nu, “maanle bɛ sa nu yɛle bɛtɛɛ.”
^ Anzɛɛ ɔkola ɔkile, “bɛhɛlɛle ye wɔ Elam aneɛ nu na bɛhilele ɔ bo.”
^ Bɛlimoale bɛhɛlɛle Ɛze 4:8 mɔɔ kɔ 6:18 ne wɔ Elam aneɛ nu.
^ Anzɛɛ “bɛwɔ Yufileti Ne Anzi.”
^ Anzɛɛ “yɛnyia yɛ ahatualɛ ne yɛfi.”
^ Elam aneɛ nu, “anu kyɛfoa.”
^ Anzɛɛ ɔkola ɔkile, “bɛhile ɔ bo na bɛgenga.”
