Ɛzela 6:1-22
6 Mekɛ zɔhane anu a Belemgbunli Dalayɛse maanle bɛnleɛnlea kɛlɛtokɛ* ne anu wɔ Babelɔn ninyɛnezielɛ ɛleka ne a.
2 Na bɛnwunle nwomamobɔleɛ bie wɔ belemgbunli sua ne mɔɔ wɔ Ɛkebatana mɔɔ wɔ Medea maanzinli nu la anu, ɛnee bɛhɛlɛ edwɛkɛ ɛhye wɔ zo:
3 “Wɔ Belemgbunli Saelɛse ɛvolɛ ne mɔɔ limoa la anu, Belemgbunli Saelɛse lile Nyamenle sua ne mɔɔ wɔ Gyɛlusalɛm la anwo mɛla+ kɛ: ‘Bɛzi sua ne bieko bɛmaa ɔyɛ ɛleka mɔɔ bɛbabɔ afɔle, na bɛyɛ ye adiabo ne mɔ boɛ; ɔwɔ kɛ ye anwumahɔlɛ yɛ kubit 60,* ye tɛtɛlɛ yɛ kubit 60,+
4 bɛto awolɛ mgbole ne nsa bɛtoa zo a, bɛva taboa ko bɛdo zo;+ na bɛva belemgbunli sua nu ezukoa bɛdua nwolɛ kakɛ ne.+
5 Eza bɛmaa bɛva Nyamenle sua ne anu nvutuke nee dwɛtɛ fufule ahyɛnze mɔɔ Nɛbukadenɛza vale vile ɛzonlenlɛsua ne mɔɔ wɔ Gyɛlusalɛm anu rale Babelɔn+ la bɛzia bɛhɔ, amaa bɛava bɛazie bɛ bo zo ne wɔ ɛzonlenlɛsua ne anu wɔ Gyɛlusalɛm na bɛava bɛazie Nyamenle sua ne anu.’+
6 “Yemɔti maanzinli mɔɔ wɔ Azule Ne Anzi lɔ la* amɛnlado Tatenae, Hyita-bɔzenae nee bɛ gɔnwo mɔ, amɛnlado ngyikyi mɔɔ wɔ maanzinli mɔɔ wɔ Azule Ne Anzi lɔ la,+ ɛhwe bɛ nwo bɛvi ɛkɛ ne.
7 Bɛmmafa bɛ nwo bɛdielie Nyamenle sua zɔhane anwo gyima ne anu. Dwuuma amɛnlado ne nee Dwuu mgbanyima bazi Nyamenle sua zɔhane bieko wɔ ɔ bo zo ne.
8 Bieko, melɛdi mɔɔ ɔwɔ kɛ bɛyɛ bɛmaa Dwuu mgbanyima ɛhye mɔ bɛmaa bɛsi Nyamenle sua zɔhane bieko la anwo mɛla: Bɛva belemgbunli gya nu ezukoa,+ adwule mɔɔ bɛdielie wɔ maanzinli mɔɔ wɔ Azule Ne Anzi lɔ la bɛmaa mrenyia ɛhye mɔ ɛva ɛdua nwolɛ kakɛ ne ndɛndɛ na bɛdoa gyima ne azo mɔɔ bɛngyakyi a.+
9 Na debie biala mɔɔ bɛhyia nwolɛ la, nlankɛ mralɛ nyinli,+ mboane nyinli+ nee mboane mralɛ+ mɔɔ bɛfa bɛabɔ ɛyelalɛ afɔle bɛamaa anwuma Nyamenle ne, hwiiti,+ ngyenle,+ nwanye+ nee nwole,+ kɛ mɔɔ ɛsɔfoma mɔɔ wɔ Gyɛlusalɛm baha la, ɔwɔ kɛ bɛfa bɛmaa bɛ alehyenlɛ biala mɔɔ ɔmkpa nwolɛ fee a,
10 amaa bɛahɔ zo bɛabɔ afɔle mɔɔ sɔ anwuma Nyamenle ne anye la na bɛazɛlɛ ngoane bɛamaa belemgbunli nee ɔ mra mrenyia ne mɔ.+
11 Eza meli mɛla kɛ saa awie biala anli mɛla ɛhye azo a, bɛbaye ye sua ne anu baka ne bie na bɛahenda ye wɔ zo, na bɛava ye sua ne bɛahakyi maanle tiefi sua* wɔ ɛtane ɛhye ati.
