Ɛzela 5:1-17
5 Akee ngapezoma, Hagae+ nee Zɛkalaya+ mɔɔ le Yedo+ anlɔnra la luale Yizilayɛ Nyamenle ne mɔɔ nee bɛ lua la duma nu hanle ngapezo hilele Dwuuma mɔɔ wɔ Dwuda nee Gyɛlusalɛm la.
2 Mekɛ zɔhane a Hyealeteɛle ara Zɛlubabɛle+ nee Gyɛhozadake ara Gyɛhyua+ bɔle ɔ bo kɛ bɛsi Nyamenle sua ne+ mɔɔ wɔ Gyɛlusalɛm la a; na ɛnee ngapezoma ne wɔ bɛ nwo ɛkɛ ne na bɛboale bɛ.+
3 Mekɛ zɔhane, maanzinli mɔɔ wɔ Azule Ne Anzi* lɔ la amɛnlado Tatenae nee Hyita-bɔzenae yɛɛ bɛ gɔnwo mɔ rale bɛ nwo ɛkɛ na bɛbizale bɛ kɛ: “Nwane a maanle bɛ adenle kɛ bɛzi sua ɛhye na bɛva ndaboa bɛwulowula ɛhye anu a?”
4 Akee bɛbizale bɛ kɛ: “Kɛ bɛfɛlɛ menli mɔɔ ɛlɛyɛ gyima wɔ sua ɛhye anwo la ɛ?”
5 Noko ɛnee Nyamenle ɛlɛnea* Dwuu mgbanyima ne mɔ anwo zo,+ na bɛammaa bɛangyakyi gyima ne too ɔhɔdwule kɛ bɛvale nwolɛ edwɛkɛ bɛhɔdole Dalayɛse anyunlu na ɔhɛlɛle ɛhye anwo kɛlata ɔrɛlɛle bɛ la.
6 Kɛlata mɔɔ maanzinli mɔɔ wɔ Azule Ne Anzi lɔ la amɛnlado Tatenae nee Hyita-bɔzenae yɛɛ ɔ gɔnwo mɔ, amɛnlado ngyikyi ne mɔ mɔɔ wɔ maanzinli mɔɔ wɔ Azule Ne Anzi lɔ la hɛlɛle hɔmaanle Belemgbunli Dalayɛse la anu edwɛkɛ ɛne;
7 bɛvale kɛlata ne bɛhɔmaanle ye, na ɛhye a bɛhɛlɛle a:
“Kɔmaa Belemgbunli Dalayɛse:
“Anzodwolɛ ɛha wɔ!
8 Yɛkulo kɛ belemgbunli te kɛ, yɛhɔle Dwuda maanzinli nu na yɛhɔle Nyamenle bedevinli ne sua ne anwo ɛkɛ, na bɛlɛfa awolɛ mgbole bɛazi sua ne yɛɛ bɛlɛfa ndaboa bɛawulowula bane ne anu. Bɛlɛyɛ gyima ne anyebolo zo yɛɛ bɛ mɔdenlebɔlɛ ɛlɛmaa yeanyia anyuhɔlɛ.
9 Yemɔti yɛbizale bɛ mgbanyima ne mɔ kɛ: ‘Nwane a maanle bɛ adenle kɛ bɛzi sua ɛhye na bɛva ndaboa bɛwulowula ɛhye anu a?’+
10 Eza yɛbizale menli mɔɔ li bɛ ti la aluma, amaa yɛahɛlɛ bɛ aluma na yɛaha yɛahile wɔ.
11 “Mualɛ mɔɔ bɛvale bɛmaanle yɛ la ɛne: ‘Yɛle anwuma nee aze* Nyamenle ne azonvolɛ, na yɛlɛsi sua mɔɔ Yizilayɛ belemgbunli kpole bie zile ye mekɛ tendenle bie la bieko.+
12 Kɛmɔ yɛ papa mɔ hanle anwuma Nyamenle ne ɛya la ati,+ ɔvale bɛ ɔwulale Babelɔn Belemgbunli Nɛbukadenɛza,+ Kaledeanli ne mɔɔ zɛkyele sua ɛhye+ na ɔvale menli ne ɔhɔle akɛlɛzonlenlɛ nu wɔ Babelɔn la asa anu.+
13 Noko wɔ Babelɔn Belemgbunli Saelɛse ɛvolɛ mɔɔ limoa la anu, Belemgbunli Saelɛse lile mɛla kɛ bɛzi Nyamenle sua ɛhye bieko.+
14 Eza Belemgbunli Saelɛse yele Nyamenle sua ne anu nvutuke nee dwɛtɛ fufule ahyɛnze mɔɔ Nɛbukadenɛza vale vile Gyɛlusalɛm ɛzonlenlɛsua ne anu na ɔvale ɔziele Babelɔn ɛzonlenlɛsua ne anu la vindele.+ Bɛvale bɛmaanle nrenyia bie mɔɔ bɛfɛlɛ ye Hyɛhyebazaa*+ mɔɔ Saelɛse yɛle ye amɛnlado la.+
15 Saelɛse zele ye kɛ: “Fa ahyɛnze ɛhye mɔ. Fa kɔgua ɛzonlenlɛsua ne mɔɔ wɔ Gyɛlusalɛm la anu na maa bɛzi Nyamenle sua ne bieko wɔ ɔ bo zo ne.”+
16 Yemɔti Hyɛhyebazaa ɛhye rale na ɔdole Nyamenle sua ne mɔɔ wɔ Gyɛlusalɛm la adiabo ne;+ yɛɛ bɛyɛ nwolɛ gyima too yeradwu ɛnɛ, noko bɛtɛwiele.’+
17 “Yemɔti saa ɔle kpalɛ wɔ belemgbunli anye zo a, ɔmaa bɛnleɛnlea belemgbunli ninyɛnezielɛ ɛleka ne mɔɔ wɔ Babelɔn la anu na bɛnlea saa Belemgbunli Saelɛse lile mɛla kɛ bɛzi Nyamenle sua ne mɔɔ wɔ Gyɛlusalɛm la bieko a;+ na belemgbunli ɛmaa bɛva kpɔkɛ mɔɔ ɔbazi wɔ ɛhye anwo la bɛrɛlɛ yɛ.”
Ɔbodwɛkɛ
^ Anzɛɛ “Yufileti Ne Anzi.”
^ Elam aneɛ nu, “ɛnee bɛ Nyamenle ne anye wɔ.”
^ Anzɛɛ “azɛlɛ ye.”