12 Na Nyamenle ne mɔɔ ɛmaa ye duma ɛdɛnla ɛkɛ ne la,+ ɛzɛkye belemgbunli biala nee menli mɔɔ bamaa bɛ sa zo atia mɛla ɛhye na bɛazɛkye Nyamenle sua zɔhane mɔɔ wɔ Gyɛlusalɛm la. Medame Dalayɛse a meli mɛla ɛhye a. Bɛyɛ ye ndɛndɛ.”
13 Akee maanzinli mɔɔ wɔ Azule Ne Anzi lɔ la amɛnlado Tatenae, Hyita-bɔzenae+ nee bɛ gɔnwo mɔ yɛle debie biala mɔɔ Belemgbunli Dalayɛse hanle la ndɛndɛ.
14 Na ngapezonli Hagae+ nee Yedo anlɔnra Zɛkalaya+ ngapezo ne maanle Dwuu mgbanyima hɔle zo zile sua ne na bɛnyianle anyuhɔlɛ;+ ɔlua Yizilayɛ Nyamenle ne edwɛkɛ nee Saelɛse+ nee Dalayɛse+ yɛɛ Pɛhyea Belemgbunli Atazɛzɛse+ mɛla zo a bɛzile sua ne bɛwiele a.+
15 Bɛwiele sua ne si wɔ Eda* siane ne kenle mɔɔ tɔ zo nsa la azo wɔ Belemgbunli Dalayɛse belemgbunililɛ ne ɛvolɛ mɔɔ tɔ zo nsia la anu.
16 Akee Yizilayɛma, ɛsɔfo ne mɔ, Livaema+ nee menli mɔɔ ɛha mɔɔ vi akɛlɛzonlenlɛ nu rale la vale anyelielɛ yilale Nyamenle sua ne azo.
17 Bɛvale nlankɛ nyinli 100, mboane nyinli 200, mboane mralɛ 400 bɛrale kɛ bɛva bɛyila Nyamenle sua ɛhye azo, akee bɛvale mbɔnkye nyinli 12 mɔɔ nee Yizilayɛ mbusua ne mɔ dodo sɛ, mɔɔ bɛfa bɛabɔ ɛtane afɔle bɛamaa Yizilayɛma kɔsɔɔti la bɛrale.+
18 Na bɛkpale ɛsɔfo ne mɔ nee Livaema ne ekpunli ekpunli bɛmaanle bɛyɛle Nyamenle ɛzonlenlɛ gyima ne wɔ Gyɛlusalɛm+ kɛ mɔɔ bɛhɛlɛ ye wɔ Mosisi buluku ne anu la.+
19 Na menli mɔɔ vi akɛlɛzonlenlɛ nu rale la lile Akpabɛnwo ne wɔ siane ne mɔɔ limoa la kenle mɔɔ tɔ zolɛ 14 la azo.+
20 Ɛsɔfo ne mɔ nee Livaema ne amuala dele bɛ nwo, yemɔti ɛnee bɛ muala bɛ nwo te;+ bɛhunle Akpabɛnwo nane ne bɛmaanle menli mɔɔ vi akɛlɛzonlenlɛ nu rale la kɔsɔɔti, bɛ gɔnwo mɔ ɛsɔfoma nee bɛdabɛ mumua ne.
21 Akee Yizilayɛma mɔɔ vi akɛlɛzonlenlɛ nu rale la lile bie, bɛ nee awie biala mɔɔ nee bɛ rale na yehwe ɔ nwo yevi maanle maanle ne anu nyɛleɛ mɔɔ anwo ɛnde la anwo kɛ ɔsonle* Gyihova, Yizilayɛ Nyamenle ne la lile.+
22 Eza bɛvale anyelielɛ bɛlile Paano Mɔɔ Mgbɔvonle Ɛnle Nu Ɛvoyia ne+ kenle nsuu, ɔluakɛ Gyihova maanle bɛ nye liele yɛɛ ɔmaanle bɛnyianle Aselea belemgbunli ne anyunlu ɛlolɛ,+ yemɔti ɔboale bɛ* wɔ nɔhalɛ Nyamenle ne, Yizilayɛ Nyamenle ne sua ne anwo gyima ɛyɛlɛ nu.
Ɔbodwɛkɛ
^ Elam aneɛ nu, “kɛlɛtokɛ sua.”
^ Anzɛɛ “Yufileti Ne Anzi lɔ.”
^ Anzɛɛ ɔkola ɔkile, “fovolɛ zo.”
^ Hibulu aneɛ nu, “ɔkpondɛ.”
^ Hibulu aneɛ nu, “yemɔti ɔmianle bɛ sa nu.”
